ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ ނަންބަރު: 2019/R-578 (17 ފެބުރުވަރީ 2019) ގަވާއިދުގެ 4 ވަނަ ނަންބަރުގައި ބަޔާންކޮށްފައިވާ ފަދައިން، އެގެއެއްގެ އިމުގެ މަގާއިވީ ފަޅިން އިމާރާތްކޮށްފައި ހުންނަ ބިނާތަކުން މަގުމައްޗަށް ފެން ފައިބާނެހެން ހިޔާކުރާނަމަ، ފުރާޅުގައި ދިޔަދޮވި ލާންޖެހޭނެއެވެ. އަދި ދިޔަދޮވީގެ ކޮޅުން ހޮޅި ގުޅުމަށްފަހު އެ ހޮޅިލައިންގެ ފެން މަގުމައްޗަށް ނުފައިބާނެހެން ހަދަންޖެހޭނެ ކަމަށްވެސް އެ ގަވާއިދުގައި ބަޔާންކޮށްފައިވެއެވެ.

             އެހެންނަމަވެސް، މިރަށުގެ ބައެއް ގޯތިގޯތީގައި އިމާރާތްކޮށްފައިހުރި ބިނާތަކުން މަގުމައްޗަށް ފެން ފައިބާނެހެން، ދިޔަދޮވި ހަރުނުކޮށް ދޫކޮށްލާފައި ހުންނަކަން ވަރަށް ބޮޑަށް ފާހަގަކުރެވެއެވެ. މިކަމުގެ ސަބަބުން ވާރޭވެހޭ ދުވަސްވަރު މަގުތަކުގައި ފެންބޮޑުވުމާއި، ބިންގަނޑު ޗަކަވެ މަގުތައް ބޭނުންކުރާ އެންމެހައި ފަރާތްތަކަށް ބޮޑެތި ދަތިތަކާ ކުރިމަތިލާންޖެހި، ބައެއް މަގުތަކުގެ ވެލިގަނޑު ކަނޑައިގެންގޮސް މަގުތައް ހަލާކުވަމުންދާކަން ހިތާމައާއެކު ފާހަގަކުރަމެވެ.

          ވީމާ، މިއަދުން ފެށިގެން 45 (ސާޅީސް ފަހެއް) ދުވަހުގެ ތެރޭގައި، އެފަދަ އެންމެހައި ގެތަކުގެ ފުރާޅުތަކުން މަގުމައްޗަށް ފެން ނުފައިބާނެހެން ދިޔަދޮވި ހަރުކޮށް، ހޮޅިގުޅައި ނިންމެވުމަށް އެދި އާންމުކޮށް އަންގައި އިޢުލާނު ކުރީމެވެ.