އިޢުލާން

ތުޅާދޫ ބަނދަރަށް ވަންނަ ނެރަށް ވެލިއަރައި، ތިލަވުމާ ގުޅޭ

           މިރަށުގެ ބަނދަރަށް ވަންނަ ނެރަށް ވެލިފައިބާ ނެރު ބެދެމުންދާތީ، ރަށަށް ވަދެ ނިކުމެވާ  އޮޑިދޯނިފަހަރާއި ނެރު ބޭނުންކުރާ އެހެން ފަރާތްތަކުން އެކަމުގެ ޝަކުވާ ވަރަށްބޮޑަށް ކުރަމުން އެބަދެއެވެ. ވަކިން ޚާއްސަކޮށް، މިރަށަކީ މަސްވެރި ރަށަކަށްވެފައި، މަސްވެރިކަންކުރާ އުޅަނދުފަހަރަށް ނެރުން ވަނުމުގައި ދަތިތަކަކާ ކުރިމަތިލާންޖެހި، މަސްވެރިކަމުގެ ދާއިރާގައި ހަރަކާތްތެރިވަމުންދާ އެކިއެކި ވިޔަފާރިތަކަށް އޭގެ ނޭދެވޭ އަސަރު ކުރަމުންގޮސް، ރަށުގެ އިގްތިޞާދަށްވެސް ދަނީ އަސަރު ފޯރަމުންނެވެ. މިގޮތުން، ވޭތުވެދިޔަ ދުވަސްތަކުގައި ބައެއް އުޅަނދުފަހަރު ނެރުން ވަންނަން އުޅުމުގެ ތެރޭގައި ނެރުމައްޗަށް ބީހި، އެކިވަރުގެ ގެއްލުންތައް ވަނީ ލިބިފައެވެ. އަދި، މާލެއިން ރަށަށް މުދާ ގެންނަ ބޯޓުފަހަރު ނެރުން ވަނުމުގައި ދަތިތަކާ ކުރިމަތިވެ އެތައް ވަގުތެއް ހޭދަކުރަންޖެހުމުން، ބޯޓުގައި ގެންނަ ބައެއް ބާވަތްތަކުގެ މުދަލަށް އެކިވަރުގެ ގެއްލުންތައް ލިބި، ރަށަށް ކާބޯތަކެތި ފޯރުކޮށްދިނުމުގައިވެސް ދަތިތައް ދަނީ ކުރިމަތިވަމުންނެވެ. ނެރުގެ މައްސަލައަށް ހައްލެއް ނުގެނެވި ގިނަދުވަސްވަމުންދާނަމަ، ރަށަށް ބޭނުންވާ ކާބޯތަކެތީގެ ދަތިކަން ކުރިމަތިވެ، ނުރައްކާތެރި ހާލަތަކަށް ދިއުމުގެ ނުރައްކާ އެބައޮތެވެ. މީގެ އިތުރުން، ރަށުގައި ސަރުކާރުން ހިންގަމުންދާ ތަރައްޤީގެ ބޮޑެތި މަޝްރޫއުތަކަށް (އެއާޕޯޓު ބިން ހިއްކުމާއި، ހޮސްޕިޓަލް އެޅުންފަދަ މަޝްރޫޢުތަކަށް) ބޭނުންވާ މުދާ ހިފައިގެން އަންނަ އުޅަނދުފަހަރު ނެރުން ވަނުމުގައިވެސް ނުހަނު ގިނަގުނަ ދަތިތަކާ ކުރިމަތިވަމުން ދިއުމުގެ ސަބަބުން އެފަދަ މަޝްރޫއުތަކަށް އެކަމުގެ ހިޔަނި އެޅެމުންދާކަން މި އިދާރާއަށް ވަނީ ފާހަގަކުރެވިފައެވެ. މިފަދަ ކަންކަމުގެ ސަބަބުން، އޮޑިދޯނި ފަހަރު ދުއްވާ ފަރާތްތަކާއި، ވިޔަފާރިވެރިންގެ އިތުރުން އާއްމު ފަރުދުންގެ ގިނަގުނަ ޝަކުވާވެސް ކައުންސިލަށް ދަނީ ލިބެމުންނެވެ.

މި މައްސަލައާ ގުޅިގެން، ނެރު ފުންކޮށްދިނުމަށް އެދި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއަށާއި ދައުލަތުގެ ކަމާގުޅޭ އިދާރާތަކަށް 14 ސިޓީއެއް މި އިދާރާއިން ވާނީ ފޮނުވާފައެވެ. ނަމަވެސް، މިއަދާ ހަމައަށް އައިއިރުވެސް އެކަމަށް އެދެވޭ ޖަވާބެއް ލިބިފައި ނުވާކަން ފާހަގަކުރަމެވެ.

ވީމާ، ބަނދަރު ބޭނުންކުރައްވާ އެންމެހައި ފަރާތްތަކުން މިކަމަށް ސަމާލުވެލެއްވުމަށް އަންގައި އިލްތިމާސްކުރަމެވެ.

މިހެންވެ، މިކަން އާއްމުކޮށް އަންގާ އިޢުލާން ކުރީމެވެ.

15  ޝަޢުބާން 1447