ތަޢާރަފް:

މިއީ މޯލްޑިވްސް ބްރޯޑްކާސްޓިންގ ކޯޕަރޭޝަންގެ ޗެނަލްތަކުން އުފައްދާ ޕްރޮގްރާމްތަކަށް ބޭނުންވާ ފަންނީ އެހީ ހޯދުން ޕްރޮކިއުމަންޓުގެ ޢާންމު އުސޫލުތަކުގެ ތެރެއިން ކުރުމުން ޕްރޮގްރާމް އުފެއްދުމަށް ދަތިވަމުންދާތީ އެކުލަވާލެވިފައިވާ ސިޔާސަތެކެވެ. މިސިޔާސަތުވެސް އެކުލަވާލެވިފައިވަނީ ޕްރޮގްރާމްތަކަށް ބޭނުންވާ ފަންނީއެހީ ހޯދުމަށް ފަސޭހަވާނޭ އަދި ދެފުށް ފެންނަ، ހުޅުވާލެވިފައިވާ، ހާމަކަންބޮޑު އުސޫލެއްގެ ދަށުން މަސައްކަތް ކުރެވޭނެ ގޮތަށެވެ.

1. ދަފްތަރު ކުރުން

1.1 މިސިޔާސަތަށް ޢަމަލުކުރަން ފެށުމާއެކު، މިސިޔާސަތުގައި ބަޔާންކޮށްފައިވާ ފަންނީ ޚިދުމަތްތައް މިކޯޕަރޭޝަނަށް ދިނުމަށް އެދޭ ފަރާތްތަކުން އެކަމަށް އެދި ހުށަހެޅުމުގެ ފުރުޞަތު ޕްރޮކިއުމަންޓް ޑިޕާޓްމަންޓުން ހުޅުވާލަން ވާނެއެވެ. އަދި މިކަމަށް އިޖާބަދީ ޚިދުމަތް ދިނުމަށް ހުށަހަޅާ ފަރާތްތަކުގެ ދަފްތަރެއް ޕްރޮކިއުމަންޓް ޑިޕާޓްމަންޓުން އެކުލަވާލައި ބަލަހައްޓަންވާނެއެވެ.

1.2 ދަފްތަރުގައި ހިމެނުމަށް އެދި ހުށަހެޅުމަކީ އަބަދުވެސް ހުޅުވިފައިވާ ފުރުޞަތެކެވެ. ނަމަވެސް، މިފުރުޞަތު ހުޅުވިފައިވާކަން ކޮންމެ ތިން މަހަކުން އެއްފަހަރު ޕްރޮކިއުމަންޓް ޑިޕާޓްމަންޓުން އިޢުލާނު ކުރަންވާނެއެވެ. އަދި މީގެ ސަބަބުން ކުރިން ދަފްތަރު ކުރެވިފައިވާ ފަރާތްތައް ލިސްޓުން އުނިވެގެނެއް ނުދާނެއެވެ.

2. ދަފްތަރުގައިވާ ފަރާތްތަކަށް އެންގުން

މިސިޔާސަތުގައިވާ ފަންނުވެރިކަމަކަށް އެދި ކޮންޓެންޓް އުފައްދާ ޑިޕާޓްމަންޓަކުން ޕްރޮކިއުމަންޓުގައި ،ދަފްތަރުގައިވާ، އެ ފަންނުވެރިކަމަކަށް ރަޖިސްޓަރީ ކުރެވިފައިވާ ފަރާތްތަކަށް އީމެއިލް މެދުވެރިކޮށް އެކަން އަންގައި، އަގާއި އެކަމަށް ބޭނުންވާ ތަފުސީލުތައް ހުށަހެޅުމުގެ ފުރުޞަތު އެފަރާތްތަކަށް ދޭންވާނެއެވެ.

3. މަސައްކަތް ޙަވާލުކުރާނެ ފަރާތެއް ހޮވުން

3.1 މިސިޔާސަތުގައިވާ އުސޫލުން އީމެއިލް މެދުވެރިކޮށް ދަފްތަރުގައިވާ، އެފަންނުވެރިކަމަކަށް ރަޖިސްޓަރީކޮށްފައިވާ ފަރާތްތަކަށް އެންގުމަށްފަހު، އެކަމަށް އިޖާބަދޭ ފަރާތް ނުވަތަ ފަރާތްތަކުގެ މަޢުލޫމާތު، އެރިކުއެސްޓެއް ފޮނުވި ޑިޕާޓްމަންޓަކަށް ޕްރޮކިއުމަންޓް ޑިޕާޓްމަންޓުން ފޮނުވަންވާނެއެވެ.

3.2 ރިކުއެސްޓް ފޮނުވި ޑިޕާޓްމަންޓަށް އެމަޢުލޫމާތު ފޮނުވުމުން އޭގެތެރޭގައިވާ އެމަސައްކަތަށް އެންމެ އެކަށީގެންވާ ފަރާތަކީ ކޮބައިކަން އެޑިޕާޓްމަންޓެއްގެ ކޮންޓެންޓް ކޮމެޓީން ކަނޑައަޅައި އަނބުރާ ޕްރޮކިއުންމަންޓް ޑިޕާޓްމަންޓަށް ފޮނުވަންވާނެއެވެ. އަދި ކޮންޓެންޓް ކޮމެޓީން ކަނޑައަޅާފައިވާ ފަރާތުން ހުށަހަޅާފައިވާ އަގަކީ މިސިޔާސަތުގައިވާ އަގަށްވުރެ ބޮޑު އަގެއްކަމުގައި ނުވާނަމަ، ޕްރޮކިއުމަންޓް ޑިޕާޓްމަންޓުން އެފަރާތަކާ މަސައްކަތް ޙަވާލުކުރަންވާނެއެވެ.

4. ކޮންޓެންޓް ހޮވުމުގައި ކޮންޓެންޓް ކޮމެޓީން ބަލާނެ ކަންކަން

4.1 މިސިޔާސަތުގެ ދަށުން ޕްރޮކިއުމަންޓް ޑިޕާޓްމަންޓުން، އެކަމަކަށް އެދި ރިކުއެސްޓްކުރާ ޑިޕާޓްމަންޓަކަށް ފޮނުވުމުން ކޮންޓެންޓް ކޮމެޓީން ކޮންމެހެން ބަލަންޖެހޭނެ ކަންކަމަކީ:

4.1.1 ކޯޕަރޭޝަންގެ ޚަބަރާއި މަޢުލޫމާތު ފެތުރުމުގެ ސިޔާސަތުގެ ދަށުން ފޮނުވޭނެ ކޮންޓެއްޓެއްތޯ.

4.1.2 ހުށަހެޅުންތަކުގައި ޕްރޮގްރާމަށް ބޭނުންވާ ފެންވަރަށް އެކަމެއް ކޮށްދިނުމަށް ހުށަހަޅާފައިވޭތޯ.

4.1.3 ހުށަހަޅާފައިވާ ފަރާތްތަކުގެ ތެރެއިން ޕްރޮގްރާމްގެ ބޭނުންތަކާ އެއްގޮތަށް އެންމެ ރަނގަޅަށް، މިސިޔާސަތުގައިވާ އަގުގެ މިންގަނޑުގެ ތެރެއިން އެކަމެއް ކޮށްދިނުމަށް ހުށަހަޅާފައިވަނީ ކޮންފަރާތަކުންތޯ.

4.1.4 މިސިޔާސަތުގައިވަނީ ކޮންމެ ކަމަކަށްވެސް ދެވޭނެ އެންމެ މަތީ އަގުކަމަށްވުމާއެކު ހުށަހަޅާފައިވާ އަގަކީ އެކޮންޓެންޓަކަށް އެކަށީގެންވާ އަގެއްތޯ.

5. ކޮންޓެންޓް ކޮމިޓީގެ ދައުރު

5.1 މިސިޔާސަތުގެ ދަށުން ކޮންޓެންޓް ކޮމިޓީގެ މަސްއޫލިއްޔަތުތަކުގެ ތެރޭގައި ހިމެނެނީ:

5.1.1 މިސިޔާސަތުގައިވާ އުސޫލުން، ކޮންޓެންޓް/ފަންނީ މީހުން/ފަންނުވެރިކަން، ހޮވުން

5.1.2 މިސިޔާސަތުގައި ބުނާ އުސޫލުން އެކި ފަރާތްތައް ގްރޭޑް ކުރުން

5.1.3 އަންނަނިވި ޙާލަތްތަކުގައި ގްރޭޑް ކޮށްފައިވާ ފަރާތްތައް އަލުން ގްރޭޑް ކުރުން

5.1.3.1 ކޮންޓެންޓް އުފައްދާ ޑިޕާޓްމަންޓަކުން އެކަމަށް އެދުން

5.1.3.2 ގްރޭޑް ކޮށްފައިވާ ފަރާތުން އެކަމަށް އެދުން

5.2 އަލުން ގްރޭޑްކުރުމަށްފަހު އެމީހަކަށް އަގުދިނުމާއި އަދި މިސިޔާސަތުގައިވާ އެހެނިހެން ކަންކަމުގައިވެސް އެމީހަކާމެދު ޢަމަކުރަންވާނީ އެފަރާތެއް އަލަށް ގްރޭޑް ކުރެވުނު ގިންތީގައެވެ.

6. ކޮންޓެންޓް ކޮމިޓީ އެކުލެވިގެންވާގޮތް

6.1 ކޮންޓެންޓް ކޮމިޓީ އެކުލަވާލައި އުނި އިތުރު ގެންނާނީ ކޮންޓެންޓް އުފައްދާ ޑިޕާޓްމަންޓުގެ ހެޑް އޮފް ޑިޕާޓްމަންޓުގެ ލަފަޔާއެކު މެނޭޖިންގ ޑިރެކްޓަރެވެ.

6.2 ކޮންޓެންޓް ކޮމިޓީގައި ކޯޕަރޭޝަންގެ ފަންނީ މުވައްޒަފުންގެ ތެރެއިން މަދުވެގެން 5 ނުވަތަ އެއަށްވުރެ ގިނަ، އޮނަހިރި އަދަދެއްގެ މުވައްޒަފުން ހިމެނެންވާނެއެވެ.

6.3 މިސިޔާސަތުގައި ބުނެފައިވާ ކޮންޓެންޓް ކޮމެޓީއާއި މޯލްޑިވްސް ބްރޯޑްކާސްޓިންގ ކޯޕަރޭޝަންގެ ޗެނަލްތަކުން ޕްރޮގްރާމް އުފެއްދުމާއި ރިވިއުކުރުމާއި ޕްރޮގްރާމް އުފެއްދުމަށް އެހީތެރިވެދިނުމުގެ ސިޔާސަތުގައި ބުނެފައިވާ ކޮންޓެންޓް ކޮމިޓީއަކީ އެއްކޮމިޓީއެކެވެ.

7. އަގު

7.1 މިސިޔާސަތުގައި ކަނޑައެޅިފައިވާ އަގުތަކަކީ ކޮންމެ މަސައްކަތަކަށްވެސް ކަނޑައެޅިފައިވާ އެންމެ މަތީ އަގުތަކެވެ.

7.2 މިސިޔާސަތުގެ ދަށުން ވަކި ޕްރޮގްރާމަކަށް ނުވަތަ ސީރީޒަކަށް، ވަކި މަސައްކަތަކަށް ނުވަތަ ވަކި ފަންނުވެރިކަމަކަށް ދެވޭނެ އެންމެ މަތީ އަގަކީ -/300000 (ތިން ލައްކަ ރުފިޔާ) އެވެ.

8. ކޮމިޝަނިންގ ކޮމިޓީ

8.1 މިސިޔާސަތުގައިވާގޮތުގެ މަތިން ކޮންޓެންޓް ކޮމެޓީން މަސައްކަތް ޙަވާލުކުރަން ކަނޑައަޅާފައިވާ ފަރާތުން ހުށަހަޅާފައިވާ ޖުމްލަ އަގަކީ -/100000ރ. (އެއްލައްކަ ރުފިޔާ) އަށްވުރެ ބޮޑު އަގެއް ކަމުގައިވާނަމަ އެމަސައްކަތެއް އެފަރާތަކާ ޙަވާލުކުރެވޭނީ ކޮމިޝަނިންގ ކޮމިޓީން އެގޮތަށް ނިންމުމުންނެވެ.

8.2 ކޮމިޝަނިންގ ކޮމެޓީން ކޮންމެހެން ބަލާ ރިޢާޔަތްކުރަން ޖެހޭނެ ކަންކަމަކީ:

8.2.1 ކޮންޓެންޓް ކޮމެޓީގެ ނިންމުން

8.2.2 އެއަރޓައިމް އެލޮކޭޝަން މިންގަނޑާއި އެއަރޓައިމް ރިކޮމެންޑޭޝަންތައް

8.2.3 ކޮންޓެންޓަކީ ހުށަހަޅާފައިވާ އަގާއި އެކަށީގެންވާ ކޮންޓެއްޓެއްތޯ.

8.3 ކޮމިޝަނިންގ ކޮމިޓީ އެކުލެވިގެންވަނީ ތިރީގައިވާ ގޮތަށެވެ.

8.3.1 ޗީފް އޮޕަރޭޓިންގް އޮފިސަރ (ޗެއަރ)

8.3.2 ޑިރެކްޓަރ ނިއުސް އެންޑް ކަރަންޓް އެފެއަރޒް

8.3.3 ޑިރެކްޓަރ ރޭޑިއޯ

8.3.4 ޑިރެކްޓަރ ޓީވީ ޕްރޮގްރާމްސް

9. ގްރޭޑް ކުރުމާއި ބްރޭންޑް ކުރުމާއި ލިބިފައިވާ ހުށަހެޅުމަށް (ޕްރޮޕޯޒަލް) ބެލުން

9.1 މިސިޔާސަތުގެ ދަށުން މަސައްކަތެއް ޙަވާލުކުރެވޭނީ މައިގަނޑު ހަތަރު އުސޫލެއްގެ ދަށުންނެވެ. މީގެ ތެރޭގައި ހިމެނެނީ:

9.1.1 ގްރޭޑް ކޮށްގެން އެމީހަކު ނުވަތަ އެފަރާތެއް ފެތޭ ގްރޭޑަކަށް ހަމަޖެހިފައިވާ އަގުދިނުން

9.1.2 އޭ ގްރޭޑަށް ފެތޭ ފަރާތްތައް ބްރޭންޑްކޮށްގެން އަގުދިނުން

9.1.3 ލިބިފައިވާ ހުށަހެޅުމުގެ މައްޗަށް ބަލައި އިންސާފުކޮށްގެން އަގުދިނުން

9.1.4 އުފައްދާފައިވާ ކޮންޓެންޓަށް ބަލައިގެން އަގު ދިނުން

10. ގްރޭޑް ކުރާގޮތަށް ޙަވާލުކުރެވޭ މަސައްކަތްތަކާއި އެކި ގްރޭޑްތަކަށް ދިނުމަށް ހަމަޖެހިފައިވާ އަގު (ރުފިޔާއިން)

11. ގްރޭޑް ކުރުމަށް ޕޮއިންޓް ދެވޭ އުސޫލު

12. އެކި ގްރޭޑްތަކަށް ބޭނުންވާ ޕޮއިންޓް

13. ބްރޭންޑް ކުރެވޭ އުސޫލު

އޭ ގްރޭޑަށް ފެތޭ ފަރާތްތަކުގެ ތެރެއިން ޕްރެޒެންޓަރުންނާއި މޮޑަރޭޓަރުން ބްރޭންޑް ކުރެވިދާނެއެވެ. ނަމަވެސް ޢާންމު އުސޫލެއްގެގޮތުން ބްރޭންޑް ކުރެވޭނީ އެއްވަގުތެއްގައި ކުރިޔައަށްދާ އެއް ޕްރޮގްރާމަށެވެ. ބްރޭންޑް ކުރުމަކީ އެހެން ޕްރޮގްރާމެއް ހުށަނޭޅޭގޮތަށް ވަކި ޕްރޮގްރާމަކަށް މީހަކު ޚާއްޞަ ކުރުމެވެ.

14. ބްރޭންޑް ކުރެވޭ ފަރާތްކަށް އަގު ދިނުން

14.1 ބްރޭންޑް ކުރެވިފައިވާ މީހަކަށް އަގުދެވޭނީ ކޮންމެ މަހަކު ފުރަތަމަ 300 މިނިޓް ހަމަވަންދެން ކޮންމެ މިނިޓަކަށް ރޭޑިއޯގައިނަމަ -/20 ރުފިޔާގެ ރޭޓުންނެވެ. އަދި ޓީވީގައިނަމަ ފުރަތަމަ 300 މިނިޓް ހަމަވަންދެން ކޮންމެ މިނިޓަކަށް -/40 ރުފިޔާގެ ރޭޓުންނެވެ. 300 މިނިޓަށްވުރެ އިތުރުވާ ވަގުތަށް އަގުދެވޭނީ A ގްރޭޑުން އެމަސައްކަތަކަށް ކަނޑައެޅިފައިވާ ރޭޓުންނެވެ.

15. ލިބިފައިވާ ޕްރޮޕޯޒަލަށް ބަލައިގެން ގަނެވޭނެ ކޮންޓެންޓާއި އުފައްދާފައިވާ ކޮންޓެންޓުގެ ތެރެއިން ގަނެވޭނެ ކޮންޓެންޓް އަދި މިކަންކަމަށް ދެވޭނެ އެންމެ މަތީ އަގު. (ރުފިޔާއިން)

16. ލިބިފައިވާ ޕްރޮޕޯޒަލަށް ބަލައިގެން ކޮންޓެންޓް ގަތުމަށް އިންސާފުކުރުމުގައި ޕޮއިންޓްދޭނެ އުސޫލު

16.1 މަތީގައިވާ ޓޭބަލުގައިވާ އުސޫލުން ޕޮއިންޓް ދިނުމަށް ބަލާއިރު އެކޮންޓެންޓެއްގެ ބާވަތުން މީގެތެރެއިން ވަކިބަޔަކަށް ޕޮއިންޓްދިނުން މުހިންމު ނޫންނަމަ އެކަމަކަށް ކަނޑައެޅިފައިވާ ޕޮއިންޓެއް ނުދެވޭނެއެވެ. އަދި ކޮންޓެންޓެއްގެ ބާވަތުން އިތުރު ބަޔަކަށް ޕޮއިންޓް ދޭންޖެހޭނަމަ އެބައެއް އިތުރުކޮށް ޕޮއިންޓްދޭ އުސޫލު ބަދަލުކުރެވިދާނެއެވެ.

17. އުފައްދާފައިވާ ކޮންޓެންޓެއް ހޯދާނަމަ ވަކި ކޮންޓެންޓެއް ހޮވުމުގައި ޕޮއިންޓްދޭނެ އުސޫލު

17.1 މަތީގައިވާ ޓޭބަލްގައިވާ އުސޫލުން ޕޮއިންޓް ދިނުމަށް ބަލާއިރު އެކޮންޓެންޓެއްގެ ބާވަތުން މީގެތެރެއިން ވަކިބަޔަކަށް ޕޮއިންޓްދިނުން މުހިންމު ނޫންނަމަ އެކަމަކަށް ކަނޑައެޅިފައިވާ ޕޮއިންޓެއް ނުދެވޭނެއެވެ. އަދި ކޮންޓެންޓެއްގެ ބާވަތުން އިތުރު ބަޔަކަށް ޕޮއިންޓް ދޭންޖެހޭނަމަ އެބައެއް އިތުރުކޮށް ޕޮއިންޓް ދޭ އުސޫލު ބަދަލުކުރެވިދާނެއެވެ.

18. އިތުރު ތަފުސީލު

18.1 މިސިޔާސަތުގެ ދަށުން އަގުދޭގޮތަށް ލިޔެފައިވާ ލިޔުމެއްގެ ޞަފްޙާއެއްގެ ގޮތުގައި ބެލޭނީ ދިވެހިބަހުން ނަމަ ފަރުމާ ފޮންޓުގެ ފޮންޓް ސައިޒް 12 އަދި އިނގިރޭސިބަހުންނަމަ ޓައިމްސް ނިއުރޯމަންގެ ފޮންޓް ސައިޒް 12ގައި، ސިންގަލް ސްޕޭސިންގް، އަދި ލައިން ސްޕޭސިންގް 1.15ގައި ލިޔެފައިވާ ޞަފްޙާއަކަށެވެ.

18.2 މިސިޔާސަތުގައި 30 މިނެޓުގެ ޕްރޮގްރާމެއްކަމަށް ބުނެފައިއެވަނީ އެޗެނަލަކުން 30 މިނެޓުގެ ޕްރޮގްރާމެއްގެ ސްލޮޓަކަށް އުފައްދާ ކޮންޓެންޓުގެ ދިގުމިނުގެ ޕްރޮގްރާމަކަށެވެ. އަދި ޕްރޮގްރާމްގެ ދިގުމިން 60 މިނެޓް، 90 މިނެޓް ނުވަތަ އެއަށްވުރެން ދިގުވީ ކަމުގައިވިއަސް ނުވަތަ ކުރުވީ ކަމުގައިވިއަސް މިސިޔާސަތުގައި އެހެން ގޮތަކަށް ބަޔާންކޮށްފައިނުވާނަމަ ޢަމަލުކުރެވޭނީ ހަމަ މިއުސޫލުން އަދި މިރޭޓުން އަގު އިތުރު ކުރަމުން ނުވަތަ ކުޑަކުރަމުންދާ ގޮތަށެވެ.

18.3 މިސިޔާސަތުގެ ދަށުން ހޯދާ ކޮންމެ ކޮންމެ ފަންނުވެރިކަމަކަށް އަދި ފަންނުވެރިކަމެއްގެ ބޭނުމުގައި ހޯދާ ކޮންމެ މީހަކަށް، މިކޯޕަރޭޝަނުގައި ކޮންޓެންޓާ ގުޅޭގޮތުން ޢަމަލުކުރެވެމުން އަންނަ ސިޔާސަތުތަކާއި، އެޑިޓޯރިއަލް ސިޔާސަތާއި، ގަވާއިދުތަކާއި އުސޫލުތައް ހިނގާނެއެވެ. އަދި އެކަންކަމަށް އެފަރާތަކުން ތަބާވެ ޢަމަލު ކުރަންޖެހޭނެއެވެ.

18.4 މިސިޔާސަތުގެ ދަށުން ދަފްތަރު ކުރަން ފެށުމަކީ މިހާތަނަށް ޢަމަލުކުރެވުމުންއައި މޯލްޑިވްސް ބްރޯޑްކާސްޓިންގް ކޯޕަރޭޝަންގެ ޗެނަލްތަކުން އުފައްދާ ޕްރޮގްރާމްތަކަށް ބޭނުންވާ ފަންނީ އެހީ އަދި ކޮންޓެންޓް އުފެއްދުމާގުޅޭ މަސައްކަތްތައް އަގުދީގެން ކުރުވުމުގެ ގަވާއިދުގެ ދަށުން ދަފްތަރު ކުރެވިފައިވާ ފަރާތްތައް އެދަފްތަރުން އުނިވެގެންދާނޭ ކަމެއް ނޫނެވެ. މިސިޔާސަތުގެ މަޤްޞަދަށްޓަކައި އެފަރާތްތައްވެސް ބެލެވޭނީ ދަފްތަރު ކުރެވިފައިވާ ފަރާތްތަކެއްގެ ގޮތުގައެވެ.

19. ސިޔާސަތުގައި ނުހިމެނޭ ކަންކަން

19.1 މިސިޔާސަތުގައި ނުހިމެނޭ ކަމެއް ދިމާވެއްޖެ ޙާލަތުގައި މިސިޔާސަތުގެ އަސާސްތަކާ ޚިލާފު ނުވާނޭ އުސޫލުން، ހެޑް އޮފް ޑިޕާޓްމަންޓްސްގެ ބައްދަލުވުމަކުން އެކަމަކަށް ގޮތެއް ނިންމިދާނެއެވެ.

20. މިސިޔާސަތަށް ޢަމަލުކުރަން ފެށުމުން ގަވާއިދު އުވުން

20.1 މިސިޔާސަތަށް ޢަމަލުކުރަން ފެށުމާއެކު މީގެ ކުރިން ޢަމަލުކުރަމުން އައި މޯލްޑިވްސް ބްރޯޑްކާސްޓިންގް ކޯޕަރޭޝަންގެ ޗެނަލްތަކުން އުފައްދާ ޕްރޮގްރާމްތަކަށް ބޭނުންވާ ފަންނީ އެހީ އަދި ކޮންޓެންޓް އުފެއްދުމާގުޅޭ މަސައްކަތްތައް އަގުދީގެން ކުރުވުމުގެ ގަވާއިދު އުވުނީއެވެ.

21. މިސިޔާސަތުގެ ދަށުން އަގުދީގެން ކަމެއް ކުރުމުގެ ހުއްދަ ދިނުން

21.1 މި ސިޔާސަތުގެ ދަށުން އަގުދީގެން ފަންނީ އެހީއާއި ކޮންޓެންޓް އުފެއްދުމާގުޅޭ އެއްވެސް މަސައްކަތެއް ވަކި ފަރާތަކާ ޙަވާލުކުރަންވާނީ ކޯޕަރޭޝަނުން މިކަމަށް ކަނޑައަޅާ ފޯމެއްގައިވާ އެންމެހާ ކަންކަން ފުރިހަމަ ކުރުމަށްފަހު، އެކަމެއް ކުރުމަށް މެނޭޖިންގ ޑިރެކްޓަރ ހުއްދަ ދެއްވިކަމުގެ ސޮއިކުރެއްވުމުންނެވެ.

22. ތަންފީޒީ ބާރު

މި ސިޔާސަތަށް އުނިއިތުރު ގެނައުމާއި މި ސިޔާސަތު އުވާލުމުގެ އެންމެހައި ބާރެއް ލިބިގެންވަނީ މޯލްޑިވްސް ބްރޯޑްކާސްޓިންގ ކޯޕަރޭޝަންގެ ޑިރެކްޓަރުންގެ ބޯޑަށެވެ. މި ސިޔާސަތު ހިންގާނީ މޯލްޑިވްސް ބްރޯޑްކާސްޓިންގ ކޯޕަރޭޝަންގެ އެންމެހައި މުވައްޒަފުންގެ މައްޗަށެވެ. މިސިޔާސަތުގައިވާ ކަންތައްތައް ތަންފީޒުކުރުމަކީ މޯލްޑިވްސް ބްރޯޑްކާސްޓިންގ ކޯޕަރޭޝަންގެ ޑިޕާޓްމަންޓް/ ސެކްޝަން/ ޔުނިޓުގެ ޒިންމާދާރު ވެރިންގެ މަސްއޫލިއްޔަތެކެވެ. އަދި މި ސިޔާސަތަށް ޙުރުމަތްތެރިކޮށް ހިތުމަކީ މޯލްޑިވްސް ބްރޯޑްކާސްޓިންގ ކޯޕަރޭޝަންގެ އެންމެހައި މުވައްޒަފުންގެ މައްޗަށް ލާޒިމްކަމެކެވެ.