މިސާލު 1

ސަޕްލަޔަރ ޕްރައިވެޓް ލިމިޓެޑް ("ސަޕްލަޔަރ") އިން ކަސްޓަމަރ ޕްރައިވެޓް ލިމިޓެޑް ("ކަސްޓަމަރ") އަށް، 25,000 ރުފިޔާގެ އަގަކަށް ކަރަންޓު ވަޔަރުކުރުމުގެ މަސައްކަތެއް ކޮށްދިނުމަށް އެއްބަސްވެއެވެ. މި ދެ ކުންފުނި ވެސް ވަނީ މީރާގައި ޖީ.އެސް.ޓީއަށް ރަޖިސްޓަރީކޮށްފައެވެ.

މި ދެ ކުންފުނީގެ މެދުގައި ވެފައިވާ ކޮންޓްރެކްޓުގައި، ކަސްޓަމަރއިން ޖީ.އެސް.ޓީގެ %6 (1,500 ރުފިޔާ) ސަޕްލަޔަރއަށް ދައްކަންޖެހޭނެ ކަމަށް ބަޔާންކޮށްފައިވެއެވެ. އެހެންކަމުން މި ކޮންޓްރެކްޓުގެ ދަށުން ކަސްޓަމަރއިން ސަޕްލަޔަރއަށް އަދާކުރަންޖެހޭ މުޤާބިލުގެ ޖުމުލައަކީ 26,500 ރުފިޔާއެވެ.

ކޮންޓްރެކްޓުގައި ބަޔާންކޮށްފައިވާ މަސައްކަތްތައް 10 ދުވަހުގެ ތެރޭގައި ސަޕްލަޔަރއިން ނުނިންމައިފިނަމަ، ކަސްޓަމަރއިން ސަޕްލަޔަރއަށް އަދާކުރާ މުޤާބިލުން %5 އުނިކުރެވިދާނެ ކަމަށް އެ ކޮންޓްރެކްޓުގައި ބަޔާންކޮށްފައިވެއެވެ. ސަޕްލަޔަރއަށް އެ މަސައްކަތް ނިންމުނީ 13 ދުވަހުގެ ތެރޭގައެވެ. އެހެންކަމުން، ކޮންޓްރެކްޓުގައި އެއްބަސްވެފައިވާ ގޮތުގެ މަތިން، ސަޕްލަޔަރއަށް އަދާކުރާ މުޤާބިލުން %5، ކަސްޓަމަރއިން އުނިކުރިއެވެ. އޭރު ސަޕްލަޔަރއިން މި މުއާމަލާތަށް ޓެކްސް އިންވޮއިސްއެއް ދޫކޮށްފައެއް ނުވެއެވެ.

ސަޕްލަޔަރއާ ގުޅޭ ކަންކަން

އެ ޚިދުމަތުގެ ޖީ.އެސް.ޓީ ނުހިމަނާ އަގުގެ ގޮތުގައި 23,750 ރުފިޔާ (%5 އުނިކުރުމުން އަންނަ އަދަދު) އާއި ޖީ.އެސް.ޓީގެ ގޮތުގައި 1,425 ރުފިޔާ (23,750 ރުފިޔާގެ %6) އަދި އެ ޚިދުމަތުގެ އަގަކީ ޖީ.އެސް.ޓީއާއެކު 25,175 ރުފިޔާ ކަން އެނގޭނެހެން ސަޕްލަޔަރއިން ކަސްޓަމަރއަށް ޓެކްސް އިންވޮއިސްއެއް ދޫކުރަންވާނެއެވެ. މި މުއާމަލާތުގެ ޖީ.އެސް.ޓީ ލާޒިމުވާ ވަގުތު ބައްދަލުވާ ޓެކްސް ނެގޭ މުއްދަތު ނިމިގެން ޖެހިގެން އަންނަ މަހުގެ 28 ވަނަ ދުވަހުގެ ނިޔަލަށް، މި މުއާމަލާތުގެ ޖީ.އެސް.ޓީ ކަމަށްވާ 1,425 ރުފިޔާ، ސަޕްލަޔަރއިން މީރާއަށް ދައްކަންވާނެއެވެ.

ކަސްޓަމަރއާ ގުޅޭ ކަންކަން

ކަސްޓަމަރއިން 25,000 ރުފިޔާގެ %5 އުނިކުރާނީއެވެ. އެހެންކަމުން ކަސްޓަމަރއިން ސަޕްލަޔަރއަށް ޖީ.އެސް.ޓީ ނުހިމަނައި ދައްކަންޖެހޭ އަދަދަކީ 23,750 ރުފިޔާއެވެ. އަދި ކަސްޓަމަރއިން ސަޕްލަޔަރއަށް ޖީ.އެސް.ޓީއާއެކު އަދާކުރަންޖެހޭ މުޤާބިލަކީ 25,175 ރުފިޔާއެވެ. ކަސްޓަމަރއިން ސަޕްލަޔަރއަށް ޖީ.އެސް.ޓީގެ ގޮތުގައި ދެއްކި 1,425 ރުފިޔާ، ކަސްޓަމަރއަށް އިންޕުޓް ޓެކުހުގެ ގޮތުގައި އުނިކުރެވޭނެއެވެ.

މިސާލު 2

މިސާލު 1 ގައި ބަޔާންކޮށްފައިވާ ކަންކަން ހަމަ އެ ގޮތުގައި ހުރި ކަމަށް ބަލާށެވެ. ނަމަވެސް ކަސްޓަމަރއިން %5 އުނިކުރުމަށްފަހު ސަޕްލަޔަރއަށް ފައިސާ ދައްކާއިރު، ފުރަތަމަ އެއްބަސްވެފައިވާ ފަދައިން ޖީ.އެސް.ޓީ ނުހިމަނައި 25,000 ރުފިޔާގެ ޓެކްސް އިންވޮއިސްއެއް ސަޕްލަޔަރއިން ކަސްޓަމަރއަށް ދޫކޮށްފައިވާ ކަމަށް ބަލާށެވެ.

ސަޕްލަޔަރއާ ގުޅޭ ކަންކަން

ސަޕްލަޔަރއިން ކަސްޓަމަރއަށް ދޫކޮށްފައިވާ ޓެކްސް އިންވޮއިސްގައި، ޚިދުމަތުގެ އަގަކީ ޖީ.އެސް.ޓީ ނުހިމަނައި 25,000 ރުފިޔާ ކަމަށާއި ޖީ.އެސް.ޓީއަކީ 1,500 ރުފިޔާ (25,000 ރުފިޔާގެ %6) ކަމަށް އަދި ޖީ.އެސް.ޓީއާއެކު އެ ޚިދުމަތުގެ އަގަކީ 26,500 ރުފިޔާ ކަމަށް ބަޔާންކޮށްފައިވެއެވެ. މި މުއާމަލާތުގެ ޖީ.އެސް.ޓީ ލާޒިމުވާ ވަގުތު ބައްދަލުވާ ޓެކްސް ނެގޭ މުއްދަތު ނިމިގެން ޖެހިގެން އަންނަ މަހުގެ 28 ވަނަ ދުވަހުގެ ނިޔަލަށް، މި މުއާމަލާތުގެ ޖީ.އެސް.ޓީ ކަމަށްވާ 1,500 ރުފިޔާ، ސަޕްލަޔަރއިން މީރާއަށް ދައްކަންވާނެއެވެ.

ކަސްޓަމަރއިން މި މުއާމަލާތުގެ އަގުން %5 އުނިކޮށްފައިވާތީ، ސަޕްލަޔަރއިން ދޫކޮށްފައިވާ ޓެކްސް އިންވޮއިސްގައި އެ މުއާމަލާތުގެ އަގުގެ ގޮތުގައި ޖީ.އެސް.ޓީ ނުހިމަނައި ބަޔާންކޮށްފައިވާ އަގު މިހާރު ޞައްޙައެއް ނުވާނެއެވެ. އެހެންކަމުން ސަޕްލަޔަރއިން ޤާނޫނުގެ 44 ވަނަ މާއްދާއާ އެއްގޮތްވާ ގޮތުގެ މަތިން ކަސްޓަމަރއަށް ކްރެޑިޓް ނޯޓެއް ދޫކުރަންވާނެއެވެ. މި ކްރެޑިޓް ނޯޓުގައި، ކްރެޑިޓް ނޯޓެއްގައި ފުރިހަމަވާންޖެހޭ ޝަރުތުތަކުގެ އިތުރުން، އެ ނޯޓު ދޫކުރަން ޖެހުނު ސަބަބާއި ޓެކްސް އިންވޮއިސްގައި ހިމަނައިފައިވާ ޖީ.އެސް.ޓީގެ އަދަދު (1,500 ރުފިޔާ) އާއި މި މުއާމަލާތުގެ ޖީ.އެސް.ޓީ ނުހިމަނާ އަގު ބަދަލުވުމުން ހިސާބުކުރެވުނު ޖީ.އެސް.ޓީގެ އަދަދު (23,750 ރުފިޔާގެ %6 ކަމަށްވާ 1,425 ރުފިޔާ) އަދި ޖީ.އެސް.ޓީގެ މި ދެ އަދަދުގެ ދެމެދުގައިވާ ފަރަގު (1,500 ރުފިޔާއިން 1,425 ރުފިޔާ އުނިކުރުމުން އަންނަ އަދަދު ކަމަށްވާ 75 ރުފިޔާ) ބަޔާންކުރަންވާނެއެވެ.

ސަޕްލަޔަރއިން ކަސްޓަމަރއަށް ކްރެޑިޓް ނޯޓް ދޫކުރާ ޓެކްސް ނެގޭ މުއްދަތުގެ ޖީ.އެސް.ޓީ ބަޔާނުގެ "އުނިއިތުރުކުރުން" މި އައިޓަމްގެ ދަށުން މި 75 ރުފިޔާ އުނިކުރެވިދާނެއެވެ.

އެހެންކަމުން، ސަޕްލަޔަރއިން މީރާއަށް ދައްކަންޖެހޭ އައުޓްޕުޓް ޓެކުހުގެ ޖުމުލައަކަށްވާނީ 1,425 ރުފިޔާ (1,500 ރުފިޔާއިން 75 ރުފިޔާ އުނިކުރުމުން އަންނަ އަދަދު) އެވެ.

ކަސްޓަމަރއާ ގުޅޭ ކަންކަން

ކަސްޓަމަރއިން 25,000 ރުފިޔާގެ %5 އުނިކުރާނީއެވެ. އެހެންކަމުން ކަސްޓަމަރއިން ސަޕްލަޔަރއަށް ޖީ.އެސް.ޓީ ނުހިމަނައި ދައްކަންޖެހޭ އަދަދަކީ 23,750 ރުފިޔާއެވެ. އަދި ކަސްޓަމަރއިން ސަޕްލަޔަރއަށް ޖީ.އެސް.ޓީއާއެކު އަދާކުރި މުޤާބިލަކީ 25,175 ރުފިޔާއެވެ. ކަސްޓަމަރއިން ސަޕްލަޔަރއަށް ޖީ.އެސް.ޓީގެ ގޮތުގައި ދެއްކި 1,500 ރުފިޔާ، ކަސްޓަމަރއަށް އިންޕުޓް ޓެކުހުގެ ގޮތުގައި އުނިކުރެވޭނެއެވެ.

ސަޕްލަޔަރއިން ކަސްޓަމަރއަށް ކްރެޑިޓް ނޯޓް ފޮނުވި ޓެކްސް ނެގޭ މުއްދަތުގެ ޖީ.އެސް.ޓީ ބަޔާނުގެ "އުނިއިތުރުކުރުން" މި އައިޓަމްގެ ދަށުން މި 75 ރުފިޔާ އިތުރުކުރަންވާނެއެވެ. އެހެންކަމުން، ކަސްޓަމަރއަށް އިންޕުޓް ޓެކުހުގެ ގޮތުގައި އުނިކުރެވޭ ޖުމުލަ އަދަދަކީ 1,425 ރުފިޔާ (1,500 ރުފިޔާއިން 75 ރުފިޔާ އުނިކުރުމުން އަންނަ އަދަދު) އެވެ.