"ހުވަދޫ ވަތަބަނޑޭރި ވޮލީބޯލް ޗެލެންޖް 2024" ގައި ބައިވެރިވުމުގެ ފުރުޞަތު ހުޅުވާލުން

2023 ވަނަ އަހަރު 'ގައްދޫ ވަތަބަނޑޭރި ވޮލީ ބޯލް ޗެލެންޖް 2023'  ގެ ނަމުގައި ގައްދޫ ކައުންސިލުން  ކުރިއަށްގެންދިޔަ ކާމިޔާބު މުބާރާތަށްފަހު މިއަހަރު ވެސް ފޯރިގަދަ ވޮލީބޯޅަ މުބާރާތެއް ބޭއްވުމަށް ކައުންސިލުން ވަނީ ނިންމާފައެވެ. މިއަހަރުގެ މުބާރާތް ބޭއްވުމަށް ރާވާފައިވަނީ މުޅި ހުވަދު އަތޮޅަށް (ގއ އަދި ގދ އަށް) ހުޅުވާލައިގެންނެވެ. މުބާރާތް ފަރުމާކުރެވިފައިވަނީ "މެންސް ޑިވިޝަން" އަދި "ވިމެންސް ޑިވިޝަން" އަށް ބާހާލައިގެންނެވެ. މިއަހަރުގެ މުބާރާތް ހުވަދު އަތޮޅުގެ ހުރިހާ ރަށްތަކަށް ހުޅުވާލާފައިވީ ނަމަވެސް، މުބާރާތުގެ ޚާއްސަ ދައުވަތެއްގެ ގޮތުގައި ފުވައްމުލަކު ސިޓީއާއި އައްޑޫ ސިޓީއަށް ޓީމުތައް ބައިވެރިކުރުމުގެ ފުރުޞަތު ދިނުމަށް ކައުންސިލުން ނިންމާފައިވެއެވެ.

ވީމާ، މިމުބާރާތުގައި ބައިވެރިވުމަށް އެދޭ ޓީމްތަކުން 2024 ނޮވެމްބަރު 10 ވާ އާދީއްތަ ދުވަހުގެ 14:00 ގެ ކުރިން މުބާރާތުގައި ބައިވެރިވުމަށް އެދޭ ފޯމް ފުރިހަމަ ކުރުމަށްފަހު މިއިދާރާއަށް ހުށަހެޅުއްވުން އެދެމެވެ. މުބާރާތުގެ ލިސްޓު ހުށަހެޅުމުގެ އެންމެ ފަހު މުއްދަތަކީ 2024 ނޮވެމްބަރު 25 ވާ ހޯމަ ދުވަހުގެ 14:00 އެވެ. މުބާރާތުގެ ޤަވާއިދާއި މުބާރާތުގައި ބައިވެރިވުމަށް އެދޭ ފޯމް އަދި މުބާރާތުގައި ބައިވެރިވާ ޓީމް ތަކުން ހުށަހަޅަންޖެހޭ ޓީމް ލިސްޓް ހުށަހަޅާ ފޯމް މިއިޢުލާނާއެކު ޢާންމުކުރި ވާހަކަވެސް ދެންނެވީމެވެ. ޓީމް ރެޖިސްޓްރޭޝަން ފޯމް އަދި ޓީމް ލިސްޓް ރަޖިސްޓްރޭޝަން ފޯމް ހުށަހެޅުމަށްފަހު އިދާރާއަށް ލިބިފައިވާކަން ކަށަވަރުކުރުމަކީ އެޓީމެއްގެ ޒިންމާއެކެވެ.

މުބާރާތުގައި ބައިވެރިވުމަށް އެދޭ ފޯމާއި ޓީމް ލިސްޓް ހުށަހަޅާ ފޯމް މިއިދާރާގެ އީމެއިލް އެޑްރެސް [email protected] އަށް ފޮނުވިދާނެ ކަމުގައިވެސް ދެންނެވީމެވެ. މިމުބާރާތް އަދި މުބާރާތުގެ ޤަވާއިދާއި ގުޅިގެން އިތުރު މަޢުލޫމާތު ސާފުކުރުމަށް 9111005 އަށް ގުޅުއްވުމަށްވެސް ދެންނެވީމެވެ.

ވީމާ، މިކަން ޢާންމުކޮށް އަންގާ އިޢުލާން ކުރީމެވެ.