ފަރެސްމާތޮޑާ ޖެޓީ މަތީގައި އެކިއެކި ފަރާތްތަކުން ގިނަދުވަސްތަކެއް ވަންދެން ބެހެއްޓިފައިވާ އެންމެހާ ތަކެތި މިއަދުން ފެށިގެން 7 ދުވަސް ތެރޭގައި އެތަކެތީގެ ވެރިފަރާތުން ނެންގެވުމަށް އެންމަހާ ފަރާތްތަކަށް އަންގާ އިލްތިމާސް ކުރަމެވެ. މީގެ އިތުރުންވެސް، ބަނދަރުމަތީގައި ބައެއް ފަރާތްތަކުން މުދާ ބަހައްޓައިގެން އެކިއެކި ވިޔާފާރި ކުރަމުންދާ ކަންވެސް މި އިދާރާއަށް ވަނީ ފާހަގަ ކުރެވިފައެވެ. އަދި މިކަމުގެ ޝަކުވާ ޢާންމުން ދަނީ މިއިދާރާގައި ކުރަމުންނެވެ. މީގެ އިތުރުން، ދޮންވެއްޔާއި އަކިރި ނަގާ ފަރާތްތަކުން ޖެޓީ މައްޗަށް އަކިރި އާއި ދޮންވެލި އެޅުމަށްފަހު ތަން ސާފު ނުކޮށް އޮންނަކަންވެސް މިއިދާރާއަށް ވަނީ ފާހަގަ ކުރެވިފައެވެ.

            މީގެ އިތުރުންވެސް އާރު.ޓީ.އެލް ގާތްކުރުމަށް ޚާއްސަކޮށްފައިވާ ސަރަޙައްދަށް ދަތިވާ ގޮތަށް ވެހިކަލް ޕާކު ކުރުމާއި ތަކެތި ބެހެއްޓޭ ކަންވެސް ވަނީ ފާހަގަ ކުރެވިފައެވެ. އާންމުކޮށް މިކަން ކުރާ ފަރާތްތަކަށް ތަކުރާރުކޮށް މިކަންކަން ނުކުރުމަށް މީގެ ކުރިންވެސް ވާނީ އެކި ފަހަރު މަތިން ނަސޭހަތްތެރި ވެފައެވެ. ނަމަވެސް ކައުންސިލް އިދާރާއިން އަންގާ އެންގުންތަކަށް ބައެއްފަރާތް ތަކުން ޢަމަލު ކުރަމުން ނުދިއުމުގެ ސަބަބުން، ބަނދަރު ބޭނުންކުރާ އާންމު ރައްޔިތުންނަށް ދަނީ މިކަމުގެ ދަތިތައް ފޯރަމުންނެވެ. 

ވީމާ، އެންމެހާ ފަރާތްތަކުންވެސް އާންމު މަސްލަހަތާއި ގުޅިފައިވާ މިބާވަތުގެ ކަންކަމަށް ސަމާލުކަން ދެއްވައި މިކަންކަން ތަކުރާރު ނުކުރުމަށް އިލްތިމާސް ކުރަމެވެ.