ޕެސްޓިސައިޑު އެތެރެކުރާ ފަރާތްތަކުގެ ސަމާލުކަމަށް

ދިވެހިރާއްޖެ އެތެރެކުރެވޭ ހާރބިސައިޑެއް (ވިނަ މަރާބޭސް) ކަމުގައިވާ ގްލައިފޮސޭޓް (Glyphosate) އަކީ އިންސާނުންނަށާއި ތިމާވެށްޓަށް ނުރައްކާތެރިކަން ބޮޑު ބޭހެއްގެ ގޮތުގައި މިހާރުވަނީ ބެލެވިފައެވެ. އެންމެފަހުގެ ދިރާސާތަކުން ދައްކާގޮތުގައި ގްލައިފޯސޭޓަކީ، މެއާއި، ކިޑްނީ ފޭލްވުމަށް މަގުފަހިކޮށްދޭ ބޭހެއްގެ އިތުރުން ލިމްފެޓިކް ސިސްޓަމުގައި ކެންސަރ އުފެދުމުގެ ފުރުޞަތު ބޮޑު މާއްދާއެކެވެ. މިކަމަށްޓަކައި މި މިނިސްޓްރީގެ ވެބްސައިޓަށް ލާފައިވާ، ދިވެހިރާއްޖެއަށް އެތެރެކުރުން މަނާ ޕެސްޓިސައިޑްގެ ލިސްޓަށް ގްލައިފޯސޭޓް މިހާރު ވާނީ އިތުރުކޮށްފައެވެ. އަދި 2016 މޭ 01 އިން ފެށިގެން ދިވެހިރާއްޖެއަށް ގްލައިފޯސޭޓް އެތެރެކުރުމަށް ހުއްދަނުދެވޭނެ ވާހަކަ ދެންނެވީމެވެ.

ވީމާ، ޕެސްޓިސައިޑް އެތެރެކުރުމުގައި ކުރިމަތިވެދާނެ ދަތިތަކުން ދުރުހެލިވުމަށްޓަކައި ދިވެހިރާއްޖެއަށް ޕެސްޓިސައިޑް އެތެރެކުރުމަށް އެދި ހުށަހެޅުމުގެ ކުރިންނާއި، އެތެރެކުރުމުގެ ކުރިން މި ލިސްޓު ބެއްލެވުން އެދެމެވެ.