ސަރުކާރުގެ "ހިޔާ 2018" މަޝްރޫޢުގެ H5 (ޓީޗަރުންނަށް ޚާއްސަ) ކެޓަގަރީގެ ފުލެޓްތަކަށް ޝަރުޠުހަމަވެ، ފުލެޓް ލިބޭ ފަރާތްތަކުގެ ފޯމު ނަންބަރުތައް އެނގޭނެ ދާއިމީ ލިސްޓް ޢާންމުކޮށް އެންގުމުގެ ގޮތުން އިޢުލާންކުރީމެވެ. އަދި މިލިސްޓް ދިވެހި ސަރުކާރުގެ ގެޒެޓާއި، މިމިނިސްޓްރީގެ ވެބްސައިޓް www.housing.gov.mv ގައި ޝާއިޢުކުރެވިފައިވާނެއެވެ.  މިކެޓަގަރީއަށް ފޯމް ހުށަހެޅުއްވި ޢަދަދަށް ބަލައި، ޝަރުޠު ހަމަވާ ހުރިހާ ފަރާތްތަކަށް ފުލެޓް ލިބޭ ވާހަކަ ދަންނަވަމެވެ. އަދި މިކެޓަގަރީގެ ޝަރުޠު ހަމަވެ، ފޯމު ހުށަހެޅުއްވި އެއްވެސް ފަރާތެއް ލިސްޓުން އުނި ނުވާތީ، އެފަރާތްތަކަށް ލިބުނު ޕޮއިންޓް ލިސްޓުގައި ހާމަކޮށްފައެއް ނުވާނެއެވެ. 

ވަގުތީ ލިސްޓުގައި ހިމެނުނު ފަރާތެއް ދާއިމީ ލިސްޓުގައި ނުހިމެނިވާނަމަ ވާނީ، މިމިނިސްޓްރީން އެފަރާތެއްގެ މައުލޫމާތު އިތުރަށް ބެލި ބެލުމުން ސައްޙަ ނޫން މައުލޫމާތު ދެއްވާފައިވާކަން ހާމަވުމާ ގުޅިގެން ފޯމު ބާޠިލްކުރުމުން ނުވަތަ އެފަރާތެއްގެ އަނބި/ފިރިމީހާއަށް "ހިޔާ 2018" މަޝްރޫޢުގެ އެހެން ކެޓަގަރީއަކުން ފުލެޓް ލިބިފައިވާނަމައެވެ.

ފުލެޓްތައް ލިބޭ ފަރާތްތަކާއެކު އެގްރީމެންޓް ހެދުމުގެ ކުރިން، އެކެޓަގަރީއެއްގެ ދަށުން ޢާންމުކުރެވިފައިވާ މައުލޫމާތު ކަރުދާހުގެ ޝަރުޠުތަކުގައިވާ ގޮތުގެ މަތިން، ގޯތިގެދޮރާ ބެހޭ މައުލޫމާތު އިތުރަށް ބަލައި ޗެކްކުރެވޭނެއެވެ. އަދި ދެމަފިރިން ފުލެޓަށް ހޮވިއްޖެނަމަ، ފުލެޓް ޙަވާލުކުރެވޭނީ މިކަމާ ގުޅޭގޮތުން އެކެޓަގަރީއެއްގެ ޝަރުޠުތަކުގައި ބަޔާންކުރެވިފައިވާ އުޞޫލާ އެއްގޮތަށް ކަމުގައި ދެންނެވީމެވެ.