ތަޢާރަފް

މި އުސޫލަކީ ލައިބްރަރީއަށް ތަކެތި ހަދިޔާކުރާ ފަރާތްތަކުގެ މަޢުލޫމާތު ސޯޝަލް މީޑިއާގައި ޙިއްސާކުރުމުގައި ޢަމަލުކުރާނެ ގޮތް ބަޔާންކުރާ އުސޫލެވެ. މި އުސޫލުގެ މަޤްޞަދަކީ ފޮތް ހަދިޔާކުރާ ފަރާތްތަކަށް އެކަށީގެންވާ ގޮތެއްގައި ޝުކުރު އަދާކުރުމާއެކު، އިޖުތިމާޢީ ވިއުގަތަކުގައި ހިއްސާކުރެވޭ މަޢުލޫމާތު ހަރުދަނާކޮށް ބެލެހެއްޓުމެވެ.

ފޮތް ހަދިޔާކުރުމާ ގުޅޭ އުސޫލުތައް

1. 1.      ޤައުމީ އަދި ބައިނަލްއަޤްވާމީ މުއައްސަސާތަކުން ލިބޭ ހަދިޔާތައް

1.1   ރަސްމީ މުއައްސަސާއަކުން ނުވަތަ ޖަމިއްޔާއަކުން ތަކެތި ހަދިޔާކުރައްވައިފިނަމަ، އެކަން ފާހަގަކޮށް ޝުކުރު އަދާކުރުމުގެ ގޮތުން، ހަދިޔާގެ ފޮޓޯއާއެކު ޚާއްޞަ ޕޯސްޓެއް ޝާއިޢުކުރެވޭނެއެވެ.

1.2   މީގެ އިތުރުން، މި ގިންތީގައި ހިމެނޭނީ ބޭރު ޤައުމުތަކުގެ ސަފީރުންނާއި، ދިވެހިރާއްޖެއަށް ބޭރު ޤައުމުތަކުން ކަނޑައަޅުއްވާފައިވާ ސަފީރުންނާއި، އަދި މިނޫންވެސް ސަރުކާރުގެ މަތީ ފަންތީގެ ވުޒާރާތަކާއި މުއައްސަސާތަކެވެ.

1. 2.      ޤައުމީ ފެންވަރުގައި ފާހަގަކުރެވޭ ޝަޚްޞިއްޔަތަކުން ހަދިޔާކުރާ ފޮތްތައް

2.1 ޤައުމީ ފެންވަރުގައި ފާހަގަކުރެވޭ ޝަޚްޞިއްޔަތެއްގެ ގޮތުގައި ބެލެވޭނީ ކުރީގެ ރައީސުލްޖުމްހޫރިއްޔާއެއް ނުވަތަ ރައީސުލްޖުމްހޫރިއްޔާގެ ނައިބެއްގެ މަޤާމު ފުރުއްވާފައިވާ ބޭފުޅުންނާއި، ޤައުމީ ފެންވަރުގައި ޝަރަފުވެރިވެވަޑައިގަންނަވާ ވަޒީރުންނާއި، އަދީބުންނާއި، ޤައުމަށް އަގުހުރި ޚިދުމަތްތަކެއް ކުރެއްވުމުގެ ސަބަބުން، ސަރުކާރުން ނުވަތަ ރައީސުލްޖުމްހޫރިއްޔާ ޚާއްޞަ ހަނދާނީ ސިއްކައެއް ނުވަތަ ރަމްޒެއް އަރުވާފައިވާ ޝަޚްޞިއްޔަތުތަކެވެ.

2.2 މިފަދަ ޝަޚްޞިއްޔަތަކުން ނުވަތަ އެފަދަ ބޭފުޅެއްގެ ޢާއިލާގެ މެންބަރަކު އެބޭފުޅުންގެ ހަނދާނުގައި ތަކެތި ހަދިޔާކުރައްވައިފިނަމަ، އެކަން ފާހަގަކޮށް ޝުކުރުވެރިކަން ފާޅުކުރުމުގެ ގޮތުން، ހަދިޔާގެ ފޮޓޯއާއެކު ޚާއްޞަ ޕޯސްޓެއް ޝާއިޢުކުރެވޭނެއެވެ.

1. 3.      ވަކިވަކި ފަރުދުންގެ ހަދިޔާތައް

3.1    50 ފޮތަށްވުރެ މަދުން ހަދިޔާކުރާ ފަރާތްތައް:

3.1.1        މި ގިންތީގައި ހިމެނޭ ފަރާތްތަކުގެ ވަކިވަކި ފޮޓޯތައް ޝާއިޢުނުކުރެވޭނެއެވެ. ނަމަވެސް، މިފަދަ ހުރިހާ ހަދިޔާކުރާ ފަރާތްތަކަށް ޝުކުރު އަދާކުރުމުގެ ގޮތުން އެފަރާތްތަކުގެ ނަންތައް އެއް ޕޯސްޓެއްގައި ޝާއިޢުކުރެވޭނެއެވެ. އަދި ހަދިޔާކުރި ފަރާތްތަކުގެ ޙިއްޞާއަށް އިޙްތިރާމްކޮށް ޝުކުރުގެ މެސެޖެއް ހިމަނާނެއެވެ.

3.1.2        ފޮތަށް ވުރެ މަދުން ހަދިޔާ ކުރާ ފަރާތްތަކަށް ވަކި ޕޯސްޓެއް ނުވަތަ ވަކިވަކި ޑޮނޭޝަންތަކަށް ހާއްސަ ތަސްވީރު ޕޯސްޓް ނުކުރެވޭނެއެވެ.

3.2    50 ފޮތް ނުވަތަ އެއަށްވުރެ ގިނައިން ހަދިޔާކުރާ ފަރާތްތައް:

3.2.1        މި ގިންތީގައި ހިމެނޭ ކޮންމެ ފަރާތަކަށް، އެ ފަރާތުގެ ފޮޓޯއާއެކު ވަކި ޚާއްޞަ ޕޯސްޓެއް ޝާއިޢުކުރެވޭނެއެވެ.

3.2.2        މި ޕޯސްޓުގައި ހަދިޔާކުރި ފޮތްތަކުގެ ތަސްވީރާއި ހަދިޔާކުރި މީހާގެ ޙިއްޞާއަށް އިޙްތިރާމްކޮށް ޝުކުރުގެ މެސެޖެއް ހިމަނާނެއެވެ.

3.3    ފޮތް ލިޔުމާއި ޝާއިޢުކުރުމުގެ ދާއިރާގައި ހަރަކާތްތެރިވާ ފަރާތްތަކުން ހަދިޔާކުރާ ފޮތްތައް:

3.3.1        ފޮތް ލިޔުމާއި ޝާއިޢުކުރުމުގެ ދާއިރާގައި މަސައްކަތްކުރާ ފަރާތްތަކުގެ އަގު ވަޒަންކުރުމަށާއި، އެ ދާއިރާ ކުރިއެރުވުމަށްޓަކައި، އެފަދަ ފަރާތްތަކުން ފޮތެއް ހަދިޔާކޮށްފިނަމަ، އެކަން ފާހަގަކޮށް ޝުކުރު އަދާކުރުމުގެ ގޮތުން، ހަދިޔާކުރެވުނު ފޮތުގެ ފޮޓޯއާއެކު ޚާއްޞަ ޕޯސްޓެއް ޝާއިޢުކުރެވޭނެއެވެ.

1. 4.      އުސޫލު ތަންފީޒުކުރުން

4.1    މި އުސޫލު ތަންފީޒުކުރުމުގައި ލައިބްރަރީގެ ސޯޝަލް މީޑިއާ ޓީމުން ޒިންމާދާރުކަމާއެކު ޢަމަލުކުރަންވާނެއެވެ.

4.2    ހުރިހާ ހަދިޔާކުރާ ފަރާތްތަކަށް ހަމަހަމަކަމާއެކު މުޢާމަލާތްކުރުމަށް ސަމާލުކަން ދޭންވާނެއެވެ.

4.3    މި އުސޫލަށް އެއްވެސް ބަދަލެއް ގެންނަން ޖެހިއްޖެނަމަ، އެކަން ކުރަންވާނީ ލައިބްރަރީގެ އިސްވެރިންގެ ހުއްދައާއި އެކުގައެވެ.

1. 5.      އިތުރު ބަޔާންތައް

5.1   ޕްރައިވަސީ ރައްކާތެރިކުރުން

5.1.1        ހަދިޔާކުރާ ފަރާތްތަކުގެ އަމިއްލަ މަޢުލޫމާތު ހާމަކުރުމުގައި އެފަރާތްތަކުގެ ހުއްދަ ހޯދަންވާނެއެވެ.

5.1.2        ހަދިޔާކުރާ ފަރާތަކުން އެދިއްޖެނަމަ، އެފަރާތުގެ ނަން ނުވަތަ ފޮޓޯ ޝާއިޢުނުކުރުމުގެ އިޚްތިޔާރު ލައިބްރަރީއަށް ލިބިގެންވެއެވެ.

5.2   ހަދިޔާތައް ބަލައިގަތުމުގެ މުއްދަތު
ލައިބްރަރީއަށް ހަދިޔާކުރެވޭ ފޮތް ނުވަތަ އެހެނިހެން ތަކެތި ބަލައިގަނެވޭނީ ލައިބްރަރީ ހުޅުވާފައިވާ ހުންނަ ވަގުތުތަކުގައި ކުޅުދުއްފުށި ޕަބްލިކް ލައިބްރަރީއިންނެވެ.

1. އުސޫލަށް ޢަމަލުކުރަން ފެށުން
   މި އުސޫލަށް ޢަމަލުކުރަން ފަށާނީ ކުޅުދުއްފުށި ސިޓީ ކައުންސިލުން ފާސްކުރާ ތާރީޚުން ފެށިގެންނެވެ. މި އުސޫލަށް އެއްވެސް އުނިއިތުރެއް ގެންނަން ޖެހިއްޖެނަމަ، ނުވަތަ މި އުސޫލުގައި ނެތް ކަމެއް ދިމާވެއްޖެނަމަ އެކަން ނިންމާނީ ކުޅުދުއްފުށި ސިޓީ ކައުންސިލުންނެވެ.