ތަޢާރަފާއި ނަން

މިއީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު ނަންބަރު 2010/7 ގެ 22 ވަނަ މާއްދާގެ (ވ) ގެ މާއްދާގެ ދަށުން ގއ. ވިލިނގިލި ލޭންޑް ޔޫސް ޕްލޭނާއި އަދި ކައުންސިލްގެ ތަރައްޤީގެ ޕްލޭނާއެއްގޮތްވާ ގޮތުގެ މަތިން، ގއ. ވިލިނގިލި ގައި ފަތުރުވެރިކަން ތަރައްޤީކުރުމަށް ކަނޑައަޅާފައިވާ ސަރަހައްދުތަކުން ޓޫރިސްޓް ހޮޓާ އަދި ގެސްޓްހައުސް ތަރައްޤީކޮށް ހިންގުމަށްޓަކައި ކަނޑައަޅާފައިވާ ސަރަހައްދުން ބިން ކުއްޔަށް ދޫކުރުމައްޓަކައި އެކުލަވައިލައިފައިވާ  އުސޫލެކެވެ.

(ހ)

މި އުޞޫލަށް ކިޔާނީ، "ގއ. ވިލިނގިލިން ޓޫރިސްޓް ހޮޓާލާއި ގެސްޓްހައުސްތަކާއި އަދި ފަތުރުވެރިކަމާ ގުޅުންހުރި އެހެނިހެން ވިޔަފާރިތައް ތަރައްޤީކޮށް ހިންގުމަށްޓަކައި ބިން ކުއްޔަށް ދޫކުރުމުގެ އުޞޫލް" އެވެ.

މަޤްސަދު

2.

ގއ. ވިލިނގިލި ގައި ފަތުރުވެރިކަން ތަރައްގީކުރުމަށް ކަނޑައަޅާފައިވާ ސަރަހައްދުން ޓޫރިސްޓް ހޮޓާ އަދި ގެސްޓްހައުސް ތަރައްޤީކޮށް ހިންގުމަށްޓަކައި ކުއްޔަށް ދޫކުރާ ބިންތަކުން ކައުންސިލަށް އާމްދަނީ ހޯދުމަށާއި، އަދި ދެމެހެއްޓެނި ގޮތުގައި ގއ. ވިލިނގިލިގައި ޓޫރިސްޓް ހޮޓާ އަދި ގެސްޓްހައުސް ވިޔަފާރި ހިންގާ ފަރާތްތައް އިތުރުކޮށް އެންމެންގެ މެދުގައި ހަމަހަމަ ފުރުސަތުތަކެއް ފަހިކޮށްދީ އެއްއުސޫލަކުން އަމަލުކުރުމުގެ މަޤްސަދުގައި ކަނޑައެޅިފައިވާ އުސޫލެކެވެ.

އުސޫލު ހިންގާ ފަރާތާއި އަދި އަމަލުކުރަންޖެހޭ ފަރާތް

3.

މިއުޞޫލުގެ ދަށުން ހިންގާ ކަންކަން ތަންފީޒުކޮށް ބަލަހައްޓާނީ ގއ. ވިލިނގިލި ކައުންސިލް އިދާރާ އެވެ. އަދި މިއުޞޫލާ އެއްގޮތަށް އަމަލުކުރަންޖެހޭ ފަރާތަކީ ގއ. ވިލިނގިލި ޓޫރިޒަމް ޒޯން ސަރަހައްދުން ޓޫރިސްޓް ހޮޓާ އަދި ގެސްޓްހައުސް ތަރައްޤީކޮށް ހިންގުމަށްޓަކައި ކުއްޔަށް ބިން ބޭނުންވެގެން ހުށަހަޅާ ފަރާތާއި އަދި ބިންތައް އެވޯޑްކުރެވިގެން އެގުރިމެންޓު ކުރެވޭ ފަރާތްތަކަށެވެ.

ބިން ދޫކުރާ ސަރަހައްދާއި (ޓޫރިޒަމް ޒޯން) ބިމުގެ ބޮޑުމިން

4.

މިއުޞޫލުގެ ދަށުން ކުއްޔަށް ބިންދޫކުރުމަށް ހަމަޖެހިފައިވާނީ ގއ. ވިލިނގިލި ލޭންޑް ޔޫސް ޕްލޭނުގައި ފަތުރުވެރިކަން ތަރައްޤީކުރުމަށް ބިން ކަޑައެޅިފައިވާ 3 (ތިނެއްް) ސަރަހައްދުން 12 (ބާރަ) ބިމެވެ.

(ހ)

މިއުޞޫލުގެ ދަށުން ބިން ދޫކުރުމަށް ހަމަޖެހިފައިވާ ސަރަހައްދުތަކަކީ ގއ. ވިލިނގިލި ދެކޮނު ފަރާތުގެ ބަރާސީލުމަގުގައި ފަތުރުވެރިކަމަށް ކަނޑައަޅާފައިވާ، ގއ. ވިލިނގިލި ލޭންޑް ޔޫސް ޕްލޭނުގެ 71 ވަނަ ނަންބަރުގެ 2 ބްލޮކް އަދި ގއ. ވިލިނގިލި އިރުމަތި ފަރާތުގެ ބޭރުމަގުގައި ފަތުރުވެރިކަމަށް ކަނޑައަޅާފައިވާ، ގއ. ވިލިނގިލި ލޭންޑް ޔޫސް ޕްލޭނުގެ 71 ވަނަ ބްލޮކް އެވެ.

(ށ)

ކުއްޔަށްދޫކުރާ ބިމުގެ ބޮޑުމިން؛

ގއ. ވިލިނގިލި އިރުމަތި ފަރާތުގައި ފަތުރުވެރިކަމަށް ކަނޑައަޅާފައިވާ، ގއ. ވިލިނގިލި ލޭންޑް ޔޫސް ޕްލޭނުގެ 71 ވަނަ ބްލޮކުގެ (25،872 އަކަފޫޓު) ބިން އެއްކޮށް ކުއްޔަށް ދޫކުރުން.

ގއ. ވިލިނގިލި ދެކޮނު ފަރާތުގައި ފަތުރުވެރިކަމަށް ކަނޑައަޅާފައިވާ، ގއ. ވިލިނގިލި ލޭންޑް ޔޫސް ޕްލޭނުގެ 71 ވަނަ ނަންބަރުގެ 2 ބްލޮކުން 11 (އެގާރަ) ބިން ދޫކުރުން.

1 ބިން 400 އަކަފޫޓު

1 ބިން 607 އަކަފޫޓު

1 ބިން 1234 އަކަފޫޓު

1 ބިން 1670 އަކަފޫޓު

1 ބިން 2701 އަކަފޫޓު

6 ބިން 3647 އަކަފޫޓު

ކުއްޔަށް ދޫކުރެވޭ ބިން

5.

މިއުޞޫލުގެ ދަށުން ކުއްޔަށް ދޫކުރުމަށް ހަމަޖެހިފައިވާ ބިންތަކުގެ ޗާރޓް (އެނެކްސް 1 އަދި އެނެކްސް 2) މި އުސޫލާ އެއްކަރުދާސް ކުރެވިފައިވާނެވެ.

ބިން ބޭނުން ކުރެވޭނެ ކަންކަން

6.

މި އުޞޫލުގެ ދަށުން ދޫކުރެވޭ ބިންތަކުގައި ކުރެވޭނެ ވިޔަފާރިއަކީ ޓޫރިސްޓް ހޮޓާ އަދި ގެސްޓްހައުސް އަދި ފަތުރުވެރިކަމާ ގުޅުންހުރި ވިޔަފާރިތަކެވެ.

(ހ)

މި އުޞޫލުގެ ދަށުން ދޫކުރެވޭ ބިމުގައި ކުރެވޭނެ ވިޔަފާރިތައް ތިރީގައި އެވަނީ؛

(ށ)

ކުއްޔަށް ދޫކުރާ ބިމުގެ ތެރެއިން G6، G7، G8، G9، G10  އަދި G11 ނަންބަރުގެ ބިމުގައި

ޓޫރިސްޓް ހޮޓާ ނުވަތަ ގެސްޓްހައުސް ވިޔަފާރިއާ އެއްކޮށް އެހެނިހެން ފަތުރުވެރިކަމާ ގުޅުންހުރި ވިޔަފާރިތައްވެސް ކުރެވޭނެއެވެ.

(ނ)

މި މާއްދާގައި ދެންނެވިފާއިވާގޮތައް އެބިމަކަށް ކަނޑައެޅިފައިވާ ވިޔަފާރި ފިޔަވައި އެހެން އެއްވެސް ވިޔަފާރިއެއް ކުރާނަމަ އެބިމުގެ އެގްރިމެންޓް ބާތިލްކޮށް ބިން ވަކިކުރުމުގެ އިޚްތިޔާރު ކައުންސިލަށް ލިބިގެންވެއެވެ.

ބިމުގައި އަމަލީ މަސައްކަތް ފެށުން

7.

މިއުޞޫލުގެ ދަށުން ކުއްޔަށް ދޫކުރާ ބިމުގެ އަމަލީ މަސައްކަތް އެގްރިމެންޓް ސޮއިކުރާ ދުވަހުން ފެށިގެން 2 (ދޭއް) މަސްދުވަހުގެ ތެރޭގައި ފަށަންވާނެކަމަށް އެގްރިމެންޓުގައި ހިމަނަންވާނެވެ. އެގޮތުން މަސައްކަތް ފަށާނެ ތާރީޚް އަދި ނިމޭނެ ކަމަށް ލަފާކުރާ ތާރީޚް އެގްރިމެންޓުގައި ހިމަނަންވާނެވެ.

(ހ)

މިމާއްދާގައި ދެންނެވިފައިވާ ގޮތަށް އަމަލީ މަސައްކަތް ފަށައި އަދި ނިމޭނެ ކަމަށް ލަފާކުރާ ތާރީޚުގެ މުއްދަތުގެ ތެރޭގައި އަމަލީ މަސައްކަތް ނުފަށައިފި ނަމަ، އެގްރިމެންޓާއި އެއްގޮތަށް މަސައްކަތް ފެށުމަށް 1 (އެކެއް) މަސްދުވަހުގެ ނޯޓިސްއެއް ދޭންވާނެވެ.

(ށ)

މިމާއްދާގައި ދެންނެވިފައިވާ ގޮތަށް އަމަލީ މަސައްކަތް ފަށައި އަދި ނިމޭނެ ކަމަށް ލަފާކުރާ ތާރީޚުގެ ތެރޭގައި އަމަލީ މަސައްކަތް ފަށާފައި، މަސައްކަތް ހުއްޓި ގިނަދުވަސްވާނަމަ، ސަބަބު ބަޔާންކޮށް ކައުންސިލަށް ލިޔުމުން އަންގަންވާނެވެ. އަދި މިގޮތަށް މަސައްކަތް ހުއްޓި އެގްރިމެންޓުގައި މަސައްކަތް ނިމޭނެ ކަމަށް ލަފާކުރާ ތާރީޚާއި ހަމައަށް މަސައްކަތް ކުރިޔަށްނުދާނަމަ، އެގްރިމެންޓާއި އެއްގޮތަށް މަސައްކަތް ކުރިޔަށްގެންދިޔުމަށް 1 (އެކެއް) މަސްދުވަހުގެ ނޯޓިސްއެއް ދޭންވާނެވެ.

(ނ)

މި މާއްދާގެ (ށ) ގައި ދެންވިފައިވާ ގޮތަށް އަމަލީ މަސައްކަތް ހުއްޓި ގިނަދުވަސްވާނަމަ ސަބަބު ބަޔާންކޮށް ކައުންސިލަށް ލިޔުމުން އަންގާ ފަރާތްތަކަށް، އަމަލީ މަސައްކަތް ނިންމުމަށް އިތުރު މުއްދަތު ދެވިދާނެއެވެ.

(ރ)

މި މާއްދާގެ (ހ) އަދި (ށ) ގައި ދެންވިފައިވާ ގޮތަށް އަމަލީ މަސައްކަތް ފެށުމަށް ނޯޓިސް ދިނުމުންވެސް މަސައްކަތް ނުފަށައިފިނަމަ އިތުރު ނޯޓިސްއެއް ދިނުމަކާ ނުލައި އެގްރިމެންޓް ބާތިލްކޮށް އެބިން ވަކިކުރުމުގެ އިޚްތިޔާރު ކައުންސިލަށް ލިބިގެންވެއެވެ. އަދި މިގޮތަށް ބިން ވަކިކުރުމުގައި އެއްވެސް ބަދަލެއް ނުދެވޭނެވެ. 

ބިންތަކުގައި އިމާރާތް ކުރެވޭނެ ގޮތް

8.

މިއުޞޫލުގެ ދަށުން ކުއްޔަށް ދޫކުރާ ބިމުގައި އިމާރާތް ކުރަންވާނީ ގަވާއިދާ އެއްގޮތްވާގޮތުގެމަތީން ކައުންސިލްގެ ހުއްދަ ހޯދައިގެންނެވެ.

(ހ)

1 (އެކެއް) ފަންގިފިލާ އަށްވުރެ ގިނަ ފަންގިފިލާތަކަށް އިމާތްކުރަން ހުއްދަދެވޭނީ މޯލްޑިވްސް ސިވިލް އޭވިއޭޝަން އޮތޯރިޓީ އިން ކަނޑައަޅާފައިވާ މިންގަޑަށެވެ.

(ށ)

ކުއްޔަށް ދޫކުރާ ބިމުގައި އިމާރާތްކޮށް ނިމޭއިރު ބިމުގެ ވަށާ/އިންފާރު 4 (ހަތަރު) ފޫޓަށް ރޭނިފައި ނުވަތަ އެތެރެ ނުފެންނަ ގޮތަށް ބަންދުކުރެވިފައި ހުންނަންވާނެވެ. އަދި ވަކިން ޚާއްސަކޮށް އާއްމުން ދަތުރުކުރާ މަގުތަކާއި އަދި ބޮޑުމަގަށް ވާގޮތަށް ހުންނަ ސަރަހައްދުތައް މިދެންނެވިގޮތަށް އިންފާރު ރޭނިފައި ނުވަތަ އެތެރެ ނުފެންނަ ގޮތަށް ބަންދުކުރެވިފައި ހުންނަންވާނެވެ.

މޫދާއި ބީޗް ބޭނުންކުރުރެވޭނެ ގޮތް

9.

މިއުޞޫލުގެ ދަށުން ކުއްޔަށް ދޫކުރާ ބިންތަކާ ގުޅިފައިވާ މޫދު އަދި ބީޗް ސަރަހައްދު ބޭނުންކުރެވިދާނެއެވެ.

(ހ)

މި މާއްދާގައި ދެންނެވިފައިވާ ގޮތަށް މޫދާއި ބީޗް ބޭނުން ކުރާނަމަ ބީލަމަށް ހުށަހަޅާ ޕްރޮޕޯސަލްގައި މޫދާއި ބީޗް ބޭނުންކުރާނެ ގޮތުގެ ތަފްސީލް ހުށަހަޅަންވާނެވެ.

(ށ)

މޫދާއި ބީޗުގައި ތިމާވެއްޓަށް ގެއްލުންވާ ކަންކަން ކުރުމަކީ މަނާކަމެކެވެ. މިފަދަ ކަމެއްގެ ސަބަބުން ލިބޭ ގެއްލުމުގެ ޒިންމާ ބިން ކުއްޔަށް ހިފާފަރާތުން ނަގަންވާނެވެ.

ބިން ކުއްޔަށް ދޫކުރުމުގައި އަމަލު ކުރަންވިގޮތް

10.

މިއުޞޫލުގެ ދަށުން ބިން ކުއްޔަށް ދޫކުރާނީ ގއ. ވިލިނގިލި ކައުންސިލް އިދާރާއިން އެފުރުސަތު ހުޅުވާލަން އިޢުލާންކޮށް، ޕްރޮޕޯސަލް ހުށަހަޅަގެން ބީލަން އުސޫލުންނެވެ.

(ހ)

ބިން ކުއްޔަށް ދޫކުރުމުގެ އިއުލާނުގައި އަންނަނިވި ކަންކަން ބަޔާން ކުރަންވާނެވެ.

1. ދޫކުރުމަށް ހަމަޖެހިފައިވާ ބިމުގެ ބޮޑުމިން (އަކަފޫޓު)، ބިމުގެ ބާވަތް، ބިމުގައި ކުރެވޭނެ ކަންކަން، ބިންދޫކުރާ މުއްދަތު
2. ދޫކުރުމަށް ހަމަޖެހިފައިވާ ބިން އޮތްތަނުގެ ކުރެހުން މިންތަކާއެކީ
3. ޕޮއިންޓު ދިނުމުގައި އަމަލުކުރާގޮތް
4. ފޯމް ހުށަހަޅަންޖެހޭ މުއްދަތު

ބިމުގެ ކުލި އަދި ބިން ދޫކުރާ މުއްދަތު

11.

މިއުޞޫލުގެ ދަށުން ދޫކުރާ ބިންތަކުގެ އަކަފޫޓަކަށް ނެގޭ އެންމެ ކުޑަ އަގު/ކުލި އަދި ބިން ދޫކުރާ މުއްދަތް ތިރީގައި އެވަނީއެވެ.

ބިން ދޫކުރި މުއްދަތު އިތުރުކުރުން

12.

މި އުޞޫލުގެ ދަށުން ދޫކުރާ ބިމުގެ މުއްދަތް އިތުރު ކުރެވޭނީ އެއް ފަހަރުއެވެ.

(ހ)

މި އުޞޫލުގެ ދަށުން ދޫކޮށްފައިވާ ބިމުގެ މުއްދަތު އިތުރު ކުރެވޭނީ ބިން ހަވާލުވިފަރާތުން، ބިން ދޫކޮށްފައިވާ މުއްދަތު ހަމަވުމުގެ 6 (ހައެއް) މަސް ދުވަހުގެ ކުރިން ކައުންސިލަށް ހުށަހެޅުމުންނެވެ.

(ށ)

މި މާއްދާގެ (ހ) ދަށުން މުއްދަތު އިތުރުކުރުމަށް ކައުންސިލަށް ހުށަހަޅަންވާނީ ރަސްމީ ލިޔުމުންނެވެ. އެގޮތުން މިހާރުގެ ހާލަތާއި އަދި ކުރިއަށް ރޭވިފައިވާ ގޮތުގެ ތަފްސީލް އިނގޭނެގޮތުގެ ޕްރޮޕޯސަލް ހުށަހަޅާގެންނެވެ.

(ނ)

މި މާއްދާގެ (ށ) ގައި ބަޔާންކޮށްފައިވާގޮތަށް މުއްދަތު އިތުރުކުރެވޭނީ ހުށަހަޅާ ޕްރޮޕޯސަލް އިވެލުއޭޓުކޮށް ޕްރޮޕޯސަލްގައިވާ ކަންކަމަށް ރިއާޔަތް ކުރުމަށްފަހުގައެވެ. ޕްރޮޕޯސަލްގައި އަންނަނިވި ކަންކަން ހިމަނަންވާނެވެ.

1. ޕްރޮޕޯސަލްގެ މަޤްސަދާއި ލަނޑުދަޑިތައް

1. ބިން ބޭނުން ކޮށްފައިވާ މިންވަރު (އިމާރާތް ކުރެވިފައިވާ މިންވަރާއި އަދި ހުސްޖާގައިގެ މިންވަރު)

1. ބިމުގައި އިމާރާތް ކުރެވިފައިވާ ތަންތަނާއި އަދި ބިނާތަކުގެ ހާލަތް

1. ބިމުގެ އެއްބަސްވުމާއި ގުޅިގެން ސީއެސްއާރުގެ ހަރަކާތްތަކުގެ ތެރެއިން ކުރެވިފައިވާ ކަންތައްތަކާއި އަދި 5 އަހަރުތެރޭގައި ކުރުމަށް ރާވާ ސީއެސްއާރުގެ ހަރަކާތްތަކުގެ ތަފްސީލް

1. ބިމުގެ ވަށައިގެންވާ މަގުތަކާއި، ބީޗާއި، އަދި އެހެނިހެން ތަންތައް ސާފްކޮށް ބަލަހައްޓާގޮތް

1. ބިމުކުއްޔާ ގުޅިގެން ދައްކަންޖެހޭ އެންމެހާ ކުލި އަދި ޖޫރިމަނާ ދައްކާފައިވުން

(ރ)

މި އުޞޫލުގެ ދަށުން ކުއްޔަށް ދޫކުރާ ބިމުގެ މުއްދަތް ހަމަވުމުގެ 6 (ހައެއް) މަސް ދުވަހުގެ ފަހުން ނުވަތަ އޭގެ ކުރިން އެބިމުގައި ގަވާއިދާ ޚިލާފަށް ނުވަތަ ކައުންސިލުން އަންގާ އެންގުންތަކަށް އަމަލުނުކުރާ ފަރާތްތަކާއި އަދި އެކިފަހަރުމަތިން އިސްލާހު ކުރުމަށް ނަސޭހަތްތެރިވެފައިވާ ފަރާތްތައް، ބިމުގެ މުއްދަތު އިތުރުކުރުމަށް އެދި ހުށަހެޅި ކަމުގައިވިޔަސް އެފަދަ ފަރާތްތަކަށް ދޫކުރެވިފައިވާ ބިމުގެ މުއްދަތު އިތުރު ނުކުރެވޭނެވެ.

(ބ)

މި އުޞޫލުގެ ދަށުން ދޫކުރާ ބިމުގެ މުއްދަތު އިތުރުކުރެވޭނީ 15 (ފަނަރަ) އަހަރު ދުވަހަށެވެ. އަދި މި މުއްދަތު އިތުރުކުރުމުގައި ބިމުގެ ކުއްޔަށް ބަދަލުގެނައުމުގެ އިޙްތިޔާރު ގއ. ވިލިނގިލި ކައުންސިލް އިދާރާއަށް ލިބިގެންވެއެވެ.

(ޅ)

މި މާއްދާގެ (ރ) ގައި ދެންނެވިފައިވާ ގޮތަށް މުއްދަތު އިތުރު ނުކުރާ ބިންތަކާއި އަދި ފުރަތަމަ ފަހަރަށް ބިމުގެ މުއްދަތު އިތުރުކުރުމަށް ފަހު، ދެވަނަ ފަހަރަށް ބިން ނުވަތަ ބިމުގައިވާ އިމާރާތްތައް ކުއްޔަށް ދޫކުރެވޭނީ އިއުލާން ކޮށްގެން ބީލަމުގެ އުސޫލުންނެވެ.

ކުއްޔަށް ދޫކުރެވިފައިވާ ބިން، ބިމުގެ ބައެއް ނުވަތަ ބިމުގައިވާ އިމާރާތެއް އެހެން ފަރާތަކަށް ކުއްޔަށް ދިނުން

13.

މިއުޞޫލުގެ ދަށުން ދޫކުރެވޭ ބިން، ބިމުގެ ބައެއް ނުވަތަ ބިމުގައި އިމާރާތް ކޮށްފައިވާ އެއްވެސް ތަނެއް ކުއްޔަށް ދޫކުރެވެނީ އަންނަނިވި ކަންކަމާއި އެއްގޮތަށެވެ.

(ހ)

ކުއްޔަށް ދޫކުރެވިފައިވާ ބިން، ބިމުގެ ބައެއް ނުވަތަ ބިމުގައި އިމާރާތެއް އެއްވެސް ފަރާތަކަށް ކުއްޔަށް ދޫކުރެވޭނީ، އެކަމަށް އެދި ލިޔުންމުން ގއ. ވިލިނގިލި ކައުންސިލް އިދާރާއަށް ހުށަހަޅައި ލިޔުމުން ހުއްދަ ލިބިގެންނެވެ.

(ށ)

މި މާއްދާގެ (ހ) ގައި ދެންނެވިފައިވާގޮތަށް ކުއްޔަށް ދޫކުރާފަރާތާއެކީ އެގްރިމެންޓެއް ހަދަންވާނެވެ. މިއެގްރިމެންޓުގައި ބިން ކުއްޔަށް ދޫކުރުމަށް މިއިދާރާއިން ހެދިފައިވާ އެގްރިމެންޓުގައިވާ ކަންކަން ހިމަނަންވާނެވެ.

(ނ)

މި މާއްދާގެ (ހ) ގައި ދެންނެވިފައިވާގޮތަށް ކުއްޔަށް ދޫކުރާފަރާތުން ދިވެހިރާއްޖޭގެ ޤާނޫނާއި ގަވާއިދާއި އަދި މިއިދާރާއިން ބިން ކުއްޔަށް ދޫކުރުމަށް ހެދިފައިވާ އެގްރިމެންޓާއި ޚިލާފު އެއްވެސް ޢަމަލެއް ހިންގާނަމަ އެކަމުގެ ޒިންމާ ނަގަންވާނީ ބިން ކުއްޔަށް ހިފި ފަރާތުންނެވެ.

(ރ)

މި މާއްދާގެ (ހ) ގައި ދެންނެވިފައިވާގޮތަށް ކުއްޔަށް ދޫކުރާފަރާތުގެ މައުލޫމާތް (ނަން، އައިޑީ ކާރޑް ނަންބަރ، އެޑްރޭސް، ރަށް، ގުޅޭނެ ފޯން ނަންބަރ، އީމެއިލް) ލިޔުންމުން ގއ. ވިލިނގިލި ކައުންސިލް އިދާރާއަށް ފޮނުވަންވާނެވެ.

ގްރޭސް ޕީރިއަޑް

14.

މި އުޞޫލުގެ ދަށުން ދޫކުރާ ބިންތަކަން ގްރޭސް ޕީރިއަޑެއް ދެވޭނެވެ.

(ހ)

މި އުޞޫލުގެ ދަށުން ބިން ދޫކުރާ ތާރީޙުން ފެށިގެން 1 (އެކެއް) އަހަރު ދުވަހުގެ މުއްދަތުގެ ގްރޭސް ޕީރިއަޑެއް ދޭންވާނެވެ.

(ށ)

މި އުޞޫލުގެ ދަށުންދެވޭ ގުރޭސް ތެރޭގައި ބިމުގައި އިމާރާތްކުރުމުގެ މަސައްކަތް ނިންމަންވާނެވެ.

(ނ)

ގްރޭސް ޕީރިއަޑުތެރޭގައި ބިމުގެ ކުލި ދައްކަން ނުޖެހޭނެއެވެ. ނަމަވެސް  ގްރޭސް ޕީރިއަޑުގެ 2 (ދޭއް) މަސްދުވަހުގެ ތެރޭގައި ބިމުގެ އަމަލީ މަސައްކަތް ނުފަށާ/ނުކުރާނަމަ، ގްރޭސް ޕީރިއަޑުގެ 3 (ތިނެއް) ވަނަ މަހުން ފެށިގެން ބިންކުލި ނެގެންފެށޭނެއެވެ.

އެގުރިމެންޓުގެ މުއްދަތު ހަމަވުމުގެ ކުރިން ބިން ދޫކުރުން

15.

މި އުސޫލާ އެއްގޮތަށް އެގްރިމެންޓްކުރެވިފައިވާ ބިމުގެ މުއްދަދަތް ހަމަވުމުގެ ކުރިން ބިން ދޫކުރެވޭނީ އެކަމަށް އެދި ލިޔުމުން ކައުންސިލަށް ހުށަޅައި ލިޔުމުން ޖަވާބު ލިބުމުންނެވެ.

(ހ)

މިމާއްދާ އެއްގޮތަށް ބިން ދޫކުރުމަށް ކައުންސިލަށް ހުށަހަޅަންވާނީ ބިން ދޫކުރުމަށް ބޭނުންވާ ތާރީޚްގެ 30 ދުވަސް ކުރިންނެވެ.

ޖޫރިމަނާ ކުރުން

16.

މިއުޞޫލުގައި ހިމެނިފައިވާ ކަންކަމާ ޚިލާފުވާ ފަރާތަކާމެދު އެހެން ޤާނޫނަކުން ނުވަތަ ޤަވާއިދަކުން ވަކިގޮތަކަށް ޢަމަލުކުރުމަށް ކަނޑައެޅިފައިނުވާ ކަންކަމުގައި އަންނަނިވި ގޮތަށް ޖޫރިމަނާ ކުރެވޭނެނެއެވެ.

(ހ)

މިއުޞޫލުގައި ހިމެނިފައިވާ ކަންކަމާ ޚިލާފުވާ ފަރާތް ޖޫރިމަނާ ކުރެވޭނީ،

1.  ފުރަތަމަ ފަހަރަށް -/2500 (ދެހާސް ފަސް ސަތޭކަ) ރުފިޔާއެވެ.

1.  ދެވަނަ ފަހަރަށް -/5000 (ފަސް ހާސް) ރުފިޔާއެވެ.

1.  ތިންވަނަ ފަހަރަށް -/10,000 (ދިހަ ހާސް ފަސް ސަތޭކަ) ރުފިޔާއެވެ.

(ށ)

މިމާއްދާގެ (ހ) ގައި ބަޔާންކޮށްފައިވާ ގޮތުގެމަތިން ތިންވަނަ ފަހަރަށް ޖޫރިމަނާކުރުމަށް ފަހުވެސް ކުށް ތަކުރާރު ކޮށްފިނަމަ ރަސްމީ 15 ދުވަހުގެ ނޯޓިސްއެއް ދިނުމަށްފަހު އިތުރު އެންގުމަކާ ނުލާ އެއްބަސްވުން ބާތިލުކުރެވޭނެއެވެ.

(ނ)

މި މާއްދާގެ (ހ) ދަށުން ބާތިލުކުރެވޭ އެއްބަސްވުމާއި ގުޅިގެން، ދޫކުރެވުނު ބިމުގައިވާ އިމާރާތްތަކާއި އަދި ނުއުފުލޭ މުދަލަށް އެއްވެސް ބަދަލެއް ދިނުމަކާ ނުލާ އެބިން ކައުންސިލްގެ ބެލުމުގެ ދަށަށް ގޭނެވޭނެއެވެ.

ކުއްޔަށް ދޫކުރެވިފައިވާ ބިން ކައުންސިލަށް ނެގުން

17.

މި އުސޫލާ އެއްގޮތަށް ދޫކޮށްފައިވާ ބިން ކައުންސިލަށް ނެގޭނީ އަންނަނިވި ހާލަތް ދިމާވުމުންނެވެ.

(ހ)

ކުއްޔަށް ދޫކޮށްފައިވާ ބިމުގެ މުއްދަތު ހަމަވުމުން

(ށ)

ކުއްޔަށް ދޫކޮށްފައިވާ ބިމުގެ މުއްދަތު ހަމަވުމުގެ ކުރިން ބިން ކުއްޔަށް ހިފިފަރާތުން ބިން ދޫކުރުން

(ނ)

މިއުޞޫލާއި، ދިވެހިރާއްޖޭގެ ޤާނޫނާއި ޤަވާއިދުތަކާއި ޚިލާފުވާ ފަރާތައް ޖޫރިމަނާކޮށް، ނޯޓިސް ދިނުމުންވެސް އިސްލާހު ނުކޮށް އެއްބަސްވުން ބާތިލްކުރުން

(ރ)

މި މާއްދާގެ (ހ)، (ށ) އަދި (ނ)  ދަށުންނެގޭ ބިންތަކަށް އެއްވެސް ބަދަލެއް ދޭން ނުދެވޭނެއެވެ.

(ބ)

މި މާއްދާގެ (ހ) ގައި ދެންނެވިފައިވާ ބިން ކައުންސިލަށް ނަގަންބޭނުންވެއްޖެ ހާލަތެއްގައި އެއްބަސްވުމުގެ މުއްދަތު ހަމަވުމުގެ 30 (ތިރީސް) ދުވަހުގެ ކުރިން އެފަރާތަށް ނޯޓިސް އެއް ފޮނުވަންވާނެއެވެ. އަދި މިއުސޫލުގެ 12 ވަނަ މާއްދާގެ (ށ) ގައި ދެންނެވިފައިވާގޮތަށް ބިމުގެ މުއްދަތް އިތުރުކުރަން ހުށަހަޅާފައިވާނަމަ، އެކަމާމެދު ގޮތް ނިންމާނީ ކައުންސިލުންނެވެ.

(ބ)

މިއުޞޫލުގެ ދަށުން ބިން ނެގުމުގެ 10 ދުވަސް ކުރިން ކައުންސިލުން ބިމުގައިވާ އިމާރާތުގެ ހާލަތާއި އަދި ބިމުގައިވާ ހަރުމުދަލުގެ ތަފްސީލް ރިޕޯޓެއް އެކުލަވާލަންވާނެއެވެ. 

ކުއްޔަށް ހިފާ ފަރާތުގެ ޒިންމާ

18.

ބިން ކުއްޔަށް ހިފާފަރާތުން ދިވެހިރާއްޖޭގެ ޤާނޫނާއި ގަވާއިދުތަކާއި އަދި މި އުޞޫލާ އެއްގޮތަށް އަމަލުކުރަންވާނެއެވެ.

(ހ)

ކުއްޔަށް ދޫކުރެވޭ ބިން ބޭނުންކުރަންވާނީ އެބިމެއް ބޭނުން ކުރުމަށް މިއުޞޫލުގައި ކަނޑައެޅިފައިވާ ވިޔަފާރިއަކަށެވެ.

(ށ)

ކުއްޔަށް ދޫކުރެވޭ ބިމަކީ ފަތުރުވެރިކަން ތަރައްޤީކުރުމުގެ ވިޔަފާރިއަށް ދޫކުރެވޭ ބިމަކަށްވާތީ، ބިމުގައި ކުރުމަށް ރާވާފައިވާ ވިޔަފާރި ކުރަންވާނީ ދިވެހިރާއްޖޭގޭ ފަތުރުވެރިކަމާއިބެހޭ ވުޒާރާއިން ކަނޑައަޅާފައިވާ ގަވާއިދުތަކާއި އަދި މި އުޞޫލުތަކާއި އެއްގޮތުގެ މަތިންނެވެ.

(ނ)

ބިން ކުއްޔަށް ހިފާ ފަރާތާއި އަދި ކައުންސިލާ ދެމެދު ހެދިފައިވާ އެގުރިމެންޓާ އެއްގޮތަށް ކަނޑައެޅިފައިވާ ވަގުތުގައި ކުލި ދައްކަންވާނެއެވެ.

(ރ)

ކައުންސިލުން ކަނޑައެޅިފައިވާ އުސޫލުތަކާއި އެއްގޮތަށް ބިމުގެ އިން ވަކިކޮށްގެންނޫނީ އެބިމުގައި އެއްވެސް މަސައްކަތެއް ނުވަތަ މަސައްކަތަށް ބޭނުންވާ ސާމާނެއް  ޖަމާކޮށްގެން ނުވާނެވެ.

(ބ)

ކުއްޔަށް ދޫކުރެވޭ ބިމުގައި ދިވެހިރާއްޖޭގެ ޤާނޫނުނާއި ގަވާއިދުތަކާއި އިސްލާމްދީނުގެ އަސާސްތަކާ ޚިލާފުވާ އެއްވެސް ކަމެއް ނުވަތަ ވިޔަފާރިއެއް ކޮށްގެންނުވާނެއެވެ.

(ޅ)

މިއުޞޫލުގެ ދަށުން ކުއްޔަށް ދޫކުރެވޭ ބިމުގައިކުރާ ވިޔަފަރިއަކާ ގުޅުންހުރި ހުރިހާ ހުއްދައެއް ހޯދުމަކީ ބިން ކުއްޔަށް ހިފާ ފަރާތުގެ މަސްއޫލިއްޔަތެކެވެ.

(ކ)

ކުއްޔަށް ދޫކުރެވޭ ބިމުގައި އިމާރާތްކުރަންވާނީ ދިވެހިރާއްޖޭގޭ ފަތުރުވެރިކަމާއިބެހޭ ވުޒާރާއިން ކަނޑައަޅާފައިވާ މިންގަޑާއެއްގޮތަށް ސަލާމަތީކަންކަން ހިމަނާގެންނެވެ.

ބިން ކުއްޔަށް ހިފުމަށް އެދި ރަޖިސްޓްރީވުން

19.

މިއުޞޫލުގެ ދަށުން  ކުއްޔަށް ދޫކުރުމަށް ހަމަޖެހިފައިވާ ބިންތައް ކުއްޔަށް ހިފުމަށް އެދޭ ފަރާތްތަކުން މިމާއްދާ އެއްގޮތަށް ބީލަމުގައި ބައިވެރިވުމަށް ރަޖިސްޓްރީވާންވާނެއެވެ.

(ހ)

މިއުސޫލުގެ ދަށުން ބިންތައް ކުއްޔަށް ދޫކުރުމަށް ފުރުސަތު ހުޅުވާލައި އިއުލާން ކުރުމުން، އެއިއުލާނުގައި ކަނޑައެޅިފައިވާ ތާރީޚަށް "ބިޑް ރަޖިސްޓްރޭޝަން ފޯމް" ގއ. ވިލިނގިލި ކައުންސިލް އިދާރާއަށް ހުށަހަޅައިގެން ނުވަތަ [email protected] އަށް މެއިލް ކޮށްގެން ރަޖިސްޓްރީ ކުރަންވާނެވެ.

(ށ)

މިއުސޫލުގެ ދަށުން ބިޑް ރަޖިސްޓްރޭޝަން ފީގެ ގޮތުގައި -/1000 ރުފިޔާ ނެގޭނެވެ.

(ނ)

މި މާއްދާގެ (ހ) ގައި ދެންނެވިފައިވާގޮތަށް މެއިލް މެދުވެރިކޮށް ހުށެހެޅޭ " ބިޑް ރަޖިސްޓްރޭޝަން ފޯމް" ގއ. ވިލިނގިލި ކައުންސިލް އިދާރާއަށް ލިބުނުތޯ ކަށަވަރު ކުރުމަކީ ބީލަން ރަޖިސްޓްރީވުމަށް އެދި ފޯމް ހުށަހެޅި ފަރާތުގެ މަސްއޫލިއްޔަތަކެވެ.

(ރ)

" ބިޑް ރަޖިސްޓްރޭޝަން ފޯމް" ހުށަހަޅައި ރަޖިސްޓްރީ މަރުހަލާ ނިމޭނީ މި މާއްދާގެ (ށ) ގައި ބަޔާންކޮށްފައިވާ ބިޑް ރަޖިސްޓްރޭޝަން ފީ (-/1000 ރުފިޔާ) ގއ. ވިލިނގިލި ކައުންސިލް އިދާރާއަށް ދެއްކުމުން ނުވަތަ ކައުންސިލް އިދާރާއިން ފޯރުކޮށްދޭ ބޭންކް އެކައުންޓަށް ޖާމާކުރެވުމުންނެއެވެ.

ބޭންކް އެކައުންޓަށް ޖާމާކުރެވޭ ފައިސާ ޖަމާކުރެވުންތޯ ކައުންސިލް އިދާރާއިން ކަށަވަރު ކުރަންވާނެއެވެ.

(ބ)

ބިޑް ރަޖިސްޓްރޭޝަން މަރުހަލާނިމުމުން "ފަތުރުވެރިކަން ތަރައްޤީކުރުމަށް ކަނޑައަޅާފައިވާ ސަރަހައްދުތަކުން ޓޫރިސްޓް ހޮޓާ އަދި ގެސްޓްހައުސް ތަރައްޤީކޮށް ހިންގުމަށްޓަކައި ބިން ކުއްޔަށް ދޫކުރުމުގެ ބީލަން ޑޮކިއުމެންޓް" ހަވާލުކުރެވޭނެއެވެ. އެގޮތުން މިބީލަން ޑްކިއުމަންޓާއި އެއްގޮތަށް ފްރޮޕޯސަލް ތައްޔާރުކުރަންވާނެއެވެ.

އިކުއިޒިޝަން ފީ ހުށެހެޅުން

20.

އިކުއިޒިޝަން ފީ އަކީ ބިޑު ހުށަހަޅާފަރާތުން ބިޑު ކާމިޔާބު ކުރުމަށްޓަކައި ހުށަހަޅާ ފައިސާގެ އަދަދަކެވެ.

(ހ)

އެކުއިޒިޝަން ފީއެއްގެ ގޮތުގައި ހުށެހެޅޭ އެންމެ ކުޑަ އަގަކީ 10,000.00 (ދިހަހާސް) ރުފިޔާ އެވެ. އިކުއިޒިޝަން ފީ ގެ ގޮތުގައި ހުށަހަޅާ ފައިސާގެ އަދަދަކީ ޕޮއިންޓް ދެވޭނެ ފައިސާގެ އަދަދެކެވެ.  

(ށ)

އެކުއިޒިޝަން ފީ ހުށަހަޅާ ފަރާތުން ބިޑު ކާމިޔާބުކޮށް، ބިޑު އެވޯޑް ނޯޓިފިކޭޝަން ލިބުމުން، އެކުއިޒިޝަން ފީ އެއްގެ ގޮތުގައި ހުށަހަޅާފައިވާ ފައިސާގެ އަދަދު އެއްފަހަރާ ކައުންސިލަށް ދައްކަންވާނެވެ. އަދި އެފަރާތާއި ދެމެދު އެއްބަސަވުމުގައި ސޮއި ކުރާނީ މިދެންނެވި ފައިސާ ދެއްކުމުންނެވެ.

(ނ)

އިކުއިޒިޝަން ފީ ގޮތުގައި ދައްކާ ފައިސާއަކީ އެއްބަސްވުމުގެ ސޮއިކުރުމަށް ފަހުން އަބުރާ ނެގޭނެ ނުވަތަ ރިފަންޑް ކުރެވޭނެ ފައިސާއެއް ނޫނެއެވެ. އަދި މިފައިސާއަކީ ބިމު ކުލީގެ އިތުރުން ކައުންސިލަށް ދައްކަންޖެހޭ ފައިސާއެކެވެ.

ބީލަން ހުށެހެޅުން

21.

މި އުސޫލުގެ ދަށުން ކުއްޔަށް ދޫކުރުމަށް ހަމަޖެހިފައިވާ ބިންތައް ކުއްޔަށް ހިފުމަށް އެދި ބީލަން ހުށެހެޅޭނީ، ބިޑް ރަޖިސްޓްރީވުމަށް އެދޭ ފޯމް ފުރިހަމަކޮށް ހުށަހަޅައި، ބިޑް ރަޖިސްޓްރޭޝަން ފީ ދައްކާފައިވާ ފަރާތްތަކަށެވެ.

(ހ)

ބީލަން ރަޖިސްޓްރީ ނުކުރާ ފަރާތްތަކާއި އަދި ބީލަން ހުށަހަޅަންޖެހޭ ގަނޑިއަށް ހާޒިރުނުވާ ފަރާތްތަކުގެ ބީލަން ހުށެހެޅުމުގެ ފުރުޞަތު ނުދެވޭނެއެވެ.

(ށ)

ބީލަން ހުށެހެޅުމަށް އަންނަނިވި ލިޔުންތަށް ހުށަހަޅަންވާނެއެވެ.

1. ބީލަމަށް ހުށަހަޅަންޖެހޭ ލިޔުންތަކާއި އަދި ޗެކްލިސްޓް
2. ބީލަން ހުށަހަޅާ ފޯމް
3. ބިން ކުއްޔަށް ހިފުމަށް އެދި ހުށާހަޅާ ޕްރޮޕޯސަލް
4. ބީލަން ހުށަހަޅާ ފަރާތުގެ ކުންފުނީ ރަޖިސްޓްރީގެ ކޮޕީ ނުވަތަ އަމިއްލަ ފަރުދުންގެ ވިޔަފާރި ރަޖިސްޓްރީ ކޮޕީ
5. ޓީ.ޖީ.އެސް.ޓީ ނުވަތަ ޖީ.އެސް.ޓީ ކޮށްފައިވާ ފަރާތެއްނަމަ ޓީ.ޖީ.އެސް.ޓީ ނުވަތަ ޖީ.އެ.ސް.ޓީ ރަޖިސްޓްރޭޝަން ސެޓްފިކެޓްގެ ކޮޕީ
6. ޖީ.އެސް.ޓީ އަށް ރަޖިސްޓްރީ ނުކުރާނަމަ ނޮޓިފިކޭޝަން އޮފް ޓެކްސް ރެޖިސްޓްރޭޝަން ކޮޕީ
7. ބީލަން ހުށަހަޅާ ފަރާތުގެ ބަދަލުގައި އެހެން ފަރާތެއް ބީލަން ހުށަހަޅާނަމަ ޕަވާރ އޮފް އެޓާރނީގެ ލިޔުން
8. ބީލަން ހުށަހަޅާ ފަރާތުގެ 3 މަސް ހަމަނުވާ 1 އަހަރު ދުވަހުގެ ބޭންކް ސްޓޭޓްމަންޓް ނުވަތަ މަލީ ތަނަވަސްކަން އަންގައިދޭ ބޭންކް ރިފަރެންސް ލެޓަރ
9. ބިމުގެ މަސައްކަތް ކުރާނެ ގޮތުގެ ވޯކް ޝެޑިއުލެއް

(ނ)

މިމާއްދާގެ (ށ) ގައި ބަޔާންކޮށްފައިވާ ތަރުތީބުން ހުރިހާ ލިޔުންތަށް ހީރަސްކޮށް އެއް ސިޓީ އުރައަކަށް އަޅައި ބަންދުކޮށް، ސިޓީއުރައިގެ ބޭރުގައި ބިޑް ހުށަހަޅާ ފަރާތުގެ ނަން، އިޢުލާނުގެ ނަމާއި  ނަންބަރު ލިޔެވިފައި އޮންނަންވާނެވެ.

ބީލަމުގައި  ހުށަހަޅާފައިވާ ފަރާތްތަކުގެ ޕްރޮޕޯސަލްތައް އިވެލުއޭޓް ކުރުމުގައި ޕޮއިންޓް ދެވޭ ގޮތް

22.

މި އުސޫލުގެ ދަށުން ކުއްޔަށް ދޫކުރުމަށް ހަމަޖެހިފައިވާ ބިންތަކަށް ހުށަހަޅާ ޕްރޮޕޯސަލްތައް އިވަލުއޭޓް ކުރާނީ މިދަންނަވާ މިންގަޑާ އެއްގޮތަށެވެ. އަދި ޕޮއިންޓުގެ ގޮތުގައި އެއްފަރާތެއްވުރެ ގިނަފަރާތް އެއްވަރު ވެއްޖެނަމަ ބިންދޫކުރެވޭނީ އެފަރާތަކުގެ މެދުގައި ގުރުއަތުލައިގެން ހޮވޭ ފަރާތަކަށެވެ.

(ހ)

ކުއްޔަށް ދޫކުރުމަށް ހަމަޖެހިފައިވާ ބިންތަކަށް ހުށަހަޅާ ޕްރޮޕޯސަލްތައް އިވަލުއޭޓް ކުރުމަށްޓަކައި މާރކްސް ދިނުމަށް ކަނޑައެޅިފައިވާ މިންގަޑުތަކާއި އޭގެ ތަފްސީލް ތިރީގައި އެވަނީއެވެ.

މާރކްސްދެވޭ ބައިތައް

ތަފްސީލް

މާރކްސް

ހުށަހަޅާ މަހު ކުލި

މަހު ކުއްޔަށް ޕޮއިންޓް ދޭނީ ހުށަހަޅާ އެންމެ ބޮޑު ކުއްޔަކީ ބެންޗްމާކް ކަމަށް ބަލައިގެން މާކްސްދެވޭ ބައިތަކަށް ކަނޑައެޅިފައިވާ އިންސައްތަ ހިމަނާގެންނެވެ. މިގޮތުން އެންމެ ގިނަ  މާރކްސް ލިބޭނީ އެންމެ ބޮޑު މަހު ކުލި ހުށަހަޅާ ފަރާތަކަށެވެ.

50 %

ގއ. ވިލިނގިލި

ރައްވެއްސަކަށް ވުން

ބީލަން ހުށަހަޅާ ފަރާތަކީ ގއ. ވިލިނގިލި ރައްވެއްސަކަށްވާނަމަ 10 މާރކްސް ދޭންވާނެއެވެ. އަދި ގއ. ވިލިނގިލި ރައްވެއްސެއް ނޫންނަމަ މާރކްސް ނުދެވޭނެއެވެ.

10 %

އިޖްތިމާޢީ ކަންކަމަށް ކުރާ

ޚަރަދު

މިބަޔަށް ޕޮއިންޓް ދޭނީ އިޖްތިމާޢީ ކަންކުރާނެކަމަށް ހުށަހަޅާ އެންމެ ބޮޑު ޚަރަދަކީ ބެންޗްމާކް ކަމަށް ބަލައިގެން މާކްސްދެވޭ ބައިތަކަށް ކަނޑައެޅިފައިވާ އިންސައްތަ ހިމަނާގެންނެވެ. މިގޮތުން އެންމެ ގިނަ މާރކްސް ލިބޭނީ އިޖްތިމާޢީ ކަންކަމަށް އެންމެ ބޮޑު ޚަރަދު ކުރާނެކަމަށް ހުށަހަޅާ ފަރާތަކަށެވެ.

25 %

އެކުއިޒިޝަން ފީ:

އެކުއިޒިޝަން ފީ އަށް ޕޮއިންޓް ދޭނީ ހުށަހަޅާ އެންމެ ބޮޑު ފީ ބެންޗްމާކް ކަމަށް ބަލައިގެން މާކްސްދެވޭ ބައިތަކަށް ކަނޑައެޅިފައިވާ އިންސައްތަ ހިމަނާގެންނެވެ. މިގޮތުން އެންމެ ގިނަ  ޕޮއިންޓް ލިބޭނީ އެންމެ ބޮޑު ފީ ހުށަހަޅާ ފަރާތަކަށެވެ.

5 %

ބިޒްނަސް ޕްލޭން

ގއ. ވިލިނގިލިން ފަތުރުވެރިކަން ތަރައްޤީކުރުމަށް ކަނޑައަޅާފައިވާ ސަރަހައްދުތަކުން ޓޫރިސްޓް ހޮޓާ އަދި ގެސްޓްހައުސް ތަރައްޤީކޮށް ހިންގުމަށްޓަކައި ބިން ކުއްޔަށް ދޫކުރުމަށް އެދި ކައުންސިލުން ހުށަހަޅާ ޕްރޮޕޯސަލާއި އެއްގޮތަށް  ތިރީގައި ދެންނެވިފައިވާ ކަންތައްތައް ހިމެނިފައިވާނަމަ އެބައިތަކަށް މާރކްސް ދެވޭނެވެ.

10 %

ބިން ބޭނުންކުރާ އިމާރާތުގެ ތަފްސީލް އަދި ބިމުގައި ކުރުމަށް ބޭނުންވާ ވިޔަފާރި

1

އިމާރާތް ކުރުން (ބިމުގެ ހުސްކޮށް އޮންނަ ބައި ބޭނުންކުރާނެ ގޮތް، އިމާރާތުގެ އެތެރޭގައިހެދޭ ތަންތަނުގެ ތަފްސީލް އަދި އިމާރާތުގެ ސަލާމަތީ އަދި މެއިންޓެނަސްކޮށް ބެލެހެއްޓޭނެ ގޮތް)

3

އަންދާޒާކުރާ ބަޖެޓް  (އިމާރާތްކުރުމަށް ލަފާކުރާ ޚަރަދު އަދި ވިޔަފާރި ފެށުމަށްޓަކައި ލަފާކުރާ ބަޖެޓް)

3

ލަފާކުރާ އާމްދަނީ

1

މާލީ ތަނަވަސްކަން

1

މާލީ ތަނަވަސްކަން ސާބިތުކުރުން

1

އުސޫލަށް އުނި އިތުރުކޮށް ބަދަލުގެނައުން

23.

މި އުޞޫލަށް އެއްވެސް ބަދަލެއްގެނެވޭނީ ކައުންސިލްގެ ރަސްމީ ބައްދަލުވުމުގެ ޖަލްސާއަށް އެކަން ހުށަހަޅައި އެބަދަލެއް ނުވަތަ އެއިސްލާހެއް ކައުންސިލްގެ އަގުލަބިއްޔަތުން ފާސްވުމުންނެވެ. އަދި މި އުޞޫލުގައި ހިމެނިފައިނުވާކަމެއް ދިމާވެއްޖެނަމަ، އެކަމަށްވެސް ގޮތްނިންމާނީ ކައުންސިލްގެ ރަސްމީ ބައްދަލުވުމުގެ ޖަލްސާއަށް ހުށަހަޅައި އެކަމެއް ނުވަތަ އެއިސްލާހެއް ކައުންސިލްގެ އަގުލަބިއްޔަތުން ފާސްވުމުންނެވެ.

(ހ)

މާއްދާގައި ދެންނެވިފައިވާގޮތަށް މިއުޞޫލާއި ގުޅިގެން އެއްވެސް ބަދަލުގެންނަށް ނުވަތަ އިސްލާހެއް ކައުންސިލްގެ އަގުލަބިއްޔަތުން ފާސްކުރެވޭ ހުރިހާ އިސްލާހުތައް ގެޒެޓު ކުރަންވާނެވެ.

މާނަކުރުން

24.

"ކައުންސިލް" ކަމަށް ބުނެފައިއެވަނީ، "ހުވަދުއަތޮޅު އުތުރުބުރީ ވިލިނގިލި ކައުންސިލް" އަށެވެ.

"އިދާރާ" ކަމުގައި ބުނެފައިއެވަނީ، "ހުވަދުއަތޮޅު އުތުރުބުރީ ވިލިނގިލި ކައުންސިލްގެ އިދާރާ" އަށެވެ.

"ލޭންޑް ޔޫސް ޕްލޭން" ކަމުގައި ބުނެފައިއެވަނީ، "ހުވަދުއަތޮޅު އުތުރުބުރީ ވިލިނގިލި ބިން ބޭނުން ކުރުމަށް ރާވާލެވިފައިވާގޮތެވެ.

"ބިމުގެ އަމަލީ މަސައްކަތް" ކަމަށް ބުނެފައިއެވަނީ، ބިން ސާފްކުރުމާއި އިންފާރު ރޭނުމުގެ މަސައްކަތުން ފެށިގެން ބިމުގައި ކުރަންޖެހޭ އިމާރާތްކުރުމުގެ ހުރިހާ މަސައްކަތްތައް ނިމެންދެންނެވެ.

"އިކުއިޒިޝަން ފީ" އިކުއިޒިޝަން ފީ ކަމަށް ބުނެފައި އެވަނީ، ބިޑު ކާމިޔާބު ކުރުމަށްޓަކައި އެކީ އެއްފަހަރާ ކައުންސިލަށް ދިނުމަށް ހުށަހަޅާ ފައިސާގެ އަދަދަށެވެ.

ޢަމަލުކުރަން ފެށުން

25.

މި އުޞޫލަށް ޢަމަލުކުރަން ފަށާނީ، މިއުޞޫލު ގއ. ވިލިނގިލި ކައުންސިލުން ފާސްކޮށް ދިވެހި ސަރުކާރުގެ ގެޒެޓުގައި ޝާއިރުކުރާ ދުވަހުން ފެށިގެންނެވެ.