ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) ގެ ދަށުން ބ. ތުޅާދޫގައި އިމާރާތްކޮށްފައިވާ 100 ހައުސިންގ ޔުނިޓު އިމާރާތްކުރުމުގެ މަސައްކަތަކީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށް ގެންގޮސްފައިވާ މަޝްރޫޢެކެވެ. އެގޮތުން ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ކަނޑައަޅާފައިވާ އުސޫލާއި އެއްގޮތަށް ހައުސިންގ ޔުނިޓް ބޭނުންވާ ފަރާތްތަކަށް އެކަމަށް އެދި ހުށަހެޅުމުގެ ފުރުޞަތު ހުޅުވާލައި، އެ އުޞޫލުގެ ދަށުން ހައުސިންގ ޔުނިޓުގެ ބެނިފިޝަރީން ކަނޑައެޅުމަށްޓަކައި ފޯމުތައް އިވެލުއޭޓްކުރުމާއި، ހައުސިންގ ޔުނިޓް ޙަވާލުކުރުމުގެ އެންމެހައި މަސައްކަތްތަކަކީ ކުރީގެ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބ. ތުޅާދޫ ކައުންސިލްގެ އިދާރާއާ ޙަވާލުކޮށްފައިވާ މަސައްކަތްތަކެއްކަން ފާހަގަކުރަމެވެ.

"ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބ. ތުޅާދޫގައި އިމާރާތްކުރާ 100 ހައުސިންގ ޔުނިޓް ދޫކުރުމަށް ހަމަޖެހިފައިވާ އުޞޫލު" އަށް ގެނެސްފައިވާ އިސްލާޙުތަކަކީ ބާޠިލް އިޞްލާޙުތަކެއްކަމަށް ކަނޑައަޅުއްވައިދިނުމަށާއި، އިޞްލާޙުކުރެވިފައިވާ އުޞޫލަށް ބިނާކޮށް 09 އޮކްޓޫބަރު 2023 ގައި ބ. ތުޅާދޫ ކައުންސިލްގެ އިދާރާއިން ޝާއިޢުކޮށްފައިވާ ވަގުތީ ލިސްޓަކީ ބާޠިލް ލިސްޓެއްކަމަށް ކަނޑައަޅުއްވައިދެއްވުމަށް އެދި ބ. ތުޅާދޫ މެޖިސްޓްރޭޓް ކޯޓަށް ހުށަހެޅުނު ނަންބަރު 2024/F12C-CIV/25 ޤަޟިއްޔާގައި އެ ކޯޓުން ޙުކުމްކޮށްފައިވަނީ، ހައުސިންގ ޔުނިޓް ދޫކުރުމާއި ގުޅޭ ގޮތުން ކުރިން ޢާއްމުކޮށްފައިވާ އުޞޫލަށް ގެނެސްފައިވާ ބަދަލުތަކަކީ ޝަރުޢީ އަދި ޤާނޫނީ އުޞޫލުތަކާއި ޚިލާފަށް އަދި މިނިސްޓްރީއިން ދެއްވާފައިވާ ލަފާއާވެސް ޚިލާފަށް ގެނެސްފައިވާ ބަދަލުތަކެއްކަމަށާއި އަދި 11 މެއި 2022 ގައި ޢާއްމުކޮށްފައިވާ އުޞޫލަށް ޢަމަލުކުރުމަށެވެ.

އެގޮތުން ބ. ތުޅާދޫ މެޖިސްޓްރޭޓް ކޯޓުގެ ނަންބަރު 2024/F12C-CIV/25 ޤަޟިއްޔާއިން ޣައިރު ޙާޟިރުގައި ކޮށްފައިވާ ޙުކުމް އިސްތިއުނާފުނުކުރުމަށް 11 ސެޕްޓެންބަރު 2024 ވަނަ ދުވަހު އެ ކައުންސިލް އިދަރާގެ ޢާންމު ޖަލްސާއަކުން ނިންމާފައިވާކަމަށާއި، ހަމައެހެންމެ އެ ޙުކުމް މުރާޖަޢާނުކުރުމަށްވެސް 3 އޮކްޓޫބަރު 2024 ވަނަ ދުވަހު އެ ކައުންސިލް އިދާރާގެ ޢާންމު ޖަލްސާއަކުން ނިންމާފައިވާކަން ފާހަގަކުރަމެވެ. އެހެންކަމުން، ބ. ތުޅާދޫ މެޖިސްޓްރޭޓް ކޯޓުގެ ނަންބަރު 2024/F12C-CIV/25 ޤަޟިއްޔާއިން ކޮށްފައިވާ ޙުކުމަކީ މިހާރު ނިހާއީވެފައިވާ ޙުކުމެއްކަމުގައިވާތީ، އެ ޙުކުމުން "ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބ. ތުޅާދޫގައި އިމާރާތްކުރާ 100 ހައުސިންގ ޔުނިޓް ދޫކުރުމަށް ހަމަޖެހިފައިވާ އުޞޫލު" އަށް ގެނެސްފައިވާ އިސްލާޙުތަކަކީ ބާޠިލް އިޞްލާޙުތަކެއް ކަމަށް ކަނޑައަޅާފައިވުމުން، ރުޖޫޢަވާންޖެހޭނީ 11 މެއި 2022 ވަނަ ދުވަހު ޢާންމުކޮށްފައިވާ އުޞޫލަށް ކަމާއި، 21 ޖުލައި 2022 ގެ ނިޔަލަށް ހުށަހަޅާފައިވާ ފޯމުތައް އަލުން އިވެލުއޭޓްކުރުމަށް މި މިނިސްޓްރީއިން ބ. ތުޅާދޫ ކައުންސިލްގެ އިދާރާއަށް އަންގާފައިވާނެއެވެ.

ސަރުކާރުގެ ސިޔާސަތަކީ ބޯހިޔާވަހިކަމަށް ބޭނުންޖެހިފައިވާ ފަރާތްތަކަށް ވީ އެންމެ އަވަސް ފުރުޞަތެއްގައި ބޯހިޔާވަހިކަން ފޯރުކޮށްދެވޭކަން ކަށަވަރުކުރުން ކަމަށްވާއިރު، "ސަރުކާރުގެ ބޯހިޔާވަހިކަމުގެ ސިޔާސާތުގެ ދަށުން ބ. ތުޅާދޫގައި ޢިމާރާތްކުރާ 100 ހައުސިންގ ޔުނިޓް ދޫކުރުމަށް ހަމަޖެހިފައިވާ އުޞޫލު" އަކީ 2022 ވަނަ އަހަރު ޝާއިޢުކުރެވިފައިވާ އުޞޫލަކަށްވެފައި، އެ އުސޫލަށް ގެނެވުނު އިސްލާހުތަކަކީ ޤާނޫނާއި ގަވާއިދާ ޚިލާފަށް ގެނެސްފައިވާ އިސްލާހުތަކެއް ކަމަށާއި އަދި އުސޫލުގެ ދަށުން ހުށަހަޅާފައިވާ ފޯމުތައް ވެރިފައިކުރުމުގައި އެއްހަމައަކުން ޢަމަލުކޮށްފައިނުވާތީކަމަށް ބުނެ އެކި ފަރާތްތަކުން ޝަރުޢީ ކޯޓަށް އެކި ދަޢުވާތައް ހުށަހަޅުމުގެ ސަބަބުން މިއަދާ ހަމައަށްވެސް ހައުސިންގ ޔުނިޓު ޙަވާލުކުރުމުގެ މަސައްކަތް ވަނީ ވަރަށް ބޮޑަށް ލަސްވެފައިކަން ފާހަގަކުރަމެވެ. އެގޮތުން ޝަރުޢީ ކޯޓަށް ހުށަހެޅިފައިވާ މައްސަލަތަކަށް ބަލާއިރު މައިގަނޑު ގޮތެއްގައި ފާހަގަކުރެވިފައިވާ މައްސަލައަކީ ފޯމުތައް އިވެލުއޭޓްކުރުމުގައި ބ.ތުޅާދޫ ކައުންސިލްގެ އިދާރާއިން ޢަމަލުކޮށްފައިވަނީ 11 މެއި 2022 ވަނަ ދުވަހު ޢާންމުކޮށްފައިވާ އުޞޫލާއި، މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އުޞޫލުގެ މާއްދާތަކަށް ޢަމަލުކުރުމުގައި ރިޢާޔަތްކުރުމަށް އަންގާފައިވާ ކަންކަމާއި ޚިލާފަށް ފޯމުތައް އިވެލުއޭޓްކޮށްފައިވާ މައްސަލަތަކެވެ.

މި މިނިސްޓްރީގެ އަމާޒަކީ ވީ އެންމެ އަވަސް ފުރުޞަތެއްގައި ބ. ތުޅާދޫގައި އިމާރާތްކޮށްފައިވާ 100 ހައުސިންގ ޔުނިޓްތައް ޙައްޤުވެރިންނަށް ޙަވާލުކުރުން ކަމުގައިވާތީ، ބ.ތުޅާދޫ ކައުންސިލްގެ އިދާރާއިން 18 ސެޕްޓެންބަރު 2025 ގައި އިޢުލާނުކޮށްފައިވާ ދާއިމީ ލިސްޓު ބާޠިލުކުރުމަށްފަހު، 11 މެއި 2022 ވަނަ ދުވަހު ޢާންމުކޮށްފައިވާ އުޞޫލާއި އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އުޞޫލުގެ މާއްދާތަކަށް ޢަމަލުކުރުމުގައި ރިޢާޔަތްކުރުމަށް އަންގާފައިވާ ކަންކަމަށް ރިޢާޔަތްކޮށް، ފޯމުތައް ރީ-އިވެލުއޭޓްކުރުމަށްފަހު މި މިނިސްޓްރީއަށް އަންގައިދިނުމަށް މި މިނިސްޓްރީއިން ބ. ތުޅާދޫ ކައުންސިލްގެ އިދާރާގައި އެދިފައިވާނެއެވެ. އެހެންނަމަވެސް، ބ.ތުޅާދޫ ކައުންސިލް އިދާރާއިން މި މައްސަލަ އަވަހަށް ޙައްލުކުރުމަށްޓަކައި އެއްބާރުލުންދީފައިނުވެއެވެ.

ދެންނެވުނު ފަދައިން މި މައްސަލައެއް އެއްވެސް ޙައްލެއް ބ. ތުޅާދޫ ކައުންސިލުގެ އިދާރާއިން ހުށަހަޅާފައިނުވާކަމާއި އަދި އުޞޫލާ ޚިލާފަށް ފޯމުތައް އިވެލުއޭޓްކޮށްފައިވުމުގެ ސަބަބުން، ހައުސިންގ ޔުނިޓްތައް އެއްވެސް ފަރާތަކަށް ދޫނުކުރެވި ލަސްވާ ލަސްވުމަކީ، ދެންނެވުނު ސަރުކާރުގެ އަމާޒަށާއި، ސިޔާސަތު ތަންފީޛުކުރުމަށް އެޅޭ ހުރަހެއްކަން މި މިނިސްޓްރީން ދެކެމެވެ. މީގެ އިތުރުން، އެ ޔުނިޓުތައް ލިބެންޖެހޭ ފަރާތްތަކުގެ ޙައްޤު ގެއްލިގެން ދާނެ ކަމެއްކަމާއި، ޢިމާރާތްކޮށްފައިވާ ހައުސިންގ ޔުނިޓުތައް ބޭނުންނުކުރެވި ގިނަ ދުވަސްވާނަމަ ޢިމާރާތަށް ގެއްލުންލިބި އެތަނުގައި ހުރި ތަކެތި ހަލާކުވުމުގެ މައްސަލަތައް ދިމާވުމާއި އޭގެ ސަބަބުން ޔުނިޓުތައް ޙަވާލުކުރުމުގެ ކުރިން ޢިމާރާތްތައް މަރާމާތުކޮށް ބެލެހެއްޓުމަށްވެސް ގިނަ ޚަރަދުތަކެއް ހިނގާނެ ކަމާއި، އެއީ ދައުލަތަށް ލިބެމުންދާ އިޢާދަނުކުރެވޭނެ ފަދަ ގެއްލުމެއްކަން ފާހަގަކުރަމެވެ.

އެހެންކަމުން، މި މިނިސްޓްރީއިން އެދިފައިވާ ފަދައިން، ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބ. ތުޅާދޫގައި އިމާރާތްކޮށްފައިވާ 100 ހައުސިންގ ޔުނިޓު ޙަވާލުކުރުމުގެ މައްސަލައަށް ޙައްލެއް ހޯދޭނެ އެއްވެސް މަގެއް ބ. ތުޅާދޫ ކައުންސިލްގެ އިދާރާއިން ހުށަހަޅާފައިނުވާތީއާއި އަދި މި މިނިސްޓްރީން އަންގާފައިވާގޮތަށް ޢަމަލުކޮށްފައިނުވާތީ، "ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބ. ތުޅާދޫގައި އިމާރާތްކުރާ 100 ހައުސިންގ ޔުނިޓް ދޫކުރުމަށް ހަމަޖެހިފައިވާ އުޞޫލު" ގެ ދަށުން ހައުސިންގ ޔުނިޓުގެ ބެނިފިޝަރީން ކަނޑައެޅުމަށްޓަކައި މި މިނިސްޓްރީން ބ.ތުޅާދޫ ކައުންސިލާ ހަވާލުކޮށްފައިވާ ޒިންމާއާއި، މަސްއޫލިއްޔަތްތަކާއި އަދި އެންމެހާ މަސައްކަތްތައް ނިމުމަކަށް ގެނެސްފައިވާކަމުގައި ދެންނެވީމެވެ. އަދި ބ.ތުޅާދޫގައި އިމާރާތްކޮށްފައިވާ 100 ހައުސިންގ ޔުނިޓު ދޫކުރުމުގެ މަސައްކަތްތައް ދެން ކުރިއަށް ގެންދާނީ މި މިނިސްޓްރީއިން އެކުލަވާލައި، ދިވެހިސަރުކާރުގެ ގެޒެޓުގައި ޝާއިޢުކުރާ އުސޫލާ އެއްގޮތަށް ފޯމު ހުށަހަޅާ ފަރާތްތަކުގެ މެދުގައިކަމާއި، ފޯމުތައް އިވެލުއޭޓްކުރުމާއި، ހައުސިންގ ޔުނިޓް ޙަވާލުކުރުމުގެ އެންމެހައި މަސައްކަތްތައް ކުރިއަށްގެންދާނީ މި މިނިސްޓްރީއިން ކަމުގައި ދަންނަވަމެވެ. އެގޮތުން، އެ މަސައްކަތާއި ގުޅިގެން ކުރަންޖެހޭ އެންމެހާ މަސައްކަތްތައް މި މިނިސްޓްރީން ފަށާފައިވާކަމުގައިވެސް ދަންނަވަމެވެ.

ވީމާ، މިކަން ޢާންމުކޮށް އަންގާ އިޢުލާންކުރީމެވެ.