1. 1.      ތަޢާރަފް: 

 

1.1    މިއީ މާޅޮސްމަޑުލު ދެކުނުބުރީ އަތޮޅުކައުންސިލް އިދާރާއިން އެހީހޯދުމަށް އެދޭ ފަރާތްތަކަށް އެހީދެވޭނެ ގޮތުގެ  އުޞޫލެވެ.

 

1. 2.      މަޤްޞަދު:

 

2.1    ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ 9 ވަނަ މާއްދާގެ (ބ) ގައިވާ ގޮތުން  އަތޮޅުގެ ރަށުކައުންސިލްތަކަށް ބޭނުންވާ ފަންނީ އަދި މާލީ އެހީ ފޯރުކޮށްދިނުމުގައި އަތޮޅު ކައުންސިލުން އެހީތެރިވާންޖެހެއެވެ. މިފަދަ އެހީތައް ފޯރުކޮށްދިނުމާއިއެކު، އަތޮޅުގެ ރައްޔިތުންގެ ލާބަޔާއި މަންފާއަށް އެހީތެރިވެދިނުމާއި އަތޮޅުގެ ތަރައްޤީއަށް ރަށްރަށުން ކުރާ މަސައްކަތްތަކުގައި ބައިވެރިވެ، އެހީއެއް ވެދިނުމަކީ އެހީދިނުމުގެ މައިގަނޑު މަޤްޞަދެވެ.

 

1. 3.      އެހީ ދެވޭނެ ދާއިރާތައް:

 

1. ތައުލީމީ ދާއިރާ
2. ދީނީ ހޭލުންތެރިކަން އިތުރުކުރުމުގެ ދާއިރާ
3. އިޖްތިމާއީ ދާއިރާ

3.1   ކުޅިވަރުގެ ދާއިރާ

3.2   އިންސާނީ ވަސީލަތްތައް ތަރައްޤީ ކުރުމުގެ ދާއިރާ

1. ރަށުކައުންސިލަތަކަށް ދެވޭ އެހީ
2. އަންހެނުން ބާރުވެރިކުރުމުގެ ދާއިރާ
3. ޚާއްސަ ހާލަތްތައް
4. ބ އަތޮޅުގެ ރަށްރަށުގެ ކްލަބް ޖަމްޢިއްޔާތަކުން ހިންގާ ޙަރަކާތް ތަކުގައި ބައިވެރިވުމުގެ ގޮތުން މާލީއެހި ދިނުން.
5. ޞިއްޙީ ދާއިރާ.

 

1. 4.      އެހީ ދެވޭނެ ގޮތް:

 

1-      ތައުލީމީ ދާއިރާ

 

1.1  ތައުލީމީ ދާއިރާއިން އެހީ ދެވޭނީ ހަމައެކަނި ސްކޫލްތަކުގެ އަހަރީ އިނާމް ދިނުމަށެވެ. މިގޮތުން ކޮންމެ ސްކޫލެއްގެ އެންމެ ފަޚުރުވެރި ވަނަ ހޯދާ ޘާނަވީ އަދި މަތީ ޘާނަވީ ކުއްޖަކަށް އަތޮޅު ކައުންސިލްގެ ޚާއްޞަ އިނާމެއްގެ ގޮތުގައި ލެޕްޓޮޕެއް ދެވޭނެއެވެ.

 

2-      ޕްރީ ސްކޫލް ތަކަށްދެވޭ މާލީ އެހީ:

 

2.1  ކައުންސިލްތަކާއި އަދި ކުލަބު ޖަމްއިއްޔާތަކުން ރަޖިސްޓްރީކޮށްގެން ހިންގާ ޕްރީ ސްކޫލްތަކަށް އެހީތެރިކަން ފޯރުކޮށްދެވޭނެއެވެ. އެގޮތުން ކޮންމެ ޕްރީ ސްކޫލަކަށް ގިނަވަގެން ދެވޭނީ -/15،000 ރ (ފަނަރަ ހާސް ރުފިޔާ) އެވެ.

 

3-      ދީނީ ހޭލުންތެރިކަން އިތުރު ކުރުމުގެ ދާއިރާ:

 

3.1  ދީނީ ހޭލުންތެރިކަން އިތުރުކުރުމުގެ ހަރަކާތްތަކަށް އެހީ ދެވޭނީ ރަށު ކައުންސިލްގެ ބައިވެރިވުމާއިއެކު ހިންގޭ ހަރަކާތަކަށެވެ. މިގޮތުން ކޮންމެ ރަށަކަށްވެސް ދީނީ ޙަރަކާތްތަކަށް އެހީ ގޮތުގައި އެއް ހަރަކާތަށް އަހަރަކަށް ދެވޭނީ -/3000 ރުފިޔާއެވެ.

 

3.2 ދީނީ ހަރަކާތްތަކުގެ ގޮތުގައި އިސްކަން ދެވޭނީ:-

 

(ހ) ޤުރުއާން މުބާރާތް

(ށ) ދީނީ ދަރުސް ދިނުން

(ނ) ރޯދަމަހު އިމާމުވެ ތަރާވީޙް ނަމާދުކުރުމަށް ހާފިޒުން ގެނައުމަށް

(ރ) މަދަހަ މުބާރާތް

 

4-      އިޖްތިމާއީ ދާއިރާ:

 

4.1    ކުޅިވަރުގެ ދާއިރާ

 

4.1.1        ކުޅިވަރުގެ ދާއިރާއިން އެހީ ދެވޭނީ ރަށު ކައުންސިލް ނުވަތަ ކްލަބް ޖަމިއްޔާތަކުން ހިންގާ ކުޅިވަރު ހަރަކާތްތައް ހިންގުމަށް ކޮންމެ ރަށަކަށް ގިނަވެގެން -/5000 ރ (ފަސްހާސް ރުފިޔާ) އެވެ. މިހަރަކާތްތައް ވާންވާނީ ކައުންސިލްގެ މަސައްކަތު ތާވަލުގައި ހިމެނިފައިވާ ހަރަކާތަކަށެވެ.

 

4.2     އިންސާނީ ވަސީލަތްތައް ތަރައްޤީކުރުމުގެ ދާއިރާ:

4.2.1 އިންސާނީ ވަސީލަތްތައް ތަރައްޤީ ކުރުމުގެ ހަރަކާތްތަކަށް އެހީ ދެވޭނީ ވޮކޭޝަނަލް އަދި ސްކިލް ޑިވަލޮޕްމަންޓްގެ ހަރަކާތްތަކަށެވެ. އެހީ ދިނުމުގައި އިސްކަންދެވޭނީ މުޖުތަމައަށް އެންމެ ބޭނުންވެފައިވާ ނުވަތަ އެހަރަކާތުން ރަށަށް ނުވަތަ އަތޮޅަށް އެންމެ ރަގަޅު ފައިދާއެއް ލިބޭ ހަރަކާތްތަކަށެވެ. މިއެހީ ދެވޭނީ ރަށު ކައުންސިލަކަށް ގިނަވެގެން -/5000 ރ (ފަސްހާސް ރުފިޔާ) އެވެ. ހަރަކާތްތަކުގެ ތެރޭގައި ހިމެނެނީ:-

 

(ހ) ޖަމާއަތްތެރިން ތަމްރީނު ކުރުން.

(ށ) އިމާމުންނާއި ޚަތީބުން ތަމްރީނު ކުރުން.

(ނ) ފަންނީ މީހުން ތަމްރީނު ކުރުން.

 

5-      ރަށު ކައުންސިލްތަކަށް ދެވޭ އެހީ:

5.1 މި އެހީ ދެވޭނީ ކައުންސިލް އިދާރާގެ އެތެރޭގެ ޖާގައިގެ ދަތިކަން ހައްލު ކުރުމަށް ކުރެވޭ މަސައްކަތްތަކުގެ ތެރެއިން ބަޖެޓްގެ ދަތިކަމާހުރެ އެފަދަ ޚަރަދެއް ނުކުރެވޭ ކައުންސިލްތަކަށް އެހީވެދިނުމަށާއި، ރަށުކައުންސިލްތަކުން ހިންގާ ދެމެހެއްޓެނިވި ގޮތުގައި ކައުންސިލަށް އާމްދަނީ ލިބޭ ކަންކަމަށް އެހީވެދިނުމަށެވެ. މި އެހީ ދެވޭނީ އެއަހަރަކު އެހީއަށްއެދި އިޢުލާންކުރުމުން ލިބޭ ޕްރޮޕޯސަލްތައް ދިރާސާ ކުރުމަށްފަހު އެންމެ ރަގަޅު ޕްރޮޕޯސަލް ހުށަހަޅާ 4 (ހަތަރު) ރަށު ކައުންސިލަކަށެވެ. މިގޮތުން ވޭތުވެދިޔަ އަހަރު އެހީ ދީފައިވާ ރަށަކަށް ޖެހިގެން އަންނަ އަހަރު އެހީއެއް ނުދެވޭނެއެވެ. އެހީ ދިނުމަށްޓަކައި އަހަރަކު ބަޖެޓުން ޚަރަދު ކުރެވޭނީ -/200000 ( ދުއިސައްތަ ހާސް ރުފިޔާ ) އެވެ.

6-      އަންހެނުން ބާރުވެރިކުރުވުމަށް ދެވޭ އެހީ:

 

6.1  މި އެހީ ދެވޭނީ އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުން ހިންގާ ހަރަކާތްތަކަށެވެ.  މި އެހީ ދެވޭނީ އެއަހަރަކު އެހީއަށްއެދި އިއުލާންކުރުމުން އެއަހަރަކު ލިބޭ ޕްރޮޕޯސަލްތައް ދިރާސާ ކުރުމަށްފަހު އެންމެ ރަގަޅު ޕްރޮޕޯސަލް ހުށަހަޅާ (5) އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށެވެ. މިގޮތުން ވޭތުވެދިޔަ އަހަރު އެހީ ދީފައިވާ ރަށަކަށް ޖެހިގެން އަންނަ އަހަރު އެހީއެއް ނުދެވޭނެއެވެ. އަންހެނުން ބާރުވެރި ކުރުމަށް އެހީގެ ގޮތުގައި ދެވޭނީ -/10000 ( ދިހަ ހާސް ރުފިޔާ ) އިން ފެށިގެން -/30000 ( ތިރީސް ހާސް ރުފިޔާ ) އާ ހަމައަށެވެ.

 

7-      ޚާއްސަ ހާލަތްތައް:

 

7.1 މި އެހީ ދެވޭނީ ގުދުރަތީ ކާރިސާ ތަކާއި ގުޅިގެން އެރަށަކަށް ދިމާވާ ހާއްސަ ހާލަތްތަކުން އަރައިގަތުމަށް ދެވޭ އެހީއެކެވެ. އެހީ ދިނުމަށްޓަކައި އަހަރަކު ބަޖެޓުން ޚަރަދު ކުރެވޭނީ -/100000 ( އެއްސަތޭކަ ހާސް ރުފިޔާ ) އެވެ.

 

8-      ކްލަބް ޖަމްޢިއްޔާ ތަކުން ހިންގާ ޙަރަކާތްތަކުގައި ބައިވެރިވުމުގެ ގޮތުން ދެވޭ އެހީ:

 

8.1   މިއެހީ ދެވޭނީ ބ އަތޮޅުގެ ރަށްރަށުގެ ކްލަބް ޖަމްޢިއްޔާ ތަކުން އިސްނަންގަވައިގެން އެރަށެއްގެ ތަރައްޤީއަށް ހިންގަވާ ޙަރަކާތްތަކުގެ ތެރެއިން އެރަށަކަށް އެވަގުތަކަށް އެންމެ ބޭނުންތެރި ޙަރަކާތެއް ހިންގަވާ ކްލަބް ޖަމްޢިއްޔާ ތަކަށެވެ. އެހީ ދިނުމަށްޓަކައި އަހަރަކު ބަޖެޓުން ޚަރަދު ކުރެވޭނީ -/45000 ( ސާޅީސް ފަސް ހާސް ރުފިޔާ ) އެވެ.

 

 

9-            ޞިއްޙީ ދާއިރާ:

 

9.1 މިއެހީ ދެވޭނީ ދެވޭނީ އަތޮޅު ރައްޔިތުންނަށް އަތޮޅުގައި ދެވޭ ޞިއްޙީ ޚިދްމަތް ފުޅާ ކުރުމަށް އެހީތެރިކަން ދިނުމަށެވެ. އެހީ ދެވޭނީ އެޚިދުމަތަކަށް އެއަހަރެއްގެ ބަޖެޓްގައި ކަނޑައަޅާ މިންވަރަކަށެވެ.

 

10- އެހީއަށް އެދި ހުށަހެޅުން:

 

10.1އިޢުލާން ކޮށްގެން ހުޅުވާލެވޭ އެހީގެ ފުރުސަތުތަކަށް ކޮންމެ އަހަރެއްގެ ފެބުރުވަރީމަހު ހުޅުވާލާ 2 (ދޭއް) މަސްދުވަހުގެ މުއްދަތެއް ދޭންވާނެއެވެ. އަދި އެހީއަށް އެދި ހުށަހަޅާ ޕްރޮޕޯސަލްތައް އިވެލިއޭޓްކޮށް ލަސްވެގެން 1 ( އެކެއް ) މަސްދުވަހުގެ ތެރޭގައި ގޮތެއް ނިންމަންވާނެއެވެ.

10.2އެހީއަށް އެދި ހުށަހަޅުއްވަންވާނީ، މިއުޞޫލުގެ ޖަދުވަލު 1 ގައިވާ " އެހީއަށް އެދޭ ފޯމް" މެދުވެރިކޮށް ފޯމްގައިވާ ހުރިހާ މައުލޫމާތެއް ފުރިހަމަ ކޮށް ރަސްމީ ގަޑީގައެވެ.

10.3ހުރިހާ ފަރާތްތަކުންވެސް އެހީއަށް އެދި ހުށަހަޅަންވާނީ އެ ފަރާތެއް ނިސްބަތްވާ ރަށެއްގެ ރަށުކައުންސިލްގެ ބަޔާނާއި އެކު ރަށުކައުންސިލުގެ ތައްގަނޑު ޖެހުމަށްފަހު، ރަށުކައުންސިލް މެދުވެރިކޮށެވެ.

10.4އެހީއަށްއެދޭއިރު ފޯމުގައި އެހީއަށް އެދިލައްވާ ފަރާތެއްގެ ތައްގަނޑު (ސްޓޭމްޕް) ޖެހިފައި އޮންނަންވާނެއެވެ.

10.5ކައުންސިލުން ގޮތެއް ނިންމުމުގައި، އިތުރު މައުލޫމާތު ބޭނުންވާ ފަދަ ހަރަކާތްތަކާއި މަޝްރޫޢުތަކަށް އެހީއަށް އެދި ހުށަހަޅުއްވާއިރު، މިފަދަ  މަޝްރޫޢުތަކާއި / ޙަރަކާތްތަކާއި ގުޅުންހުރި އިތުރު މަޢުލޫމާތު ހިމެނޭ ލިޔުންތައްވެސް ހުށަހަޅަންވާނެއެވެ.

10.6އެހީއަށްއެދި ހުށަހަޅާ ފޯމްގެ ހުރިހާ މަޢުލޫމާތު ފުރިހަމަނުވާނަމަ، ފޯމްތައް އިސްލާހްކުރުމަށް 7 ދުވަހުގެ (ރަސްމީ ބަންދު ދުވަސްތައް ނުހިމަނާ) މުއްދަތެއް ދެއްވުމަށް ފަހު ރަށު ކައުންސިލްތަކަށް އެންގޭނެއެވެ.

 

11- އެހީދިނުން:

 

11.1 އެހީދެވޭނީ އެއަހަރަކަށް ފާސްކޮށްފައިވާ ބަޖެޓުން އެހީދިނުމަށް ކަނޑައެޅިފައިވާ މިންވަރަކަށެވެ.

11.2 އެހީ ދިނުމުގައި ލޯކަލް ކައުންސިލް ތަކުގެ ޕާފޯމަންސް އިންޑެކްސް އަށް އެ ހަރަކާތަކުން އަސަރު ކުރާ  މިންވަރަށް ބަލާ އިސްކަންދެވޭނެއެވެ. އަދި މި ހަރަކާތަކީ ކައުންސިލްގެ ވޯކް ޕްލޭންގައި އެއަހަރު ކުރުމަށް ތާވަލް ކުރެވިފައިވާ ކަމަކަށް ވާންވާނެއެވެ.

11.3 އެހީ ދިނުމުގައި މާލީ ގޮތުން ދަތިކަން ހުރި ކައުންސިލްތަކާއި އަންހެނުން ތަރައްގީއަށް މަސައްކަތް ކުރާ ކޮމިޓީތަކަށް އިސްކަން ދެވޭނެއެވެ.

11.4 މުޖްތަމަޢުއަށް އެހަރަކާތަކުން ފައިދާ ކުރާނެ މިންވަރު

11.5 އެހީ ހޯދައިގެން ހިންގޭ މަޝްރޫޢުއެއްގައި ރަށު ކައުންސިލުގެ ހިއްސާވާ މިންވަރު - މިގޮތުން ރަށުކައުންސިލްގެ ޙިއްޞާބޮޑު ނުވަތަ ރަށުކައުންސިލުން އެކަމެއް ޙާޞިލުކުރަން ބޭނުންވެ، މުހިންމު ކަމެއްގެ ގޮތުގައި ފާހަގަކުރާ ކަންކަމަށް އިސްކަންދެވޭނެއެވެ.

11.6 މިއުޞޫލުތަކުގެ ދަށުން އެހީދޭނެ ފަރާތްތައް ކަނޑައަޅާނީ، އެހީއަށްއެދިފައިވާ މަޝްރޫޢުގެ ފޯރމާއި އެހެނިހެން ލިޔުންތައް ދިރާސާކުރުމަށްފަހު، އަތޮޅު ކައުންސިލުން ކަނޑައަޅާ ކޮމިޓީއަކުންނެވެ. އަދި ކޮމިޓީގެ ނިންމުން އެރަށެއްގެ ރަށުކައުންސިލަށް އެންގޭނެއެވެ.

11.7 މިއުޞޫލުތަކުގެ ދަށުން އެހީދެވިފައިވާ ރަށުކައުންސިލަކުން ނުވަތަ ފަރާތަކުން އެހެން މަޝްރޫޢަކަށް / ޙަރަކާތަކަށް އެހީއަށް އެދިލައްވާނަމަ، އެހީ ދެވޭނީ މިއުޞޫލުގެ ދަށުން ފުރިހަމަ ކުރަންޖެހޭ ކަންތައްތަކާއި ފޮނުވަންޖެހޭ ރިޕޯރޓްތައް ފުރިހަމަކޮށް ފޮނުވާފައިވާނަމައެވެ.

 

12- އެހީ ބޭނުންކުރުން:

 

12.1 އެހީގެގޮތުގައި ދެވޭ ތަކެތި / ފައިސާ ބޭނުންކުރަންވާނީ އެހީދިން ކަމެއް ކުރުމަށެވެ.

12.2 އެހީގެ ގޮތުގައި ލިބޭ ތަކެތި ނުވަތަ ފައިސާ ބޭނުންކުރުމަށްފަހު، އެހީ ބޭނުންކުރި ގޮތުގެ ތަފްސީލް ރިޕޯޓް ގިނަވެގެން 1 މަސް ދުވަހުގެ ތެރޭގައި ރަށުކައުންސިލް އިދާރާ މެދުވެރިކޮށް އަތޮޅު ކައުންސިލް އިދާރާއަށް ހުށަހަޅަންވާނެއެވެ.

12.3 އެހީދެވިފައިވަނީ ކުލަބް، ޖަމްޢިއްޔާ ނުވަތަ އެނޫންވެސް ފަރާތަކަށްނަމަ، ދެވުނު އެހީ ބޭނުންކުރަމުންދާގޮތް ކޮންމެ މަހަކު 1 ފަހަރު ރަށުކައުންސިލް މެދުވެރިކޮށް މޮނީޓަރ ކުރެވޭނެއެވެ.

 

13- އިތުރު ބަޔާން:

 

13.1          މި އުޞޫލުގައި ނުހިމެނޭކަމެއް ދިމާވެއްޖެނަމަ އެކަމާއި ގުޅޭގޮތުން ގޮތެއްނިންމާނީ އަތޮޅު ކައުންސިލުންނެވެ.

13.2          މި އުޞޫލުތަކަށް ބަދަލުގެނައުމާއި މާއްދާތައް އުނިއިތުރުކުރުމަށް ކައުންސިލްގެ ޖަލްސާއަކުން ފާސްކޮށް ނިންމުމުގެ އިޚްތިޔާރު އަތޮޅު ކައުންސިލަށް ލިބިގެންވެއެވެ. އަދި މިގޮތަށް ގެނެވޭ ބަދަލުތަކާއި ނިންމުން ރަށުކައުންސިލްތަކަށް އެންގޭނެއެވެ.

 

29 ޖަނަވަރީ 2025