"ބޯހިޔާވަހިކަން އެންމެނަށް" ސްކީމުން މާލޭގައި ދިރިއުޅޭ ރައްޔިތުންނަށް ދިރިއުޅުމަށް ގޯއްޗާއި ފްލެޓަށް ކުރިމަތިލާން ހުޅުވާލާފައިވާތީ، ގިނަ އަދަދެއްގެ ރައްޔިތުން ކައުންސިލުން ލިޔުން ހޯދުމަށް އެދި ހުށަހަޅަމުންދާތީ ދަންނަވަމެވެ.

           މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ނަމްބަރު 36-ޖީ/2025 އަދި 37-ޖީ/2025 އުސޫލުގެ ދަށުން އެޕްލިކޭޝަން މަރުހަލާގައި ހުށަހަޅަން ޖެހޭ ލިޔެކިޔުންތަކުގެ ތެރޭގައި ޖަދުވަލު 2 ގެ 3.4 ގައި ވާ ގޮތަށް ދަޢުލަތުގެ އިދާރާއަކުން (އެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކާއި މަޢުލޫމާތުން، މާލޭގައި ދިރިއުޅެފައިވާ މުއްދަތު ސާބިތުވާކަމުގެ ލިޔުމެއް) ހުށަހެޅޭނެ ކަމަށް އިން ނަމަވެސް މަޑަވެލީގައި ރަށްވެހިފައިވާ މާލޭގައި ދިރިއުޅޭ ފަރާތްތަކުގެ ރެކޯޑްތައް، ދިރިއުޅުން ބަދަލުކުރި އަހަރާއި އެކު މިކައުންސިލުން ރަސްމީ ސިފައެއްގައި ކުރިން ބަލަހައްޓާފައިނުވާތީ، އެފަރާތްތަކުން މާލޭގައި ދިރިއުޅެފައިވާ މުއްދަތު ކަށަވަރުކޮށްދީ އެފަދަ އެއްވެސް ލިޔުމެއް ކައުންސިލުން ދޫކުރެވޭނީ މާލޭގައި ނުވަތަ ރަށުން ބޭރުގައި ދިރިއުޅުނު މުއްދަތު ކައުންސިލަށް ކަށަވަރުކޮށްދިނުމަށް ލިޔެކިޔުންތައް ހުށަހެޅުމުން، ހުށަހަޅާ ލިޔެކިޔުންތަކުގެ އަހަރުތަކަށް ބެލުމަށްފަހު ހަމަ އެކަނި އެ އަހަރުތަކަށްކަމުގައި ދަންނަވަމެވެ.

           މިހެންވެ މިކަން ޢާއްމުކޮށް އިޢުލާންކުރީމެވެ.