އިޢުލާން

      26 ޑިސެންބަރު 2024 ގައި މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް އުވާލުމަށްފަހު، ވަޒީރުންގެ މަޖިލީހަށް ރައީސުލްޖުމްހޫރިއްޔާ ގެންނެވި ބަދަލާއި ގުޅިގެން އެ މިނިސްޓްރީގެ ހައުސިންގ ޕޯޓްފޯލިއޯ މި މިނިސްޓްރީގެ ބެލުމުގެ ދަށަށް ގެނައުމާއެކު، ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން 2022 ވަނަ އަހަރު ކުރިއަށް ގެންގޮސްފައިވާ އުޞޫލު ނަންބަރު 2022/G-20 (ގެދޮރުވެރިޔާ ސްކީމުގެ ދަށުން ފްލެޓް ދޫކުރުމުގެ އުޞޫލު) އާ ގުޅިގެން، ކުރަންޖެހޭ އެންމެހާ މަސައްކަތްތައް ކުރުމަށް ފެށިފައިވާ ވާހަކަ ދެންނެވީމެވެ.
      2022 ވަނަ އަހަރު މި ސްކީމުގެ ދަށުން ފްލެޓްއަށް އެދި ހުށަހަޅާފައިވާ ފަރާތްތަކުގެ ޝަރުޠު ފުރިހަމަވޭތޯ ކަނޑައެޅުމުގައާއި، ޕޮއިންޓް ދިނުމުގައި ޢަމަލުކޮށްފައިވަނީ އެކި ފަހަރު އެކި އަސާސްތަކުގެ މައްޗަށް ބިނާކޮށްކަމާއި، އެއް މިންގަނޑަކުން ފޯމުތައް އިވޭލުއޭޓްކޮށްފައި ނުވާކަމާއި، އެޕްލިކަންޓުންގެ މެދުގައި ހަމަހަމަކަމަން ޤާއިމްކުރެވިފައި ނެތްކަން އެންޓި-ކޮރަޕްޝަން ކޮމިޝަންގެ ތަޙްޤީޤަށް ފާހަކުރެވިފައިވާތީ، އެފަދަ މައްސަލަ ހުރި ފޯމުތައް ބަލައި މުރާޖަޢާކުރުމަށް އެންޓި-ކޮރަޕްޝަން ކޮމިޝަނުން އިރުޝާދު ދެއްވާފައިވެއެވެ.
      އެހެންކަމުން، 4000 ފްލެޓް ލިބޭ ފަރާތްތަކުގެ ގޮތުގައި 15 ނޮވެންބަރު 2023 ގައި އިޢުލާންކޮށްފައިވާ ފަރާތްތަކުގެ ޝަރުޠު ފުރިހަމަވާކަން ކަށަވަރުކުރުމަށް އަންނަނިވި ކަންތައްތަކަށް ބިނާކޮށް ފޯމު ވެރިފައިކުރުމަށް ނިންމާފައިވާކަން ދަންނަވަމެވެ.
1. އުޞޫލު ނަންބަރު 2022/G-20 (ގެދޮރުވެރިޔާ ސްކީމުގެ ދަށުން ފްލެޓް ދޫކުރުމުގެ އުޞޫލު) ގެ 03 (ތިނެއް) ވަނަ މާއްދާގެ (ނ) ގެ ބޭނުމަށް މުއްދަތު ގުނުމުގައި "މެދުކެނޑުމެއް" ކަމަށް ބަލާނީ 01 (އެކެއް) އަހަރު ދުވަހަށް ވުރެ އިތުރުވާ މުއްދަތު ކަމަށް ކަނޑައެޅުން.
2. މި އިޢުލާނުގެ 1 ވަނަ ނަންބަރުގައި "މެދުކެނޑުމެއް" ކަމަށް ކަނޑައަޅާފައިވާ މުއްދަތުން، ތިރީގައި ބަޔާންކުރެވިފައިވާ މުއްދަތުތައް އިސްތިސްނާވާނެވެ.
   2.1. މާލޭގައި ވަޒީފާ އަދާކުރާ ފަރާތްތަކުގެ ތެރެއިން، ވަޒީފާގެ ގޮތުން މާލެއިން ބޭރުގައި ވަޒީފާ އަދާކޮށްފައިވާ މުއްދަތު؛
   2.2. މާލެއިން ނުވަތަ ރާއްޖެއިން ބޭރުގައި މަތީ ތަޢުލީމު ޙާޞިލްކުރުމަށް ހޭދަކޮށްފައިވާ މުއްދަތު؛
   2.3. ރިސޯޓުގައި ވަޒީފާ އަދާކޮށްފައިވާ ފަރާތެއްގެ ޢާއިލާ މާލޭގައި ދިރިއުޅޭ ނަމަ، ރިސޯޓުގައި އެ ފަރާތެއް ވަޒީފާ އަދާކޮށްފައިވާ މުއްދަތު؛
   2.4. ރާއްޖެއިން ބޭރަށް ބޭސް ފަރުވާއަށް ދަތުރުކޮށްފައިވާ މުއްދަތު.
3. ފޯމުތައް ވެރިފައިކުރުމުގެ މަރުޙަލާގައި މި މިނިސްޓްރީއިން ރިޢާޔަތްކުރާނީ އޮޑިޓަރ ޖެނެރަލްގެ އޮފީހުން ދެއްވާފައިވާ ލަފާފުޅާ އެއްގޮތަށް، 26 ޖޫން 2022 ގައި މި ސްކީމްގެ ދަށުން ފްލެޓް ދޫކުރުމަށް ހުޅުވާލި "ގެދޮރުވެރިން ޕޯޓަލް" ގައި ޝަރުޠު ފުރިހަމަވާކަން ސާބިތުކުރުމަށް ހުށަހެޅިދާނެ ކަމަށް އިޢުލާންކޮށްފައިވާ ލިޔެކިޔުންތަކަށްކަން.
     ވީމާ، މިކަން އާންމުކޮށް އަންގައި އިޢުލާން ކުރަމެވެ.