ހދ.އަތޮޅަށް ދިގުމުއްދަތަކަށް ފާހަގަ ކުރެވޭފަދަ ޝަރަފްވެރި ޚިދުމަތްތައް ކޮށްދީފައިވާ ފަރާތްތަކާއި، އަތޮޅަށް އަގުހުރި، ފާހަގަ ކޮށްލެވޭފަދަ ޚިދުމަތްތައް ތަފާތު އެކި ދާއިރާތަކުން ކޮށްދެމުންދާ ފަރާތްތަކާއި، އަދި 2016 ވަނަ އަހަރު ހދ.އަތޮޅަށް ފަޚްރުވެރި ވަނަތައް ހޯދާދީފައިވާ ފަރާތްތަކާއި، އަތޮޅަށް އެންމެ ހިންގުންތެރި ކައުންސިލްތަކާއި، ސްކޫލް މަދަރުސާތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، ކުލަބު ޖަމްޢިއްޔާތައް ފާހަގަކޮށް، އެފަރާތްތަކުގެ އަގުވަޒަންކޮށް ހިތްވަރު ދިނުމުގެ ގޮތުން ހދ.އަތޮޅުން ބާއްވާ "ތިލަދެކުނު ޝަރަފްވެރިކަމުގެ އިނާމު" ދިނުމުގެ ޖަލްސާ މިއަހަރުވެސް ބާއްވާގޮތަށް ހދ.އަތޮޅު ކައުންސިލުންވަނީ ނިންމާފައެވެ.  

މިގޮތުން މިއަހަރު އިނާމުދިނުމަށް ކަނޑައެޅިފައިވާ މައިގަނޑު ދާއިރާތައް ތިރީގައި މިވަނީއެވެ.

އިނާމު ދިނުމަށް ކަނޑައަޅާ ދާއިރާތައް

1. ޝަރަފްވެރިކަމުގެ އިނާމް
2. ހިތްވަރުދިނުމުގެ އިނާމް 
3. ކައުންސިލުންދޭ ޚާއްޞަ އިނާމު
4. މަތީ ދަރަޖަ ހޯދާ ފަރާތްތަކަށް ކައުންސިލުންދޭ ޚާއްޞަ އިނާމު
5. ހިންގުންތެރިކަމުގެ އިނާމު

ވީމާ، ތިލަދެކުނު ޝަރަފްވެރިކަމުގެ އިނާމުދިނުމުގެ އުޞޫލާއި އެއްގޮތްވާގޮތުގެ މަތިން އިނާމަށް ޝަރުތުފުރިހަމަވާ ފަރާތްތަކުން 2017 ސެޕްޓެމްބަރ 14 ވާ ބުރާސްފަތި ދުވަހުގެ 14:00 ގެ ކުރިން އެޕްލިކޭޝަން ފޯމު ފުރިހަމަކުރައްވާ ހދ.އަތޮޅު ކައުންސިލް އިދާރާއަށް ނުވަތަ އެރަށެއްގެ ރަށުކައުންސިލް އިދާރާއަށް ހުށަހެޅުއްވުން އެދެމެވެ. އިތުރު މަޢުލޫމާތު ސާފުކުރެއްވުމަށް 6521126 އާއި ގުޅުއްވުން އެދެމެވެ.

އެޕްލިކޭޝަން ފޯމް ހދ.އަތޮޅު ކައުންސިލް އިދާރާއިންނާއި، ހދ.އަތޮޅު ރަށްރަށު ކައުންސިލް އިދާރާތަކުން ލިބެން ހުންނާނެއެވެ.

----------------

ތިލަދެކުނު ޝަރަފްވެރިކަމުގެ އިނާމު ދިނުމަށް ކަނޑައެޅިފައިވާ މައިގަނޑު ދާއިރާތަކުގެ ތަފްޞީލު

1. ޝަރަފްވެރިކަމުގެ އިނާމު

މި އިނާމު ދެވޭނީ އަތޮޅަށް ނުވަތަ ޤައުމަށް ފާހަގަކުރެވޭފަދަ އަގުހުރި ޚިދުމަތެއް ދިގުމުއްދަތަކަށް ކޮށްދީފައިވާ ނުވަތަ ކޮށްދެމުންދާ ހދ.އަތޮޅަށް ނިސްބަތްވާ ޢާއްމު ފަރާތްތަކަށާއި، ކުލަބު ޖަމްޢިއްޔާ ނުވަތަ ޖަމާޢަތްތަކަށެވެ. ޝަރަފުވެރިކަމުގެ އިނާމު ދެވޭނީ ތިރީގައިވާ ދާއިރާތަކުން ކުރިމަތިލާ ފަރާތްތަކުގެ ތެރެއިން ޝަރުތު ފުރިހަމަވާ، އިވެލުއޭޝަން ކޮމިޓީއިން ކަނޑައަޅާ މާކިން ކުރައިޓީރިޔާއިން އެންމެ މަތީ މާކުސްލިބޭ 3 ފަރާތަކަށެވެ. ޝަރަފްވެރިކަމުގެ އިނާމަށް ކުރިމަތިލެވޭނެ ދާއިރާތައް؛

1. ދީނީ ހޭލުންތެރިކަން އިތުރުކުރުމާއި، ދީނީ ޢިލްމު އުނގެނިގަތުމާއި އުނގަންނައިދިނުމުގެ ދާއިރާ
2. ދިވެހިބަހާއި އަދަބިއްޔާތު އަދި ތާރީޚަށް ޚިދުމަތްކުރުމުގެ ދާއިރާ
3. ތަޢުލީމީ ދާއިރާ
4. ސިއްޙީ ދާއިރާ / ހަކީމީ ބޭސްވެރިކަމުގެ ދާއިރާ
5. ތިމާވެށީގެ ދާއިރާ
6. މަސްވެރިކަމުގެ ދާއިރާ
7. ފަތުރުވެރިކަމުގެ ދާއިރާ
8. ދަނޑުވެރިކަމުގެ ދާއިރާ
9. އައު އުފެއްދުންތަކުގެ ދާއިރާ
10. އިޖްތިމާޢީ ޚިދުމަތުގެ ދާއިރާ
11. އަތްތެރި މަސައްކަތުގެ ދާއިރާ
12. ޚަބަރާއި މަޢުލޫމާތު ފެތުރުމުގެ ދާއިރާ
13. ކުޅިވަރާއި މުނިފޫހި ފިލުވުމުގެ ދާއިރާ
14. ހިންގުމުގެ ދާއިރާ

2. ހިތްވަރުދިނުމުގެ އިނާމު

މި އިނާމު ދެވޭނީ އަތޮޅަށް، ޤައުމަށް ނުވަތަ ރަށަށް ފާހަގަކުރެވޭފަދަ އަގުހުރި ޚިދުމަތެއް އެކަށީގެންވާ މުއްދަތަކަށް ކޮށްދީފައިވާ ނުވަތަ ކޮށްދެމުންދާ ހދ.އަތޮޅަށް ނިސްބަތްވާ ޢާއްމު ފަރާތްތަކަށާއި، ކުލަބު ޖަމްޢިއްޔާ ނުވަތަ ޖަމާޢަތްތަކަށެވެ.  ހިތްވަރު ދިނުމުގެ އިނާމު ދެވޭނީ ތިރީގައިވާ ދާއިރާ ތަކުން ކުރިމަތިލާ ފަރާތްތަކުގެ ތެރެއިން ޝަރުތު ފުރިހަމަވާ، އިވެލުއޭޝަން ކޮމިޓީއިން ކަނޑައަޅާ މާރކިން ކްރައިޓީރިއާއިން ކޮންމެ ދާއިރާއަކުންވެސް އެންމެ މަތިން މާކްސް ލިބޭ ފަރާތަކަށެވެ. ހިތްވަރު ދިނުމުގެ އިނާމަށް ކުރިމަތިލެވޭނެ ދާއިރާތައް؛

1.  ދީނީ ހޭލުންތެރިކަން އިތުރުކުރުމާއި، ދީނީ ޢިލްމު އުނގެނިގަތުމާއި އުނގަންނައިދިނުމުގެ ދާއިރާ
2.  ދިވެހިބަހާއި އަދަބިއްޔާތު އަދި ތާރީޚަށް ޚިދުމަތްކުރުމުގެ ދާއިރާ
3.  ތަޢުލީމީ ދާއިރާ
4.  ސިއްޙީ ދާއިރާ / ހަކީމީ ބޭސްވެރިކަމުގެ ދާއިރާ
5.  ތިމާވެށީގެ ދާއިރާ
6.  މަސްވެރިކަމުގެ ދާއިރާ
7.  ފަތުރުވެރިކަމުގެ ދާއިރާ
8.  ދަނޑުވެރިކަމުގެ ދާއިރާ
9.  އައު އުފެއްދުންތަކުގެ ދާއިރާ
10.  އިޖްތިމާޢީ ޚިދުމަތުގެ ދާއިރާ
11.  އަތްތެރި މަސައްކަތުގެ ދާއިރާ
12.  ޚަބަރާއި މަޢުލޫމާތު ފެތުރުމުގެ ދާއިރާ
13.  ކުޅިވަރާއި މުނިފޫހި ފިލުވުމުގެ ދާއިރާ 

3. ކައުންސިލުންދޭ ޚާއްޞަ އިނާމު

މިއިނާމު ދެވޭނީ ޖީ.ސީ އޯލެވަލް، އައި.ޖީ.ސީ.އެސް.ސީ، އެސް.އެސް.ސީ އިމްތިޙާނުތަކުންނާއި އެޑެކްސެލް ޖީ.ސީ އޭލެވަލް އަދި އެޗް.އެސް.ސީ އިމްތިޙާނުން މިނިސްޓްރީ އޮފް އެޑިޔުކޭޝަނުން ކަނޑައަޅާފައިވާ އުޞޫލުތަކުގެ ދަށުން ދިވެހިރާއްޖޭގެ ގަދަ 10 ގައި ހިމެނޭ ހދ.އަތޮޅުގެ ދަރިވަރުންނަށާއި، ހދ.އަތޮޅު ސްކޫލު މަދަރުސާތަކުގައި ތަޢުލީމް ޙާޞިލްކުރާ ދަރިވަރުންގެ ތެރެއިން ކޮންމެ ސްކޫލަކުންވެސް "ބެސްޓް އޯލް ރައުންޑް" ގެ ގޮތުގައި ހޮވޭ ދަރިވަރަށާއި، އަތޮޅު ފެންވަރުގައާއި، ޤައުމީ  ފެންވަރުގައި ބާއްވާ އެކިއެކި މުބާރާތްތަކުން އެއްވަނަ ހޯދާ ފަރާތްތަކަށެވެ. މިގޮތުން ކައުންސިލުންދޭ ޚާއްޞަ އިނާމު 4 ބަޔަކަށް ބެހިގެންވެއެވެ.

4. މަތީ ދަރަޖަ ހޯދާ ފަރާތްތަކަށް ކައުންސިލުންދޭ ޚާއްޞަ އިނާމު

މި އިނާމު ދެވޭނީ ޖީ.ސީ.އީ އޯލެވަލް، އައި.ޖީ.ސީ.އެސް.އީ، އެސް.އެސް.ސީ އިމްތިޙާނުތަކުންނާއި އެޑެކްސަލް ޖީ.ސީ. އޭލެވަލް އަދި އެޗް.އެސް.ސީ އިމްތިހާނުތަކުން، މިނިސްޓްރީ އޮފް އެޑިޔުކޭޝަނުން ކަނޑައަޅާފައިވާ އުޞޫލުތަކުގެ ދަށުން ދުނިޔޭގެ ފެންވަރުގައި 1 ވަނަ ޙާޞިލްކުރާ ހދ.އަތޮޅުގެ ދަރިވަރުންނަށާއި، މޯލްޑިވްސް ކޮލިފިކޭޝަން އޮތޯރިޓީގެ މިންގަނޑުތަކުގެ ދަށުން ޑިގްރީ ފެންވަރުން ފެށިގެން މަތީ ޕްރޮގްރާމު ނުވަތަ ކޯސްތަކުން ޤައުމީ ފެންވަރުގައިއާއި ދުނިޔޭގެ ފެންވަރުގައި 1 ވަނަ ޚާޞިލްކުރާ ހދ.އަތޮޅުގެ ދަރިވަރުންނަށާއި، ޤުރުއާން ހިތުދަސްކޮށް ޙާފިޡްކަމުގެ ސަނަދު ހާސިލްކުރާ ހދ.އަތޮޅުގެ ފަރާތްތަކަށެވެ.

5. ހިންގުންތެރިކަމުގެ އިނާމު

މިއިނާމު ދެވޭނީ މިނިސްޓްރީ އޮފް އެޑިޔުކޭޝަނުން ކަނޑައަޅާފައިވާ އުޞޫލުތަކުގެ ދަށުން "އެޗީވްމަންޓް އެވާޑް" އާއި "ޕްރޮގްރެސް އެވާޑް" ޙާޞިލްކުރާ ސްކޫލްތަކަށާއި، ހދ.އަތޮޅު ކައުންސިލްތަކުން ރަށު ތަރައްޤީ އަށާއި ހިންގުމުގެ ދާއިރާއިން އެންމެ ފާހަގަކޮށްލެވޭ 3 ރަށުކައުންސިލަކަށާއި، ހދ.އަތޮޅުގެ ރަށްރަށުގައި އިންތިޚާބުކޮށްފައިވާ އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ ތެރެއިން އަންހެނުންގެ ތަރައްޤީއަށާއި ހިންގުމުގެ ދާއިރާއިން އެންމެ ފާހަގަކޮށްލެވޭ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށާއި، ރަޖިސްޓްރީކުރެވިގެން ހދ.އަތޮޅުގެ ރަށްރަށުގައި ހިންގަމުންދާ ކުލަބް ޖަމްޢިއްޔާތަކުގެ ތެރެއިން ރަށު ތަރައްޤީއަށާއި، ހިންގުމުގެ ދާއިރާއިން އެންމެ ފާހަގަކޮށްލެވޭ  3ކުލަބް، ޖަމްޢިއްޔާއަކަށެވެ.