އެއްގަމުގައި ދުއްވާ އުޅަނދުތަކުގައި ބޭނުންކުރާ ޑޮމެއިން ނަންބަރުތަކާ ގުޅޭ ގިނަ މައްސަލަތަކެއް ފެންމަތިވުމާއެކު، ނިމިދިޔަ ރިޔާސީ ދައުރުގައި ރައީސުލްޖުމްހޫރިއްޔާގެ އޮފީހުންވަނީ މި މިނިސްޓްރީން ފޯރުކޮށްދެމުން ގެންދިޔަ ޑޮމެއިންގެ އެންމެހާ ޚިދުމަތްތައް، އެ މައްސަލަތަކާމެދު ވަކި ގޮތެއް ނިމެންދެން ހުއްޓުވާފައެވެ.

މި ޚިދުމަތަކީ، ދިވެހިންގެ މެދުގައި އަދި ވަކިން ޚާއްޞަކޮށް ޒުވާނުންގެ މެދުގައި، ނުހަނު މަޤުބޫލުކަން ލިބިފައިވާ، އަދި ޑޮމެއިން ގަތުމަށާއި ގުޅުންހުރި ޚިދުމަތް ހޯދުމަށް އެފަރާތްތަކުން ބޮޑެތި ހޭދަތައްވެސް ކޮށްފައިވާ ޚިދުމަތެކެވެ. ކަންމިހެން ހުރުމާއެކު، ޚިދުމަތް އަލުން ފެށުމަށްޓަކައި މައްސަލަތަކަށް އަވަސް ޙައްލެއް ހޯދުމަކީ މި ސަރުކާރުން ވަރަށް ޙާއްޞަ އަހައްމިއްޔަތުކަމެއް ދީގެން ކުރިޔަށްގެންދާ މަސައްކަތެކެވެ. ނަމަވެސް، އަލުން މި ޚިދުމަތް ފެށުމުގައި ކުރިމަތިވެފައިވާ އެންމެބޮޑު ގޮންޖެހުމަކީ، ވޭތުވެދިޔަ ތަނުގައި ޑޮމެއިންގެ ރެކޯޑުތައް ހަރުދަނާ ގޮތެއްގައި މިނިސްޓްރީގައި ބެލެހެއްޓިފައި ނެތުމާއި، ޚިދުމަތް ފޯރުކޮށްދިނުމުގައި ޢަމަލުކުރާނެ ހަރުދަނާ އުޞޫލުތަކެއް އެކުލަވާލާފައި ނެތުމެވެ.

މި މިނިސްޓްރީގެ މިހާރުގެ އަމާޒަކީ، އަލުން ޑޮމެއިންގެ ޚިދުމަތް ފޯރުކޮށްދިނުމުގެ މަސައްކަތް ފަށާއިރު، ރެކޯޑުތައް ބަލަހައްޓާ އަދި މޮނިޓަރ ކުރާނެ ހަރުދަނާ ނިޒާމެއް ޤާއިމުކޮށް، ކުރިމަގުގައި ދިމާވެދާނެ މައްސަލަތައް މަދުކުރުމަށްޓަކައި، އެކަށީގެންވާ ހަރުދަނާ އަދި ފުރިހަމަ ޤަވާއިދެއް އެކުލަވާލައި އެ ޤަވާޢިދާ އެއްގޮތަށް، ދެމެހެއްޓެނިވި ގޮތެއްގައި ޑޮމެއިންއާގުޅޭ ޚިދުމަތް ފޯރުކޮށްދިނުމެވެ. މިގޮތުން މިވޭތުވެދިޔަ 10 މަސް ދުވަހުގެ ތެރޭގައި ކުރެވުނު މަސައްކަތުން ވަރަށް އެކަށީގެންވާ ކުރިއެރުންތަކެއް ލިބިފައިވާކަން ފާހަގަކުރަމެވެ.

މިދެންނެވި ބަދަލުތަކާއެކު، އަލުން ޑޮމެއިންގެ ޚިދުމަތްތައް ފަށާއިރު، މިހާރު ދިމާވެފައިވާ ގޮންޖެހުންތަކަށް ޙައްލު ހޯދުމުގެ ގޮތުންނާއި އަދި ޚިދުމަތް ފޯރުކޮށްދިނުމަށް ލުއި ފަސޭހަ ކުރުމަށްޓަކައި ޢަމަލުކުރަންޖެހޭ އުޞޫލުތައް ވެސް އިޞްލާޙު ކުރެވިގެންދާނެއެވެ. މީގެ އިތުރުން، ޑޮމެއިންގެ ޚިދުމަތް ފޯރުކޮށްދިނުމުގައި ދޫކުރެވޭ އެންމެހައި ލިޔެކިޔުންތަކަކީ ސެކިއުރިޓީ ފީޗަރސްތައް އެކުލެވޭ ލިޔެކިޔުންތަކަށް ބަދަލުވެގެންދާނެއެވެ.

ޙާއްޞަކޮށް މި މިނިސްޓްރީން މިފަށާ މަސައްކަތުގެ ތެރޭގައި، އެއްވެސް ފަރާތެއްގެ ޙައްޤަކަށް އުނިކަމެއް އަންނާނެ ކަމެއް އެކުލެވިގެން ނުވާނެކަމުގެ ޔަޤީންކަން އެންމެހާ ފަރާތްތަކަށް އަރުވަމެވެ. މި މިނިސްޓްރީގެ މަޤްޞަދަކީ، ޑޮމެއިން ނަންބަރުތަކާ ގުޅިގެން ދިމާވެފައިވާ މައްސަލަތަކަށް ޤާނޫނާއި ގަވާއިދުގެ ތެރެއިން ލުއިފަސޭހަ ގޮތެއްގައި ޙައްލު ހޯދައިދީ، ރައްޔިތުންގެ އިތުބާރު ލިބިފައިވާ ޚިދުމަތަކަށް ހެދުމެވެ. އަދި މި މިނިސްޓްރީން މަސައްކަތް ކުރަމުން މިގެންދަނީ، މި ފެށޭ ނޮވެމްބަރ މަހުގެ ތެރޭގައި ޑޮމެއިންގެ ޚިދުމަތްތައް އަލުން ފަށައި ދިމާވެފައިވާ މައްސަލަތައް ހައްލުކުރުމުގެ މަސައްކަތް ފެށުމަށެވެ. މި މައްސަލަ ޙައްލުކުރުމަށް މިނިސްޓްރީން ކުރިއަށްގެންދާ މަސައްކަތްތަކުގައި އެންމެހައި ފަރާތްތަކުން ފުރިހަމަ އެއްބާރުލުން ދެއްވުމަކީ މި މިނިސްޓްރީގެ ވަރަށްބޮޑު އެދުމެކެވެ.