ދިވެހިރާއްޖެއިން ދިރޭ މަސް އެކްސްޕޯޓްކުރާ ފަރާތްތަކުގެ ސަމާލުކަމަށް

މޯލްޑިވްސް ފުޑް އެންޑް ޑްރަގް އޮތޯރިޓީގެ ހަވާލާތުގެ ދަށުން ކުރަމުންދިޔަ ދިރޭ މަސް އެކްސްޕޯޓްކުރުމުގެ އެންމެހާ ކަންތައްތައް، މިވުޒާރާގެ ހަވާލާތަށް ގެނެވުނު ބަދަލަކާއި ގުޅިގެން، 01 ފެބުރުވަރީ 2026އިން ފެށިގެން މިވުޒާރާއަށް ވަނީ ހަވާލުކޮށްފައެވެ. މިގޮތުން، ދިވެހިރާއްޖެއިން ދިރޭ މަސް އެކްސްޕޯޓްކުރުމުގެ ހުއްދަ އަދި ދިރޭ މަސް ޝިޕްމެންޓަށް ދޫކުރެވޭ 'އިންޓަނޭޝަންލް ވެޓެރިނަރީ ހެލްތް ސަރޓިފިކެޓް' ދޫކުރަމުން ގެންދަނީ މިވުޒާރާއިންނެވެ.

މިވުޒާރާގެ އޮންލައިން ޕޯޓަލް (aos.egov.mv) މެދުވެރިކޮށް އެކްސްޕޯޓް ހުއްދައަށް އެދެވޭނެއެވެ. ހުއްދައަށް އެދުމުގެ ކުރިން ނުވަތަ ހުއްދައަށް އެދޭ އިރު މިކަންކަމަށް ސަމާލުކަންދެއްވުން އެދެމެވެ:

• އަލަށް ހުއްދައަށް އެދޭކުންފުންޏެއް ކަމުގައި ވަނީނަމަ، އެ ކުންފުންޏަކާއި ހުއްދައަށް އެދޭ ފަރާތުގެ އީފާސް ލިންކް ކުރެއްވުމަށް، ކުންފުނީގެ ރަޖިސްޓަރީއާއި، ހުއްދައަށް އެދޭ ފަރާތުގެ އައިޑީ ކާޑު ކޮޕީ މިވުޒާރާއަށް މެއިލްކުރުން.
• އެކްސްޕޯޓް ހުއްދަ ދޫކުރެވޭނީ 2-3 ރަސްމީ ދުވަސްތެރޭގައި ކަމަށް ވުމުން، ދުރާލާ އެކްސްޕޯޓް ހުއްދައަށް އެދެން.
• ހުއްދައަށް އެދޭ އިރު އެކްސްޕޯޓްކުރެވޭނެކަމަށް ލަފާކުރެވޭނެ ބާވަތްތަކާއި އަދަދު ހިމެނުން.

މީގެ އިރުތުން، އިންޓަނޭޝަނަލް ވެޓެރިނަރީ ހެލްތް ސަރޓިފިކެޓް ދޫކުރެވޭނީ މިވުޒާރާގެ ވެޓެރިނޭރިއަން އެއް އެއަރޕޯޓަށް ހާޒިރުވެ، ޝިޕްމެންޓް އިންސްޕެކްޓް ކުރުމަށްފަހުގައެވެ. އެހެންކަމުން، ޝިޕްމެންޓް ތައްޔާރުކުރުމުގެ މަދުވެގެން 6 ގަޑިއިރު ކުރިން މިވުޒާރާއަށް އަންގަންވާނެއެވެ. އަދި ވެލާނާ އިންޓަނޭޝަނަލް އެއަރޕޯޓަށް ޝިޕްމެންޓް ގެންދެވޭނެ ކަމަށް ލަފާކުރެވޭ ވަޤުތު (ޝިޕްމެންޓް ނޮޓިފިކޭޝަން)، [email protected] އަށާއި [email protected] އަށް މެއިލްއަކުން އަންގަންވާނެއެވެ.

އެހެންކަމުން، ދުރާލާ އެކްސްޕޯޓް ހުއްދަ ނެގުމާއި، ޝިޕްމެންޓް ނޮޓިފިކޭޝަން ފޮނުވުމަކީ މިވުޒާރާގެ ވަރަށް ބޮޑު އެދުމެކެވެ. ނަމަވެސް، ދުރާލާ އެކްސްޕޯޓް ހުއްދަ ނުހޯދާ ނުވަތަ ޝިޕްމެންޓް ނޮޓިފިކޭޝަން ނުފޮނުވާ ޝިޕްމެންޓްތަކަށް އިންޓަނޭޝަނަލް ވެޓެރިނަރީ ހެލްތް ސަރޓިފިކެޓް ދޫކުރުމުގައި ދަތިތަކެއް ކުރިމަތިވާނެކަމާއި މިފަދަ ހާލަތުގައި ބަލާފާސްކުރުން ލަސްވުމުގެ ސަބަބުން އެކްސްޕޯޓްކުރާ ޝިޕްމެންޓްތަކަށް ލިބޭ ގެއްލުމުގެ ޒިންމާ މިވުޒާރާއިން ނުނަގާނެ ވާހަކަ ސަމާލުކަމަށް ދެންނެވީމެވެ.

12 رمضان 1447

01 މާރިޗު 2026