އެކްސްޕްރެޝަން އޮފް އިންޓްރެސްޓް

ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާބެހޭ ގަވާއިދު 2012 (ނަންބަރު:2012/R-27)ގެ ދަށުން އެންވަޔަރަންމަންޓަލް ޕްރޮޓެކްޝަން އޭޖެންސީއަށް ހުށަހަޅާ ތިމާވެށްޓާބެހޭ ރިޕޯޓްތައް ބަލައި މުރާޖަޢާކުރާނެ ފަރާތެއް ހޯދުން

ބޭނުންވާ އަދަދު: 15

މި އޭޖެންސީ އިން ތަންފީޒުކުރަމުންދާ ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދު 2012 (ނަންބަރު:2012/R-27)ގެ ދަށުން މި އޭޖެންސީ އަށް ހުށަހަޅާ ތިމާވެށްޓާބެހޭ ރިޕޯޓުތަކަކީ މަތީގައި ދެންނެވުނު ގަވާއިދު 2012ގެ 13 ވަނަ މާއްދާގެ ދަށުން ގޮތެއް ނިންމުމުގައި މުސްތަޤިއްލު މުރާޖިރުންގެ މުރާޖަޢާއަށް ބިނާކޮށް އެއަށް ގޮތެއް ނިންމަންޖެހޭ ރިޕޯޓުތަކެކެވެ. ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދަށް ގެނެވުނު އިޞްލާޙުގެ ސަބަބުން ކުރިން މުރާޖަޢާ ކުރަމުންގެންދިޔަ އުސޫލާއި މުއްދަތުތަކަށް ވަނީ ބަދަލު އައިސްފައެވެ.

މުރާޖިރުން މަސައްކަތް ކުރައްވަން ގަވާއިދު ލާޒިމުކުރަނީ ވަކި ފަރާތަކަށް ބުރަވުމެއްނެތި، ޤާނޫނު އަސާސީގެ 22 ވަނަ މާއްދާއިން ދައުލަތުގެ މައްޗަށް ލާޒިމުކުރާ ދެމެހެއްޓެނިވި ތަރައްޤީ ދިމާއަށް ޕްރޮޖެކްޓަށް މިސްރާބު ކުރެވުމާއި، ރިޕޯޓް އެކުލަވާލުމަށް ދެވިފައިވާ ޓީ.އޯ.އާރާ އެއްގޮތަށް ރިޕޯޓް ތައްޔާރު ކުރެވިފައިވޭތޯ ކަށަވަރުކުރުމާއި ޢިލްމީ އަދި ފަންނީ ގޮތުން އެ ރިޕޯޓް ވަޒަންކުރުމެވެ.

މުރާޖަޢާކުރާ ކޮންމެ ރިޕޯޓަކަށް މުރާޖަޢާ ކުރުމުގެ ދަރަޖަތަކަށް ބިނާކޮށް އުޖޫރައެއް ދެވޭނެއެވެ.  

ޝަރުޠު:

• ސަރުކާރުން ޤަބޫލުކުރާ ފެންވަރުގެ ޔުނިވަރސިޓީއަކުން ތިމާވެށީގެ ދާއިރާއަކުން ދަށްވެގެން ފުރަތަމަ ޑިގުރީ ހާސިލުކޮށްފައިވުން. (ތިމާވެށީގެ ދާއިރާއިން ހާސިލުކޮށްފައިވާ ސަނަދެއް ކަމަށް ބެލެވޭނީ އެ ސަނަދުގެ މައިގަނޑު ދާއިރާއަކީ ތިމާވެށީގެ ދާއިރާ ކަމުގައިވާނަމަ) އަދި،
• ތިމާވެށި ބެލެހެއްޓުމާގުޅޭ ދާއިރާއެއްގައި ސީދާކޮށް ނުވަތަ ނުސީދާކޮށް މަދުވެގެން 5 (ފަހެއް) އަހަރު ވަންދެން މަސައްކަތްކޮށް ތަޖުރިބާ ލިބިފައިވުން. ސީދާކޮށް ކަމުގައި ބެލެވޭނީ ތިމާވެށީގެ ރިޕޯޓްތައް މުރާޖަޢާ ކުރުމުގެ ތަޖުރިބާހުރި ފަރާތެއް ކަމުގައިވާނަމަ. ނުސީދާކޮށް ކަމުގައި ބެލެވޭނީ ތިމާވެށީގެ ދާއިރާގައި މަސައްކަތްކޮށްފައިވާ ފަރާތެއް ކަމުގައިވާނަމަ. ކިޔެވުމަށް ހޭދަކުރި މުއްދަތު ތަޖުރިބާ ތެރޭގައި ނުގުނޭނެއެވެ. އަދި،
• ސިޔަސީ މަޤާމެއް ފުރުއްވަމުންދާ ފަރާތަކަށް ނުވުން.

ހުށަހަޅަންޖެހޭ ލިޔުންތައް:

• މަސައްކަތުގެ ތަޖުރިބާ ދެނެގަތުމަށް، މަސައްކަތްކޮށްފައިވާ އިދާރާތަކުން ދޫކޮށްފައިވާ ލިޔުންތަކުގެ އަސްލާ އެއްގޮތްކަން އަންގައިދޭ ކޮޕީ.
• ލިބިފައިވާ ތައުލީމީ ސެޓުފިކެޓުތަކުގެ (އެކްރެޑިޓް ކުރެވިފައިވާ) ކޮޕީ.
• އައިޑީ ކާޑު ކޮޕީ.
• ވޭތުވެދިޔަ 5 އަހަރުގެ އެމްޕްލޮއިމަންޓް ހިސްޓްރީއާއި ތަމްރީނާއި ތަޖުރިބާ އެނގޭނެހެން ހުށަހަޅާ ފަރާތުގެ ވަނަވަރު.

މާކްސް ދެވޭނެ ކްރައިޓީރިއާ:

ސަނަދަށް %50

ސީދާ ތަޖުރިބާއަށް %30

ނުސީދާ ތަޖުރިބާއަށް %20

• ސުންގަޑި: 04 އޮކްޓޫބަރު 2015 ވާ އާދީއްތަ ދުވަހުގެ 12:00 ގެ ކުރިން އެންވަޔަރަންމަންޓަލް ޕްރޮޓެކްޝަން އޭޖެންސީއަށް.
• އިތުރު މަޢުލޫމާތު ސާފުކުރެއްވުމަށް މި އޭޖެންސީގެ ނަންބަރު 3335949 އަށް ގުޅުއްވުން އެދެމެވެ.

01 ޛުލްޙިއްޖާ 1436