2025 ޖަނަވަރީ 16 ވަނަ ދުވަހުގެ ރޭގެ ވަގުތެއްގައި ފޭސްބުކް ޕޭޖެއްގައި ސަރުކާރާއި ކައުންސިލް އަދި ވިލުފުށީ ސުކޫލް ބަދުނާމުވާގޮތަށް ކަމުގެ ހަގީގަތް ގަސްދުގައި އޮޅުވާލައިގެން 2024 ވަނަ އަހަރުގެ ޓީޗަރުންގެ ދުވަސް (06 އޮކްޓޯބަރ 2024 ގައި) ފާހަގަކުރުމަށް ގެންދިޔަ ހަފްލާގެ ތެރެއިން ކުރިއަށް ގެންދިޔަ ޓީމް ބިލްޑިންގ އެކްޓިވިޓީގެ ވީޑިއޯއަކަށް މިއުޒިކް އަޅައިގެން އެޑިޓްކޮށްގެން ވަނީ އާންމުކޮށްފައެވެ. މިކަމުގެ ސަބަބުން ރައްޔިތުންގެ ހިތްތަކުގައިވަނީ ނުތަނަވަސްކަން އުފެދިގެން ގޮސްފައެވެ. އެހެންކަމުން ކަމުގެ ހަގީގަތް އޮޅޭގޮތަށް މިވީޑިއޯ ފަތުރަމުންދާ މައްސަލަ ހަރުކަށި އިބާރާތުން ކައުންސިލްގެ ފަރާތުން ކުށްވެރިކުރަމެވެ.

ނަލަހިޔާ އިސްލާމީ މަރުކަޒުގެ ނަލަމާލަމަކީ ދީނީ އަދި އިޖްތިމާއީ އެކިއެކި ބޭނުންތަކަށް ބޭނުންކުރަމުންދާ ތަނެއްކަން ފާހަގަކުރަމެވެ. އެހެންކަމުން ރަށުފެންވަރުގައި އަދި އަތޮޅު ފެންވަރުގައި ބާއްވާ އެކިއެކި މުބާރާތްތަކާއި ހަރަކާތްތަކަށް މީގެކުރިންވެސް އެތަންވަނީ ބޭނުންކޮށްފައެވެ. އެތަން ސެމިނަރ ހޯލަތަކަށް ބަދަލުކުރުމުގެ ކުރިން ބޭނުންކުރަމުން ގޮސްފައިވަނީ އަންހެނުން ނަމާދުކުރާ ބައިގެ ގޮތުގައެވެ. ނަމަވެސް މިހާރު އަންހެނުން ނަމާދުކުރަނީ މިސްކިތުގެ މަތީބައިގައި އަންހެނުންނަށް ޚާއްސަކޮށް ޕާޓިޝަންޖަހައިގެން ހަދާފައިވާ ބައެއްގައެވެ. ނަލަމާލަމުގައި މިވަގުތު އަޅާފައިވާ ކާޕެޓަކީ މިސްކިތުގެ ނަމާދުކުރާ ބައިގައި ކުރިން އަޅާފައިވާ ކާޕެޓެވެ.

ވިލުފުށީ ކައުންސިލަކީ ދީނީ ކަންކަމަށް ޚާއްޞަ އިސްކަމެއްދީގެން ދީނުގެ ޢިލްމުވެރިންގެ ލަފަޔާއި އިރުޝާދުގެދަށުން ކަންކަންކުރުމަށް އަބަދުވެސް މަސައްކަތްކުރަމުންދާ ކައުންސިލެކެވެ. ނަމަވެސް ޓީޗަރުންކުރަމުންދާ ބުރަ މަސައްކަތުގެ އަގުވަޒަންކުރުމަށް ކައުންސިލުން ބޭއްވި ހަފްލާއެއްގެ ތަންކޮޅެއް ނަގައިގެން ކަމުގެ ހަގީގަތް އޮޅޭގޮތަށް އޭގެއަށް މިޔުޒިކް އަޅައިގެން ރައްޔިތުންގެ މެދުގައި ސަރުކާރާއި، ކައުންސިލާއި، އަދި ސުކޫލްގެ ޓީޗަރުންގެ އަގުވައްޓާލައި ނަފުރަތު އުފެއްދުމަށް މިފަދަ ނާތަހުޒީބު ދަށުދަރަޖައިގެ ޢަމަލެއް ހިންގިކަމީ ކައުންސިލުން އެކަމާއި ނުހަނު ހިތާމަކުރާކަމެކެވެ. އަދި ކުރިއަށް އޮތްތާގައި ވެސް ކައުންސިލުން މިސްކިތުގެ ހުރުމަތް ކެނޑޭނެފަދަ ޢަމަލެއް ނުކުރާނެކަމަށާއި، އެފަދަ ކަމަކަށް ތަރުހީބު ނުދޭނެކަމުގެ ފުރިހަމަ ޔަޤީންކަން ރައްޔިތުންނަށް އަރުވަމެވެ.