މި މިނިސްޓްރީގެ ނަންބަރު 491/491/2025/178(IUL) (19 ޑިސެންބަރު 2025) އިޢުލާނާއެކު ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ "ހުޅުމާލެ ތިން ވަނަ ފިޔަވަހީގެ އައު ލޭންޑް ޔޫސް ޕްލޭން" ގެ ދަށުން ހުޅުމާލެ ތިން ވަނަ ފިޔަވަހީގެ ލޭންޑް ޔޫސް ޕްލޭންއަށް ގެނެވުނު ބަދަލާގުޅިގެން، ކުރިން ބިންވެރިޔާ ސްކީމުގެ ދަށުން ހުޅުމާލެ ތިން ވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ވަނީ ބަދަލުވެފައެވެ. މި ބަދަލާއި ގުޅިގެން މިނިސްޓްރީ ގެ ނަންބަރު 491/491/2025/177(IUL) (19 ޑިސެންބަރު 2025) އިޢުލާނުގެ ދަށުން ހުޅުމާލެ ތިންވަނަ ފިޔަވަހިން ގޯތި ލިބިފައިވާ ފަރާތްތަކުގެ މެދުގައި 20 ޑިސެންބަރު 2025 ވީ ހޮނިހިރު ދުވަހު ވަނީ ގުރުއަތު ނަގާފައެވެ.

ދެންނެވުނު ބަދަލާ ގުޅިގެން، ގޯތި ލިބޭ ފަރާތްތަކަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓްރީ" ބާޠިލުކޮށް، އައު ބަންޑާރަގޯތީގެ ރަޖިސްޓަރީ ދޫކުރުމަށް ވަނީ ހަމަޖެހިފައެވެ. އަދި މިހާތަނަށް ގޯތީގެ ރަޖިސްޓަރީ ޙަވާލުކޮށްފައިނުވާ ފަރާތްތަކަށް ގޯތީގެ ރަޖިސްޓަރީ ހަވާލުކުރުމާއި ގޯތި ޙަވާލުކުރުމުގެ އެއްބަސްވުމުގެ ސޮއިކުރުމަށްވެސް ހަމަޖެހިފައިވާކަމުގައި ދަންނަވަމެވެ.

އެހެންކަމުން، 26 ޖަވަނަރީ 2026 ވީ ހޯމަ ދުވަހުން ފެށިގެން 15 މާރިޗު 2026 ވަނަ ދުވަހުގެ ނިޔަލަށް "ހިޔާވެހި ޕޯޓަލް" މެދުވެރިކޮށް "ބަންޑާރަ ގޯތީގެ ރަޖިސްޓްރީ" އާ ޙަވާލުވުމަށް އެޕޮއިންޓްމަންޓްއަށް އެދުމުގެ ފުރުޞަތު ވަނީ ހުޅުވާލެވިފައެވެ.

އަދި މި މުއްދަތުގެ ތެރޭގައި ގުޅިފަޅުގެ އައު ލޭންޑް ޔޫސް ޕްލޭނަށް އައި ބަދަލާ ގުޅިގެން، މިއަދާ ހަމައަށް އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ޙަވާލުވެފައި ނުވާ ފަރާތްތަކަށް އިތުރު ފުރުޞަތެއް ދިނުމަށް ވަނީ ހަމަޖެހިފައިވާކަމުގައި ދަންނަވެމެވެ. އެހެންކަމުން، ގުޅިފަޅުގެ އެއްބަސްވުމުގައި ސޮއިކޮށް ރަޖިސްޓްރީއާ ޙަވާލުވެފައިނުވާ ފަރާތްތަކަށްވެސް 26 ޖަނަވަރީ 2026  ވީ ހޯމަ ދުވަހުން ފެށިގެން 15 މާރިޗު 2026 ވަނަ ދުވަހުގެ ނިޔަލަށް ހިޔާވަހި ޕޯޓަލް މެދުވެރިކޮށް އެޕޮއިންޓްމަންޓަށް އެދި ހުށަހެޅުމުގެ ފުރުޞަތު ހުޅުވާލެވިފައިވާކަމުގައި ދަންނަވަމަވެ.

އެޕޮއިންޓްމަންޓަށް އެދި ހުށަހަޅާނީ ހިޔާވަހި ޕޯޓަލް (hiyaavehi.housing.gov.mv) މެދުވެރިކޮށެވެ.  

އެ ޕޮއިންޓްމަންޓްއަށް އެދި ހުށަހަޅާއިރު އަންނަނިވި ލިޔެކިޔުންތައް "ހިޔާވެހި ޕޯޓަލް" އަށް ހުށަހަޅަންވާނެއެވެ.

1. އައު "ބަންޑާރަ ގޯތި ދޫކުރުމުގެ އެއްބަސްވުން" ގައި ހެކިވެރިއެއްގެ ގޮތުގައި ސޮއިކުރުމަށް ޙާޟިރުވާނެ 01 (އެކެއް) ފަރާތުގެ އައިޑީ ކާޑު ކޮޕީ. 
2. ގޯތި ލިބޭ ފަރާތް/ފަރާތްތަކުގެ ބަދަލުގައި އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ޙަވާލުވުމަށް އެހެން ފަރާތެއް ޢައްޔަނުކުރާނަމަ، ހިޔާވަހި ޕޯޓަލްގައިވާ ޕަވަރަ އޮފް އެޓަރނީގެ ނަމޫނާއާ އެއްގޮތަށް ތައްޔާރުކޮށް އެފަރާތެއް ޢައްޔަނުކޮށްފައިވާކަން އަންގައިދޭ ޝަރުޢީ ކޯޓެއްގައި ރަޖިސްޓަރީކޮށްފައިވާ ނުވަތަ ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވަރ އޮފް އެޓަރނީއާއި، ޢައްޔަނުކޮށްފައިވާ އެޓަރނީގެ އައިޑީ ކާޑުގެ ކޮޕީ. (ނޮޓޮރައިޒްކޮށްފައިވާ ލިޔުމެއްނަމަ، ނޮޓަރައިޒޭޝަން ސެޓިފިކެޓް ހުށަހަޅަންވާނެއެވެ.)
3. ގޯތި ލިބޭ ފަރާތުން ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުން" ގެ ކޮޕީ.
4. ގޯތި ލިބޭ ފަރާތަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓަރީ" ގެ ކޮޕީ.

       އެޕޮއިންޓްމަންޓް ހަމަޖެހިފައިވާ ގަޑިއަށް ޙާޟިރުނުވާ ފަރާތްތަކުގެ އެޕޮއިންޓަމަންޓް ކެންސަލްކުރެވޭނެއެވެ. އެޕޮއިންޓްމަންޓަށް ހާޟިރުވާއިރު، ތިރީގައި ބަޔާންކޮށްފައިވާ ލިޔެކިޔުންތައް ގެންނަންވާނެއެވެ.  

1. ގޯތި ލިބޭ ފަރާތް/ފަރާތްތަކުގެ އައިޑީކާޑުގެ ކޮޕީ

2. ޕަވަރ އޮފް އެޓަރނީގެ ދަށުން ޙާޟިރުވާ ފަރާތެއްނަމަ، ޕަވަރ އޮފް އެޓަރނީގެ އަސްލު އަދި ޕަވަރ އޮފް އެޓަރނީ ލިބިފައިވާ ފަރާތުގެ އައިޑީ ކާޑު. ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވަރ އޮފް އެޓަރނީއެއް ނަމަ، ނޯޓަރައިޒޭޝަން ސެޓިފިކެޓުގެ އަޞްލު
3. ގޯތި ލިބޭ ފަރާތުން ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުން" ގެ އަސްލު.
4. ގޯތި ލިބޭ ފަރާތަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓަރީ" ގެ އަސްލު.

އެޕޮއިންޓްމަންޓްއަށް އެދި ހުށަހަޅާ ފަރާތްތަކަށް "ހިޔާވެހި ޕޯޓަލް" މެދުވެރިކޮށް އަދި އެފަރާތްތަކުގެ ފޯނު ނަންބަރަށް އެސް.އެމް.އެސްގެ ޒަރީއާއިން "ބަންޑާރަ ގޯތީގެ ރަޖިސްޓަރީ" އާއި "ބަންޑާރަ ގޯތީގެ އެއްބަސްވުން" އާއި ޙަވާލުވުމަށް ހާޟިރުވާންޖެހޭ ގަޑި އަދި ތަން އަންގާނެ ކަމުގައި ދެންނެވީމެވެ.

       ވީމާ، މިކަން އާންމުކޮށް އަންގާ އިޢުލާންކުރީމެވެ.