މި މިނިސްޓްރީގެ ނަންބަރު  491/491/2025/52(IUL) (10 ޖުލައި 2025) އަދި 491/491/2025/141(IUL) (19 އޮކްޓޫބަރު 2025) އިޢުލާނާއާ ހަވާލާދީ ދަންނަވަމެވެ. 

ބިންވެރިޔާ ސްކީމްގެ ދަށުން ގުޅިފަޅުން ގޯތި ލިބިލައްވާފައިވާ ފަރާތްތަކަށް އައު ރަޖިސްޓަރީ އަދި އެގްރީމަންޓްގައި ސޮއި ކުރުމަށް ދިގު މުއްދަތެއް ދެވިފައިވާކަން ފާހަގަކުރަމެވެ. އަދި މި މުއްދަތުގެ ތެރޭގައި އެއްބަސްވުން އަދި ރަޖިސްޓަރީއާ ޙަވާލުވެފައިނުވާ ފަރާތްތަކަށް އެގްރީމަންޓް އަދި ރަޖިސްޓަރީއާ ހަވާލުވުމަށް ހިޔާވަހި ޕޯޓަލް މެދުވެރިކޮށް އެޕޮއިންޓްމަންޓް ހެދުމަށް ހުޅުވާލެވުނު ފުރުޞަތު   06 ނޮވެންބަރު 2025 ގެ ނިޔަލަށް އިތުރު ކުރެވިފައިވާކަމުގައި ދަންނަވަމެވެ. މިއީ ގުޅިފަޅު އެއްބަސްވުން އަދި ރަޖިސްޓަރީއާ ޙަވާލުވުމަށް ދެވޭ ފަހު ފުރުޞަތު ކަމުގައިވެސް ދެންނެވީމެވެ. މި މުއްދަތުގެ ތެރޭގައި އެޕޮއިންޓްމަންޓަށް އެދިފައިނުވާ ފަރާތްތަކަށް އެއްބަސްވުމުގައި ސޮއިކުރުމުގެ ފުރުޞަތު ނުދެވޭނެ ވާހަކަ ދަންނަވަމެވެ.

އެޕޮއިންޓްމަންޓަށް އެދިލައްވާނީ ހިޔާވަހި ޕޯޓަލް (hiyaavehi.housing.gov.mv) މެދުވެރިކޮށެވެ.  

އެ ޕޮއިންޓްމަންޓްއަށް އެދިލައްވާއިރު އަންނަނިވި ލިޔެކިޔުންތައް "ހިޔާވެހި ޕޯޓަލް" އަށް ހުށަހެޅުމަށް ދަންނަވަމެވެ. 

1. އައު "ބަންޑާރަ ގޯތި ދޫކުރުމުގެ އެއްބަސްވުން" ގައި ހެކިވެރިއެއްގެ ގޮތުގައި ސޮއިކުރުމަށް ޙާޟިރުވާނެ 01 (އެކެއް) ފަރާތުގެ އައިޑީ ކާޑު ކޮޕީ. 
2. ގޯތި ލިބޭ ފަރާތް/ފަރާތަކުގެ ބަދަލުގައި އެހެން ފަރާތަކުން، އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ޙަވާލުވާނަމަ، ހިޔާވަހި ޕޯޓަލްގައިވާ ޕަވަރަ އޮފް އެޓަރނީގެ ނަމޫނާއާ އެއްގޮތަށް ޝަރުޢީ ކޯޓެއްގައި ރަޖިސްޓަރީކޮށްފައިވާ ނުވަތަ ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވަރ އޮފް އެޓަރނީއާއި، އެޓަރނީގެ އައި.ޑީ.ކާޑުގެ ކޮޕީ.
3. ގޯތި ލިބޭ ފަރާތުން ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުން" ގެ ކޮޕީ.
4. ގޯތި ލިބޭ ފަރާތަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓަރީ" ގެ ކޮޕީ.

       އެޕޮއިންޓްމަންޓް ހަމަޖެހިފައިވާ ގަޑިއަށް ޙާޟިރުނުވާ ފަރާތްތަކާއި، ތިރީގައި ބަޔާންކޮށްފައިވާ ލިޔެކިޔުންތައް ފުރިހަމަނުކޮށް ޙާޟިރުވާ ފަރާތްތަކަށް އެޕޮއިންޓްމަންޓް ކެންސަލްކުރެވޭނެއެވެ.

1. ގޯތި ލިބޭ ފަރާތް / ފަރާތްތަކުގެ ދިވެހިރައްޔިތެއްކަން އަންގައިދޭ ކާޑު
2. ޕަވަރ އޮފް އެޓަރނީގެ ދަށުން ޙާޟިރުވާ ފަރާތެއްނަމަ، ޕަވަރ އޮފް އެޓަރނީގެ އަސްލު އަދި ޕަވަރ އޮފް އެޓަރނީ ލިބިފައިވާ ފަރާތުގެ އައިޑީ ކާޑު. ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވަރ އޮފް އެޓަރނީއެއް ނަމަ، ނޯޓަރައިޒޭޝަން ސެޓިފިކެޓް
3. ގޯތި ލިބޭ ފަރާތުން ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުން" ގެ އަސްލު.
4. ގޯތި ލިބޭ ފަރާތަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓަރީ" ގެ އަސްލު.

އެޕޮއިންޓްމަންޓްއަށް އެދި ހުށަހަޅާ ފަރާތްތަކަށް "ހިޔާވެހި ޕޯޓަލް" މެދުވެރިކޮށް އަދި އެފަރާތްތަކުގެ ފޯނު ނަންބަރަށް އެސް.އެމް.އެސްގެ ޒަރީއާއިން "ބަންޑާރަ ގޯތީގެ ރަޖިސްޓަރީ" އާއި "ބަންޑާރަ ގޯތީގެ އެއްބަސްވުން" އާއި ޙަވާލުވުމަށް ހާޟިރުވާންޖެހޭ ގަޑި އަދި ތަން އަންގާނެ ކަމުގައި ދެންނެވީމެވެ.

       ވީމާ، މިކަން އާންމުކޮށް އަންގާ އިޢުލާންކުރީމެވެ.