ޕްރޮޖެކްޓް ނަންބަރު PC/308/2025/01

އަމިއްލަތަކެތީގައި ފުޓްސަލްދަނޑު މަރާމާތުކޮށްދޭނެ ފަރާތެއް ހޯދަން ބޭނުންވެއެވެ.

ފެންސް މަރާމާތުކުރުން

1. ދަނޑުގެ ދެކުނު ފެންސާއި ފާރު އަދި ހުޅަނގު ފެންސާއި ފާރު ނެގުން.
2. ފެންސުން ނަގާ ފެންސްނެޓް ރީތިކޮށް އޮޅާ ކައުންސިލުން ދައްކާ ތަނެއްގައި ބެހެއްޓުން.
3. ފެންސުން ނަގާ ހޮޅިތައް ކައުންސިލުން ދައްކާތަނަކަށް ޖަމާކުރުން.
4. ގައުކުނޑިތައް ކައުންސިލުން ބުނާ ސަރަޙައްދަކަށް އުކާލުން.
5. ދަނޑުގައި މިހާރު އޮތް ޓާފް ނަގައި ކުނިކޮށްޓަށް ގެންދިއުން.
6. ދަނޑުގެ އިރު އުތުރު ލައިޓްޕޯސްޓް ފިޔަވާ ހުރިހާ ޕޯސްޓެއް ނަގައި ބުޑުތަކުގައި ހުރި ބޯލްޓްތައް ބުޑާއި އެއްހަމައަށް ބުރިކުރުމާއި ލައިޓް ޕޯސްޓްތައް ރިލޮކޭޓްކުރުން. އެނެކްސް 1 ގައިވާ ކުރެހުމާއި އެއްގޮތަށް ބުޑުތައް ކޮންރިޓްކޮށް ލައިޓް ޕޯސްޓްޖަހައި ކަރަންޓް ކޭބަލް އަޅައި ލައިޓްތައް ހަރުކުރުން. ދަނޑުގައި ހުންނާނީ 5 ލައިޓް ޕޯސްޓެވެ. ދަނޑުގެ ހުޅަނގުމެދު ޕޯސްޓްގެ ބަދަލުގައި ލައިޓް ހަރުކުރާނީ ރޮސްޓްރަމްގައެވެ. (400 ވޯޓުގެ 10 ލައިޓް އަދި 1000 ވޯޓުގެ 2 ލައިޓް)
7. އެނެކްސް 1 ގައިވާ ކުރެހުމާއި އެއްގޮތަށް ފައުންޑޭޝަނާއި ތަނބުތައް ކޮންކްރިޓްކުރުމާއި، 2އިންޗި ދަގަނޑު ހޮޅިލައި ފެންސްގެ ތަނބުތައް ކޮންކްރިޓްކޮށް، މިހާރު ހުރި ފާރާ އެއް އުސްމިނަށް ރާނާ ބީމް ކޮންކްރިޓްކުރުމާއި ދެފަރާތުން ސިމެންތިޖަހައި ފެންސްގައި އެކަމަށް ޚާއްޞަ ދާޖެހުން. ފެންސްގައި މިހާރު ހުރި ދައު ބޭނުންކުރެވިދާނެއެވެ. ފެންސްގެ ދެހޮޅި ދެމެދު އަޅާނީ ދޮޅުއިންޗި ދަގަނޑު ހޮޅިއެވެ. ދާ ޖަހަންވާނީ 6 އެމްއެމް ފަލަނަރުން ގަތާފައިވާ، ފެހިކުލައިގެ ފެންސް ދަލެވެ. ( ފެންސްގެ ދިގުމިން: 138 ފޫޓް ، ފުޅާމިން: 92 ފޫޓް، އަދި ފެންސްގެ އުސްމިނަކީ 11 ފޫޓެވެ.) (ފެންސްގެ މަސައްކަތްތަކުގައި އާއި ފެންސް ހޮޅިތައް ޖެހުމުގައި ބަލާނީ މިހާރު ހުރި ފެންސްގެ މިންތަކާއި އިންތަކަށެވެ.)
8. ފެންސްގެ ކޮލަމްތަކުގައި 150x200މމ ހުންނަންވާނެއެވެ.
9. އުތުރު ފެންސަށް އިތުރުވާ 15 ފޫޓާއި އިރުމަތީ ފެންސަށް އިތުރުވާ 30 ފޫޓުގެ ފާރާއި ފެންސް، މިހާރު ހުރި ފެންސާއި ގުޅިގެން ދާނޭހެން ފެންސްގެ މަސައްކަތްތައް ނިންމުން.
10. ފެންސްގެ ދެކުނުކޮޅާއި އުތުރުކޮޅުގައި ތޭރިޖެހުން. ތޭރިޖަހާނީ ބައިއިންޗި ދަގަނޑު ހޮޅި، ފެންސްގެ އެތެރެއިން، މަތިން ތިރިއަށް ރަހަޔަށް ވެލްޑްކޮށްގެންނެވެ. ތޭރީގައި ބޭނުންކުރާ ހޮޅިތަކުގެ މަތީކޮޅު ބައްދަންވާނެއެވެ.
11. ފެންސް ދައު ހޮޅިތަކުގައިދާ ބަންނަންވާނީ އެކަމަށް ޚާއްސަ ނަރުންނެވެ. (ދަލުގެ އަރިމަތިތައް ހުންނަންވާނީ ކޮންމެ ގޮޅިއެއްވެސް ހަރުލާނެހެން އައްސާފައެވެ. އަދި ދަނޑުގެ ވަށައިގެން ހުރިހާ ހޮޅިއެއްގައިވެސް ދާގަނޑު ހުންނަންވާނީ ހަރުކޮއްފައެވެ.)
12. ދަނޑުގެ ހުޅަނގުދެކުނު ކަނާދިމާލުން ފާރާއި ފެންސުން 3 ފޫޓް 7 ފޫޓުގެ ދޮރެއް ކަނޑައި ދަގަނޑު ހޮޅިން ދޮރުފަތް ހަދާ ހަރުކުރުމާއި މިހާރު ހުރި ގޭޓް ނަގައި ދަނޑުގެ ހުޅަނގުއުތުރުން ބޮޑުތަކުރުފާނުމަގަށްވާގޮތަށް ހަރުކުރުން.
13. މިހާރު ހުރި ކާނުތައް ސާފުކުރުމާއި ދަނޑުގެ އިރުމަތީ ފަރާތުން އިތުރުވާ ސަރަޙައްދަށް 3 ކާނު އިތުރުކޮށް އެއްކާނު އަނެއްކާނާއި ގުޅާލުމާއިއެކު މިހާރު ހުރި ކާނުތަކާއި ގުޅާލުން. ކާނުތައް ގުޅާލުމަށް ބޭނުންކުރާނީ 4 އިންޗި އެސްލޯނު ހޮޅިއެވެ.
14. ދަނޑުގެ ވަށާފާރުގައި ދެފަރާތުން ކުލަލައި، ފެންސްގެ ހޮޅިތަކުގައި ދަވާދުލުން. ތަނބުތަކާއި ބީމްގެ ކުލަ ތަފާތު ކުރަންވާނެއެވެ. ކުލަކޯޑުތައް އިޢުލާނާއިއެކު ހިމަނާފައިވާނެއެވެ. ވަށާފާރުގައި ލާންވާނީ ބޭރުފާރުގައިލުމަށް ޚާއްޞަކޮށްފައި ހުންނަ (އެކްސްޓީރިއަރ) ކުލައެކެވެ.
15. ގޯލްތަކާއި ބެންޗްތަކުގައި ހުދު ދަވާދުލުން.

ރޮސްޓްރަމް ޢިމާރާތްކުރުން

1. އެނެކްސް 1 ގައިވާ ކުރެހުމާއި އެއްގޮތަށް ފައުންޑޭޝަނާއި ތަނބުތަކާއި ސްލެބް ކޮންކްރިޓްކުރުމާއިއެކު ފާރުތައް ރާނާ، މަތީގައި ބީމް ކޮންކްރިޓްކޮށް ލަކުޑި ފަތިން ފައިދޮށްއެޅުމާއި ހިޔާކުރުމާއި، ފާޚާނާތަކުގެ ފެންވައިރިނާއި މުޅި ޢިމާރާތުގެ ކަރަންޓްވައިރިން އަޅާ، ގްރައުންޑް ފްލޯގައި ތަޅުންއެޅުމާއި ތަޅުމުގައި މުށިޖަހައި ފާޚާނާތަކުގެ ފާރުތަކުގައި މުށިޖަހައި ދެބުރީގެ ރެސްޓްރޮމް ޢިމާރާތްކޮށް ނިންމުން.
2. ރޮސްޓްރަމްގެ ހަތަރު ކަނުގައި 3×3 ފޫޓުގެ 4 ބުޑު އަޅަންވާނެއެވެ. އަދި މެދު ދެބުޑުގައި 2×2 ފޫޓް ހުންނަންވާނެއެވެ. ބުޑުތައް އަޅާނީ ބިމުގެ ސަތަހައިން ފެށިގެން 2 ފޫޓް އަޑީގައެވެ.
3. ފައުންޑޭޝަނުގައި 200x300މމ ހުންނަންވާނެއެވެ.
4. ކޮލަމްތަކުގައި 300×300މމ ހުންނަންވާނެއެވެ.
5. ފަސްޓްފްލޯރ ބީމްގައި 300×200މމ ހުންނަންވާނެއެވެ.
6. ފައުންޑޭޝަނާއި ކޮލަމްތަކާއި ބީމްތަކުގައި 5 އިންޗިން ރިންގްއަޅަންވާނެއެވެ.
7. ސްލެބްގެ ބޮޑުމިނަކީ 20×12 ފޫޓެވެ.
8. ސްލެބްގެ ބޯމިނަކީ 130މމ އެވެ. ސްލެބްގެ ނެޓު ގަތާނީ 10މމގެ ދަގަނޑުންނެވެ. ސްލެބްގައި 2 ނެޓު އަޅަންވާނެއެވެ.
9. ސްލެބުގެ ދެވަނަ ނެޓު އަޅާނީ ވަށާ ބެރިން ފެށިގެން 2 ފޫޓުގެ ފުޅާމިނަށެވެ. ކަވަރު ގަލުގައި 20މމ ހުންނަންވާނެއެވެ.
10. ރޮސްޓްރަމްގެ ބުޑުތަކާއި ފައުންޑޭޝަނާއި ތަނބުތަކާއި މަތީ ބީމަށް ލާނީ 12މމ ގެ 4 ދަގަނޑެވެ. އަދި ކޮންކްރިޓް ސްލެބް ނެޓުގައި ބޭނުންކުރާނީ 10މމގެ ދަގަނޑެވެ.
11. ދެފާޚާނާގެ މެދުފާރާއި ސްލެބާއި ދެމެދު 4 އިންޗީގެ ގެޕެއް ދޫކުރަންވާނެއެވެ.
12. ފާޚާނާތަކާ ސްޓޯރ ރޫމްގައި ޕީވީސީ ދޮރާއި ދޮރުފަތް އަޅުވައި ތަޅުހަރުކުރުން.
13. ފަސްޓް ފްލޯރއަށް ވަންނަ ދޮރާއި ދޮރުފަތް އަދި ޗޭންޖިންގ ރޫމްތަކުގެ ދޮރާއި ދޮރުފަތް އެލްމިނިއަމުން ހަދާ ހަރުކުރުމާއި ތަޅުހަރުކުރުން.
14. ސިޑީގައި މަދުވެގެން 13 ހަރުފަތް ހިމަނަންވާނެއެވެ.
15. އެނެކްސް 1 ގައިވާ ކުރެހުމާއި އެއްގޮތަށް ސިޑިހަދާ ދަވާދުލުން.
16. ސިޑީގެ ހަރުފަތްތައް ހަރުކުރާނީ 4 އިންޗި ދަގަނޑު ހޮޅިއެއްގައެވެ.
17. ހަރުފަތްތައް ހަދާނީ 2އިންޗި އޭންގަލް ދަގަނޑުންނެވެ. އަދި ހަރުފަތްތައް ހަރުކުރާނީ 2އިންޗި ލަކުޑިފިލައެވެ.
18. ސިޑީގެ ފުޅާމިނަކީ 3ފޓއެވެ.
19. ސިޑީގެ އިރުމަތީ ފަރާތުގައި 1އިންޗީގެ ދަގަނޑު ހޮޅިން ސިޑީގެ ފެންސް ޖަހަންވާނެއެވެ. ފެންސްގެ އުސްމިނަކީ  އެވެ.
20. ހަރުފަތްތަކުގެ އުސްމިނުގައި 150މމ އަދި ހަރުފަތުގެ ފުޅާމިނުގައި 200މމ ހުންނަންވާނެއެވެ.
21. ފާރުތަކުގެ އެތެރެއާއި ބޭރުގައި ސީލަރާއި ކުލަލުން. ކުލަ ކޯޑުތައް އެނެކްސް 1ގައި ހިމެނިފައިވާނެއެވެ.
22. ފާޚާނާގައި ހުންނަންޖެހޭ ތަކެތި: ފާޚާނާސެޓް، މުސްލިމް ޝަވަރު، މޫނުދޮންނަ ތައްޓާއި އިސްކުރު އަދި ފެން ނެގުމަށް ވަކި އިސްކުރެއް.

ކަރަންޓް ވައިރިން

1. ވައިރިން އަޅާއިރު 4 އިންޗި ހައިޕްރެޝަރ އެސްލޯނު ހޮޅިއަށް ކޭބަލް ލުމަށްފަހު ވަޅުލުން.
2. ލައިޓްތަކަށް ކޭބަލްއެޅުމުގައި މިހާރު ހުރި ކޭބަލް ބޭނުންކުރެވިދާނެއެވެ. އަދި ލައިޓްތަކަށް އަލަށް އަޅަންވާނީވެސް 44ގެ ޓޫކޯ ކޭބަލެވެ.
3. ރެސްޓްރޮމްގެ ކަރަންޓް ވައިރިން: 4 ސީލިންގ މައުންޓް އޮބިޓަލް ފޭން، 4 ސީލިންގމައުންޓް ޑޭލައިޓް، 15އޕގެ 2 ސޮކެޓް، 13އޕގެ 4 މަލްޓި ސޮކެޓް.
4. ޕްރެސްރޫމްގެ ކަރަންޓް ވައިރިން: 2 ސީލިންގމައުންޓް އޮބިޓަލް ފޭން، 13އޕގެ 6 މަލްޓިސޮކެޓް، 15އޕގެ 1 ސޮކެޓް، 4 ސީލިންގމައުންޓް ޑޭލައިޓް.
5. ދެޗޭންޖިންގ ރޫމުގެ ކަރަންޓް ވައިރިން: 2 ސީލިންގ މައުންޓް ފަންކާ، 15އޕ 2 ސޮކެޓް، 4 ސީލިންގމައުންޓް ޑޭލައިޓް.
6. ދެފާޚާނާގެ ކަރަންޓް ވައިރިން: 2 ސީލިންގމައުންޓް ޑޭލައިޓް.
7. ކަރަންޓް ވައިރުކުރުމަށް ޕީވީސީ ހޮޅި/ކޮންޑިއުޓް ސްލެބްގެތެރެއަށް ލާންވާނެއެވެ.
8. ޕިޗުގެ ކަރަންޓް ވައިރިން: އިރުމަތީ ފެންސްގެ މެދަށް ކަރަންޓް ކޭބަލްއަޅައި، 15އޕގެ 2 މަލްޓިސޮކެޓް ހަރުކުރުން.
9. ސަބްޑީބޯޑާއެކު ބޭނުންވާ ތަކެތި: 32އޕގެ 1 އީއެލްސީބީ، 32އޕގެ 2ޕޯޓް 1އީއެލްސީބީ، 10އޕގެ 9އެމްސީބީ، 16އޕގެ 5އެމްސީބީ، 6އޕގެ 4އެމްސީބީ.
10. ލައިޓްދަނޑިތަކާއި ރެސްޓްރަމްގެ ކަރަންޓް ވައިރުކޮށް ކޭބަލްއެޅުމާއި ދަނޑުގެ ޑީބޯޑު ރިލޮކޭޓުކުރުން. ރިލޮކޭޓްކުރާނީ އެނެކްސްގައިވާ ކުރެހުމާއި އެއްގޮތަށެވެ.
11. މިހާރު ދަނޑުގައި އިން ކަރަންޓް ޑީބީ، ދަނޑުގެ ހުޅަނގުދެކުނު ކަނަށް ބަދަލުކުރުން.

ޕިޗު ތައްޔާރުކުރުން

1. ދަނޑަށް އިތުރުވި ބަޔާއިއެކު މިހާރު އޮތް ކޮންކްރިޓް ޝީޓުމައްޗަށް 4 އިންޗި ބޯމިނުގައި ވެލިއަޅާ ބިންގަނޑު ހަރުކުރުން.
2. ހުޅަނގު ފާރުން ފެށިގެން 14 ފޫޓުގެ ފުޅާމިނުގައި ރޮސްޓްރަމުން ފެށިގެން އުތުރު ފެންސާއި ދެކުނު ފެންސާއި ހަމައަށް 2އިންޗި ބޯމިނުގެ 1×1 ފޫޓުގެ ގައު އެތުރުން.
3. ޕޭމަންޓް ގައުތަކުގައި ރަތްކުލާގެ ފްލޯ ޕެއިންޓްލުން.
4. ދަނޑުގެ ކުރެހުމާއިއެކު ދަނޑުގައި ޓާފުއެޅުން. ޓާފްގެ ދިގުމިނަކީ 137 ފޫޓެވެ. ފުޅާމިނަކީ 78 ފޫޓެވެ. ޓާފްގެނައުމުގެކުރިން ޓާފުގައި އެނެކްސް 1 ގައިވާ މިންތަކާއި އެއްގޮތަށް ދަނޑުކުރެހުން. ޓާފްމައްޗަށް ހިމުން ހިލަވެއްޔާއި ރަބަރުއެޅުން.

އިތުރު މަޢުލޫމާތު

1. މި ޕްރޮޖެކްޓްގެ ބިޑު ސެކިއުރިޓީގެ ގޮތުގައި 25،000.00 (ފަންސަވީސްހާސް) ރުފިޔާގެ ބިޑު ސެކިއުރިޓީއެއް ހުށަހަޅަންވާނެއެވެ. ބިޑް ސެކިއުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 120 (ސަތޭކަ ވިހި) ދުވަހެވެ. ބިޑް އެވޯޑުކުރާ ފަރާތުގެ ބިޑް ސެކިއުރިޓީ ދޫކުރާނީ ޕާފޯމަންސް ގެރެންޓީ ހުށަހެޅުމުންނެވެ.
2. ޕްރޮޖެކްޓް ކާމިޔާބު ކުރައްވާ ފަރާތުން ހުށަހަޅުއްވާ ބީލަމުގެ އަގުގެ %5 (ފަހެއް އިންސައްތަ) އަށް ވާ ޢަދަދުގެ ޕާފޯމަންސް ގެރެންޓީއެއް ހުށަހަޅަންވާނެއެވެ.
3. ބިޑް ސެކިއުރިޓީ އާއި ޕާފޯމަންސް ގެރެންޓީ ވާންވާނީ ދިވެހިރާއްޖޭގައި ޤާއިމްވެފައިވާ ބޭންކަކުން ނުވަތަ ފައިނޭންޝިއަލް އިންސްޓިޓިއުޓަކުން މި ޕްރޮޖެކްޓަށް ދޫކޮށްފައިވާ ސެކިއުރިޓީއަކާއި ޕާފޯމަންސް ގެރެންޓީއަކަށެވެ.

އަގު ހުށަހަޅަންވީ ގޮތް:

- އަގު ހުށަހަޅަންވާނީ ދިވެހި ރުފިޔާއިންނެވެ.

- ބީލަން ހުށަހަޅަންވާނީ މިކައުންސިލުން ތައްޔާރުކޮށްފައިވާ ބީލަން ފޯމުންނެވެ.

- އަންދާސީ ހިސާބު ހުށަހަޅަންވާނީ ބަންދުކުރެވިފައިވާ ސިޓީއުރައެއްގައިއެވެ.

- ސިޓީއުރައިގައި ބަންދުކުރެވިފައިވާ ލިޔެކިޔުން ފިޔަވާ އެހެން ލިޔުމެއް ފަހުން ބަލައެއް ނުގަނެވޭނެއެވެ. އަދި ބަންދުކުރެވިފައިވާ ސިޓީއުރައިގެ ބޭރުގައި އިޢުލާން ނަންބަރު އަދި ތިރީގައިވާގޮތަށް އެޑްރެސްކުރެވިފައި އޮންނަންވާނެއެވެ.

"ފުޓްސަލްދަނޑު މަރާމާތުކުރުން

މާޅޮސްމަޑުލު އުތުރުބުރީ މަޑުއްވަރީ ކައުންސިލްގެ އިދާރާ

ހުށަހަޅަން ޖެހޭ ލިޔެކިޔުންތައް:

- ވިޔަފާރީގެ މުއްދަތު ހަމަނުވާ ރަޖިސްޓްރީގެ ކޮޕީ.

- އަންދާސީ ހިސާބު ހުށަހަޅާ ފޯމް.

- ޓެކްސް ކުލިއަރެންސް ރިޕޯޓް.

- ބިޑު ސެކިއުރިޓީ.

ޕޮއިންޓް ދެވޭގޮތުގެ ތަފްސީލު:

1. ޕޮއިންޓް ދިނުމުގައި ބަލާ މިންގަނޑު ތަކަކަކީ :

- އަގު: އަށްޑިހަ އިންސައްތަ

- ތަޖުރިބާ: ދިހައެއް އިންސައްތަ

- މުއްދަތު: ދިހައެއް އިންސައްތަ

1. ބިޑް އިވެލުއޭޓްކުރުމުގައި އަގުގެ ބެންޗްމާކުގެ ގޮތުގައި ބަލާނީ ހުށަހަޅާފައިވާ އެންމެ ކުޑައަގެވެ.
2. ތަޖުރިބާއަށް ޕޮއިންޓް ދިނުމުގައި ބަލާނީ ފާއިތުވި 2 އަހަރު ކޮށްފައިވާ މިފަދަ މަސައްކަތްތަކުގެ ލިޔުމަށެވެ.
3. ބިޑް އިވެލުވޭޓްކުރުމުގައި މުއްދަތުގެ ބެންޗްމާކުގެ ގޮތުގައި ބަލާނީ ހުށަހަޅާފައިވާ އެންމެ ކުރު މުއްދަތެވެ.
4. ބިޑް އިވެލުއޭޓް ކުރާނީ މިއިދާރާގެ ބިޑް އިވެލުއޭޝަން ކޮމިޓީންނެވެ.
5. ބިޑް އިވެލުއޭޝަން ކޮމިޓީން އިވެލުއޭޓްކުރުމަށް ފަހު، ބިޑުތައް ކާމިޔާބު ކުރެވުނު ފަރާތަށާއި ނުކުރެވުނު ފަރާތްތަކަށް އެންގޭނެއެވެ.
6. ބިޑް އިވެލުއޭޝަނާއި ގުޅިގެން އެއްވެސް ޝަކުވާއެއް އޮތްނަމަ "ބީލަންވެރިޔާ މައްސަލަ ހުށަހަޅާ ފޯމް" ހުށަހެޅުމުން އެފަރާތަކަށް ޖަވާބުދެވޭނެއެވެ.

މިހެންވެ، މިކަން ޢާންމުކޮށް އެންގުމަށްޓަކައި އިޢުލާނުކުރީމެވެ.