މި ކައުންސިލާއި ޖަމްޢިއްޔަތުލް އިންތިބާހުން އިންތިޒާމްކޮށްގެން ކިނބިދޫ ދާއިރާގެ ރަށްތަކާއި ތ. ވޭމަންޑޫއަށް ހުޅުވާލައިގެން މިއަހަރުގެ ރަމަޟާންމަހުގެ ފުރަތަމަ ހަފްތާގައި ޤުރްއާން މުބާރާތެއް ބޭއްވުމަށް ވަނީ ހަމަޖެހިފައެވެ. މި ޤުރުއާން މުބާރާތުގައި ބައިވެރިވުމަށް ފޯމު ހުށަހެޅުމުގެ ފުރުޞަތު ރަށުގެ ރަށްވެހިންނަށާއި އާންމުކޮށް ރަށުގައި ދިރިއުޅޭ ފަރާތްތަކަށް މިއަދުން ފެށިގެން 10 ފެބުރުވަރީ 2025 ވާ ހޯމަ ދުވަހުގެ 14:00 އާ ހަމައަށް ހުޅުވާލަމެވެ. ހިރިލަންދޫ ފިޔަވައި މި ދާއިރާގެ އެހެން ރަށްތަކުން ބައިވެރިކުރާ ފަރާތްތަށް ކަނޑައަޅާނީ އެ ރަށްތަކުގެ ރަށު ކައުންސިލްތަކުންނެވެ. މުބާރާތް ކުރިއަށް ގެންދިއުމަށް ހަމަޖެހިފައިވަނީ ތިރީގައިވާ ޢާންމު ޤަވާޢިދުތަކާ އެއްގޮތަށެވެ:

1. ތައާރަފު

މި ޤުރްއާން މުބާރާތަކީ ކޮޅުމަޑުލު ހިރިލަންދޫ ކައުންސިލާއި ޖަމްޢިއްޔަތުލް އިންތިބާހު ގުޅިގެން ހިރިލަންދޫ އާއި އަދި އަވަށްޓެރި ރަށްތަކަށް ފުރުޞަތު ހުޅުވާލައިގެން ސިލްސިލާކޮށް ބާއްވާ ޤުރްއާން މުބާރާތެކެވެ. ހިރިލަންދޫ ކައުންސިލުން ކުރިން ބާއްވާމުން އައި މުބާރާތްތައް ރަށަށް ޚިދުމަތް ކުރައްވާފައިވާ އެކިއެކި ފަރާތްތަކަށް ޚާއްޞަކުރަމުން އައި ގޮތަށް މި ޤުރްއާން މުބާރަތްތަކުގެ ސިލްސިލާ ވެސް ޚާއްޞަކުރެވިގެންދާނީ އެކިއެކި ޚިދުމަތްތެރިންނަށެވެ. މިގޮތުން ، މިއަހަރުގެ މުބާރާތް ޚާއްޞަކުރެވިފައިވަނީ ތުއްތު ކުދިންނަށް ޤުރްއާނުގެ ޢިލްމު އުންގަންނައިދިނުމަށް ގިނަ ދުވަސްތަކެއް ވަންދެން މަސައްކަތްކުރައްވާފައިވާ ފަރާތެއްކަމަށްވާ އަލްމަރްޙޫމާ ޙަފްޞާ އިސްމާޢީލަށެވެ. މި ޤަވާއިދަކީ މި އަހަރު ބޭއްވުމަށް ހަމަޖެހިފައިވާ ޤުރްއާން މުބާރާތުގެ އާންމު ގަވާއިދެވެ.

2.މުބާރާތުގެ މަގުސަދު

މި މުބާރާތަކީ ރައްޔިތުންގެ މެދުގައި ކީރިތި ޤުރްއާނަށް އޮންނަ ޝައުޤުވެރިކަމާއި ލޯބި އިތުރުކޮށް، ތަޖުވީދުގެ ހަމަތަކާ އެއްގޮތަށް ރީތިކޮށް ޤުރްއާން ކިޔެވުމުގެ އާދަ ރަށުގެ ރައްޔިތުންގެ މެދުގައި އާލާ ކުރުމުގެ މަގުސަދުގައި ބާއްވާ މުބާރާތެކެވެ. އަދި އަވައްޓެރި ރަށްރަށް ހިމެނޭނެހެން މި ސަރަޙައްދުގައި ވާދަވެރި ޤުރްއާން މުބާރާތެއް ބާއްވައި، ފެންވަރު ރަނގަޅު ޤާރީވެރިން އުފެއްދުމަކީވެސް މި މުބާރާތުގެ އެއް މަގުސަދެވެ.

3. މުބާރާތް ހުޅުވާލެވިފައިވާ ފަރާތްތައް

 މި މުބާރާތް އާންމުކޮށް ހުޅުވާލައިފައިވަނީ ކޮޅުމަޑުލު ހިރިލަންދޫ އަށް ނިސްބަތްވާ ފަރާތްތަކަށާއި އާންމުކޮށް ހިރިލަންދޫގައި ދިރިއުޅޭ ފަރާތްތަކަށެވެ. މީގެ އިތުރުން، ވޭމަންޑޫ،ކިނބިދޫ،އޮމަދޫ،ވަންދޫ އަދި ކަނޑޫދޫ އިން ކޮންމެ ރަށަކުން ވެސް ޖުމްލަ 15 ބައިވެރިންނަށް މި މުބާރާތުގައި ބައިވެރިވުމުގެ ފުރުޞަތު ދެވޭނެއެވެ.

 4. މުބާރާތުގެ ބައިތައް

-          މި މުބާރާތުގައި ހިމެނެނީ ދެ ގޮތްޕެކެވެ. އެއީ ބަލައިގެން ކިޔެވުމުގެ ގޮތްޕާއި ނުބަލައި ކިޔެވުމުގެ ގޮތްޕެވެ. ކޮންމެ ބައިވެރިއަކަށް ބޭނުންނަމަ ދެގޮފީގައިވެސް ނުވަތަ ޚިޔާރުކުރާ ކޮންމެވެސް އެއް ގޮތްޕެއްގައި ބައިވެރިވެވޭނެއެވެ.

-          މި މުބާރާތް ބަހާލެވިފައިވަނީ ދެ ބަޔަކަށެވެ. އެއީ؛

ސްކޫލުކުދިންގެ ބައި؛

ޢާންމުންގެބައި؛

• ނުބަލައި ކިޔުމުގެ ބަޔާއި  އަދި ބަލައިގެން ކިޔުމުގެ ބައިގައި ވެސް މުޞްޙަފުން އެ ބައިވެރިޔަކު އިޚްތިޔާރުކުރާ ކޮންމެ ވެސް އެއް ކޮޅަކުން (މުޞްޙަފު ފެށޭކޮޅުން ނުވަތަ ނިމޭކޮޅުން) ބައިވެރިވުމުގެ އިޚްތިޔާރު ބައިވެރިންނަށް ލިބިގެންވެއެވެ.

5.  މުބާރާތުގައި ބައިވެރިވުން

ހިރިލަންދޫ އަށް ނިސްބަތްވާ ފަރާތްތައް

މި މުބާރާތުގައިވާ ހިރިލަންދޫއަށް ނިސްބަތްވާ ފަރާތްތައް ކަނޑައެޅުމުގައި ބަލާނީ ތިރީގައިވާ މިންގަނޑުތަކަށެވެ.

-          ހިރިލަންދޫގެ ރަށްވެހިން؛

-          ހިރިލަންދޫގައި އާންމުކޮށް ދިރިއުޅޭ ފަރާތްތައް؛

-          ހިރިލަންދޫ ސްކޫލްގެ ދަރިވަރުން؛

-          މަންމަ ނުވަތަ ބައްޕަ ހިރިލަންދޫ އަށް ނިސްބަތްވާ ފަރާތްތައް.

އަވައްޓެރި ރަށްތަކުން ބައިވެރިވާ ފަރާތްތައް

-          މި މުބާރާތުގައި ބައިވެރިވުމުގެ ދައުވަތު ވޭމަންޑޫ،ކިނބިދޫ، އޮމަދޫ، ވަންދޫ އަދި ކަނޑޫދޫ ގެ ކައުންސިލްތަކަށް ފޮނުވޭނެއެވެ.

-          އަވައްޓެރި ރަށްތަކުން ބައިވެރިވާނޭ ބައިވެރިން ކަނޑައަޅާނީ އެ ރަށެއްގެ ރަށު ކައުންސިލުންނެވެ.

-          މި ރަށްތަކުން ބައިވެރިވުމަށް ފުރުޞަތު ދިނުމަށް ހަމަޖެހިފައިވަނީ ކޮންމެ ރަށަކުންވެސް 15 ބައިވެރިންނަށެވެ. މީގެ ތެރެއިން 10 ޖާގަ ޚާއްސަ ކުރެވިގެންދާނީ އެރަށެއްގެ ސްކޫލުގައި ކިޔަވަމުންދާ ދަރިވަރުންނަށެވެ.

ހިރިލަންދޫ ކައުންސިލުން އެހެން ގޮތަކަށް ކަނޑަނާޅާހައި ހިނދެއްގައި، ސުންގަޑި ހަމަވުމަށްފަހުގައި ފޯމު ހުށަހަޅާ އެއްވެސް ފަރާތަކަށް މުބާރާތުގައި ބައިވެރިވުމުގެ ފުރުޞަތެއް ނުދެވޭނެއެވެ. ނަމަވެސް ސުންގަޑި ހަމަވުމުގެ ކުރިން ހުށަހަޅާފައިވާ ފޯމެއް އިޞްލާޙުކުރުމަށް ނުވަތަ ފުރިހަމަ ކުރުމަށް ފުރުޞަތު ދިނުމަށް މުބާރާތުގެ އިންތިޒާމު ކޮމެޓީއިން ކަނޑައަޅައިފިނަމަ، އެ ފުރުޞަތު ދެވިދާނެއެވެ.

6.  މުބާރާތް ކުރިއަށްދާނޭ ގޮތް

-          މި މުބާރާތް ކުރިއަށްދާނީ 1 ރައުންޑަށެވެ.

-          ބަލައިގެން ކިޔުމުގެ ބައިން ކޮންމެ ބައިވެރިއަކާ ވެސް ކުރެވޭނީ 10 ފޮޅުވަތުގެ އެއް ސުވާލެވެ.

-          ނުބައިލައި ކިޔުމުމުގެ ބައިން ކޮންމެ ބައިވެރިއަކާ  ވެސް 5 ފޮޅުވަތުގެ ދެ ސުވާލުކުރެވޭނެއެވެ.

7.މުބާރާތުގައި ހޮވާ ވަނަތައް

-          ބަލައިގެން ކިޔެވުމުގެ ބައިގެ ކޮންމެ ކެޓަގަރީ އަކުން 1 ވަނަ، 2 ވަނަ އަދި 3 ވަނަ ބައިވެރިޔާ

-          ނުބަލައި ކިޔެވުމުގެ ބައިގެ ކޮންމެ ކެޓަގަރީއަކުން 1 ވަނަ، 2 ވަނަ އަދި 3 ވަނަ ބައިވެރިޔާ

-          ދަރިވަރުންގެ ބައިން މުޅި މުބާރާތުގެ 1 ވަނަ، 2 ވަނަ އަދި 3 ވަނަ ބައިވެރިޔާ

-          އާންމުންގެ ބައިން މުޅި މުބާރާތުގެ 1 ވަނަ، 2 ވަނަ އަދި 3 ވަނަ ބައިވެރިޔާ

-          މުޅި މުބާރާތުން 1 ވަނަ، 2 ވަނަ އަދި 3 ވަނަ ބައިވެރިޔާ

-          މުބާރާތުގެ އެއްވެސް ވަނައަކަށް ހޮވުމުގައި އެއް ބައިވެރިއަކަށްވުރެ ގިނަ ބައިވެރިންގެ އެވްރެޖް މާރކްސް އެއްވަރުވެއްޖެނަމަ ވަނަތައް ތަރުތީބު ކުރުމުގައި:

• ފުރަތަމަ ބަލާނީ ލަޙުނު ޖަލީގެ އެވްރެޖް އަށެވެ. މި ބައިން އެންމެ މަތިން މާރކްސް ލިބިފައިވާ ފަރާތަކަށް ކުރި ލިބޭނެއެވެ.
• ލަޙުނު ޖަލީއަށް ލިބިފައިވާ މާރކްސް ވެސް އެއްވަރުވެއްޖެނަމަ ދެން ބަލާނީ ލަޙުނު ޚަފީގެ އެވްރެޖްއަށެވެ. މި ބައިން އެންމެ މަތިން ލިބިފައިވާ ފަރާތަކަށް ކުރި ލިބޭނެއެވެ.
• ލަޙުނު ޚަފީގެ އެވްރެޖް ވެސް އެއްވަރުވެއްޖެނަމަ ފަޞާޙާގެ ބައިގެ އެވްރެޖަށް ބަލައި އެބައިން އެންމެ މަތިން މާކްސް ލިބިފައިވާ ފަރާތަކަށް ކުރި ލިބޭނެއެވެ.
• ފަޞާޙާގެ ބައި ވެސް އެއްވަރުވެއްޖެނަމަ އަޑާއި ރާގަށް ލިބިފައިވާ މާރކްސްއަށް ބަލައި މި ބައިން މަތިން މާރކްސް ލިބިފައިވާ ފަރާތަކަށް އެ ވަނަ ނުވަތަ މަޤާމް ދެވޭނެއެވެ.
• މި ހުރިހާ ގޮތަކުންވެސް އެއްބައިވެރިއަކަށްވުރެ ގިނަ ބައިވެރިން އެއްވަރުވެއްޖެނަމަ އެ ހުރިހާ ބައިވެރިންނަށް އެ ވަނަ ލިބޭނެއެވެ.

8.މުބާރާތުގެ ހިންގާ ކޮމިޓީ

މި މުބާރާތުގެ އެންމެހައި ކަންތައްތައް ބަލަހައްޓައި ވިލަރެސް ކުރުމަށްޓަކައި ކޮމިޓީއެއް އެކުލަވައިލެވޭނެއެވެ. މުބާރާތާއި ގުޅޭ ހުރިހާ ކަންތައްތަކެއް ހިންގައި ނިންމާނީ މި ކޮމިޓީންނެވެ.

 9.މުބާރާތުގައި ދިމާވާ މައްސަލަ ހުށަހެޅުން

-          މުބާރާތް ހިނގަމުންދާއިރު މުބާރާތުގެ ބައިވެރިއަކަށް ދިމާވާ މައްސަލައެއްގެ ސަބަބުން ޝަކުވާއެއް ހުށަހަޅަން ބޭނުންނަމަ އެ މައްސަލައެއް ދިމާވި ސެޝަން ނިމުމުގެ ކުރިން އިދާރީ މޭޒަށް ޝަކުވާ ހުށަހަޅަން ވާނެއެވެ. ޝަކުވާ ހުށަހަޅާނީ އެ ބައިވެރިއެއްގެ ފަރާތުން (ސްކޫލް ދަރިވަރެއް ނަމަ ބެލެނިވެރިޔާ)، ޝަކުވާ ހުށަހެޅުމަށް ޚާއްސަ ފޯމް މެދުވެރިކޮށެވެ.

-          އެއްވެސް ސަބަބަކާހުރެ އެ ބައިވެރިޔަކު ކިޔެވުމަށް ހަމަޖެހިފައިވާ ދަންފަޅީގައި ކިޔެވޭގޮތް ނުވެއްޖެނަމަ ކިޔަވަން ހަމަޖެހިފައި އޮތް ދަންފަޅި ނިމުމުގެ ކުރިން އިދާރީ މޭޒަށް އެ ސަބަބެއް ބަޔާންކޮށް ޝަކުވާ ހުށަހަޅާ ފޯމް ހުށަހަޅަންވާނެއެވެ.

-          މަތީގައި ބަޔާންކޮށްފައިވާ ޝަކުވާތަކާ ބެހޭގޮތުން ގޮތެއް ނިންމާނީ މުބާރާތުގެ ހިންގާ ކޮމިޓީންނެވެ.

މުބާރާތުގެ ވަނަވަނަ އަށް ކަނޑައެޅިފައިވާ އިނާމު

މީގެ އިތުރުން މުބާރާތުގެ ދެ ބައިގެ ކޮންމެ ކެޓަގަރީއެއްގެ ވެސް ވަނަތައް ހާސިލުކުރާ ފަރާތްތަކަށް ފައިސާގެ އިނާމު / ޓުރޮފީ ދެވޭނެއެވެ.

މި މުބާރާތުގެ ބައިވެރިވުމަށް ހުށަހަޅަންޖެހޭ އޮންލައިން ފޯމުގެ ލިންކު ތިރީގައި އެވަނީއެވެ. ފޯމު ފުރުމުގައި އެއްވެސް ދަތިކަމެއް ދިމާވާނަމަ 9950996 ނަންބަރު ފޯނަށް ގުޅުއްވުން އެދެމެވެ.

https://www.voshufila.com/73/participate