ދިވެހިރާއްޖެ
އިޢުލާން
ޕެސްޓިސައިޑް އެތެރެކުރާ ފަރާތްތަކުގެ ސަމާލުކަމަށް
ޕެސްޓިސައިޑާއި ފާރޓިލައިޒަރ ވިއްކަމުންދާ ފިހާރަތަކުން ދަނޑުވެރިންނަށް ލޭބަލް ނުވަތަ ފެކްޓް ޝީޓް ފޯރުކޮށްނުދޭ ކަމުގެ ޝަކުވާ މިހާރަކަށް އައިސް ވަރަށް ގިނައިން މި މިނިސްޓްރީއަށް ލިބެމުންދެއެވެ. މިނިސްޓްރީން އަތޮޅުތެރޭގައި ހިންގާ ވޯކްޝޮޕްތަކާއި ތަމްރީނު ޕްރޮގްރާމުތަކުގެ ތެރޭގައިވެސް އެކަމުގެ ޝަކުވާތައް ދަނޑުވެރިން ކުރެއެވެ. ބޭސް ފުޅި/ އުރައިގެ ބޭރުގައި ތަތްކޮށްފައިވާ ލޭބަލްގައި ހިމެނެނީ ރަނގަޅު ގޮތުގައި، ބޭސް ބޭނުންކުރާނެ ގޮތުގެ އެންމެ ބޭނުންތެރި މުހިންމު އިރުޝާދުތަކެވެ. އޭގައި ބޭސް ބޭނުންކުރާ ފަރާތާއި ތިމާވެށި ރައްކާތެރިކުރުމަށް ބޭނުންވާ މުހިންމު މަޢުލޫމާތުތައް ހިމެނެއެވެ. މިހާރަކަށް އައިސް ސްރީލަންކާއިންނާއި ތައިލެންޑުން އެތެރެކުރާ ބޭސްތަކުގައި ހުންނަ ލޭބަލް ހުންނަނީ އެ ޤައުމުތަކުގެ ބަހުންނެވެ. ބޭސް ވިއްކާ ފަރާތްތަކަށާއި ބޭސް ގަންނަ ފަރާތްތަކަށްވެސް އޭގައި ހުންނަ އެއްޗެއް ދޭހައެއް ނުވެއެވެ. ލޭބަލްގައިވާ އެއްޗެއް ނޭނގުމުގެ ސަބަބުން އިންސާނުންގެ ޞިއްޙަތަށާއި ތިމާވެށްޓަށް ކިތަންމެ ބޮޑު ގެއްލުމެއްވެސް ލިބިދާނެއެވެ. މި ސަބަބުތަކަށްޓަކައި ބޭސް އެތެރެކުރަން ހުއްދައަށް އެދޭއިރު ދިވެހިބަހުން ލިޔެފައިވާ ފެކްޓް ޝީޓެއް ހުށަހަޅަން ޖެހޭގޮތަށް މި މިނިސްޓްރީން ނިންމައި، އެފެކްޓް ޝީޓްގައި ހިމަނަންޖެހޭ މަޢުލޫމާތުވެސް އާންމުކޮށް ގެޒެޓުކުރުމުގެ އިތުރުން ބޭސް އެތެރެކުރާ ފަރާތްތަކަށްވެސް ފޮނުވާފައިވާނެއެވެ. މި ފެކްޓް ޝީޓުގައި ހިމަނަންޖެހޭ މަޢުލޫމާތުތަކަކީ ނަމޫނާ ލޭބަލެއްގައިވެސް ހުންނަން ލާޒިމުކުރާ މަޢުލޫމާތުތަކެކެވެ. ނަމަވެސް، ބޭސް އެތެރެކުރާ ފަރާތްތަކުން ހުށަހަޅާ ފެކްޓް ޝީޓުތަކުގައި އެހުރިހާ މަޢުލޫމާތެއް ނުހިމަނާކަން ފާގަހަކުރެވެއެވެ. މިފެކްޓް ޝީޓް ހުށަހަޅާ ގޮތަށް މި މިނިސްޓްރީން ނިންމީ ދަނޑުވެރިންނަށް ދޭހަވާ، އެ މީހުންގެ މާދަރީބަހުން ލިޔެފައިވާ ލޭބަލެއް ނުވަތަ ފެކްޓް ޝީޓެއް އެ މީހުންނަށް ލިބޭނެ ގޮތް ހަދައި ދިނުމުގެ މަޤުޞަދުގައެވެ. ނަމަވެސް، އެ މީހުންނަށް އެފެކްޓް ޝީޓް ނުވަތަ ލޭބަލް ނުލިބޭކަމުގެ ޝަކުވާ މި މިނިސްޓްރީއަށް އަބަދުވެސް ލިބެމުންދެއެވެ.
ވީމާ، މި މިނިސްޓްރީން މިހާރު ވަނީ ޕެސްޓިސައިޑްގެ ނަމޫނާ ފެކްޓް ޝީޓެއް ތައްޔާރުކޮށް މި މިނިސްޓްރީގެ ވެބްސައިޓަށް ލައިފައެވެ. 2016 ޖޫން 01 ވާ ބުދަ ދުވަހުން ފެށިގެން ޕެސްޓިސައިޑް އެތެރެކުރުމުގެ ހުއްދައަށް އެދި ހުށަހަޅާ ފޯމު ބަލައިގަނެވޭނީ އިސްވެ ދެންނެވުނު ނަމޫނާ ފެކްޓް ޝީޓުގައި ހިމެނޭ ބައިތައް ފުރިހަމަވާ ފެކްޓް ޝީޓް ހުށަހެޅުމުންނެވެ. އަދި މީގެ އިތުރުން މި މިނިސްޓްރީން މިހާރު ނިންމާފައި ވަނީ އެތެރެ ކުރުމުގެ ހުއްދައަށް އެދި ހުށަހަޅާ ކޮންމެ ޕެސްޓިސައިޑަކާއި ފަރޓިލައިޒަރއަކާއެކު އިނގިރޭސި ބަހުން އޮންނަ އޮރިޖިނަލް ލޭބަލެއްވެސް ހުށަހަޅާ ގޮތަށެވެ. އަދި ނަމޫނާ ފެކްޓް ޝީޓުގައި ހިމެނޭ ބައިތައް/ މަޢުލޫމާތުތައް ފުރިހަމަނުވާ ފެކްޓް ޝީޓް ހުށަހެޅުމުން ނުވަތަ އިނގިރޭސި ބަހުން އޮންނަ ލޭބަލް ހުށަނޭޅުމުގެ ސަބަބުން އެކަންކަން ރަނގަޅު ކުރުމަށް ފުރުޞަތު ދިނުމުގައި ލަސްވާ ލަސްވުމުގެ ނަތީޖާއެއްގެ ގޮތުން ޕެސްޓިސައިޑް އެތެރެކުރާ ފަރާތްތަކަށް ލިބޭ އެއްވެސް ގެއްލުމެއްގެ ޒިންމާއެއް މި މިނިސްޓްރީން ނޫފުލާނެ ވާހަކަ ދެންނެވީމެވެ.
