ދަ ސްކައުޓް އެސޯސިއޭޝަން އޮފް މޯލްޑިވްސްގެ ތިރީގައި މި ދަންނަވާ މަޤާމުތަކަށް ކުރިމަތިލުމަށް ޝައުޤުވެރިވާ ފަރާތްތަކަށް އެ މަޤާމުތަކަށް ކުރިމަތިލުމަށް ހުޅުވާލަމެވެ.

1. ޗީފް ކޮމިޝަނަރ

މަޤާމުގެ ޝަރުޠު:

(1)   ދިވެހި ރައްޔިތަކު ކަމުގައި ވުން.

(2)   އިންސާފާއި ހަމަހަމަކަން ދަމަހައްޓައި ގުޅިގެން މަސައްކަތްކުރެވޭފަދަ މީހަކަށްވުން.

(3)   ޝަރުޢީ ބަންދެއްގައި ހުރި މީހަކު ކަމުގައި ނުވުން.

(4)   ޖިނާއީ ކުށެއްގެ  ތުހުމަތުގައި 15 ދުވަހަށްވުރެ ގިނަދުވަހުގެ މުއްދަތުގައި ޤާނޫނީ ބަންދެއްގައި ހުރި މީހަކަށް ނުވުން.

(5)   ސާބިތު ދަރަންޏެއް އޮވެ، ދަރަނި އަދާނުކުރާ މީހެއްކަމުގައި ނުވުން.

(6)   ޙަވާލު ކުރެވޭ މަސައްކަތް އޭގެ އެންމެ ފުރިހަމަ ގޮތުގައި އަދާކުރަން ވަގުތުދެވޭ އަދި ސްކައުޓް ޤާނޫނާއި ހަމަތައް ބަލައިގަނެ، ސްކައުޓް ޙަރަކާތުގެ ކުރިއެރުމަށައި، ތަރައްޤީއަށް ގުޅިގެން މަސައްކަތްކުރެވޭ ފަދަ މީހަކަށްވުން،

(7)   ސްކައުޓް ވަޢުދާއި ޤާނޫނު ދަމަހައްޓައި، ސްކައުޓްގެ ހަމަތަކާއި އުޞޫލާ އެއްގޮތަށް މަސައްކަތްކުރާ މީހަކަށްވުން.

(8)   ސްކައުޓް ލީޑަރަކަށްވުން.

(9)   ސްކައުޓް ލީޑަރެއްގެ ގޮތުގައި ގްރޫޕެއްގައި ނުވަތަ އެސޯސިއޭޝަންގައި މަދުވެގެން 3 އަހަރު މަސައްކަތްކޮށްފައިވާ މީހަކަށްވުން ނުވަތަ، ހިންގުމުގެ ދާއިރާގައި މަދުވެގެން 3 އަހަރުގެ ތަޖުރިބާ ހުރުން.

(10) ޢުމުރުން 25 އަހަރުން މަތީގެ މީހަކަށްވުން

(11) ސްކައުޓް ޙަރަކާތް ކުރިއަރުވައި ތަރައްޤީ ކުރުމުގެ ވިސްނުންހުރި، އަދި ޤައުމީ ސްކައުޓް ކައުންސިލް އާއި ޤައުމީ ސްކައުޓް އެސެންބްލީގެ ޖަލްސާތަކަށް ޙާޒިރުވެ މަސްއޫލިއްޔަތު އަދާކުރެވޭ މީހަކަށްވުން.

(12)ސްކައުޓް އެސޯސިއޭޝަންގެ ހިންގާ ޤާވާޢިދުގައި ޗީފް ކޮމިޝަނަރ ގެ މަޤާމުގައި ހުންނަ މީހަކު އަދާކުރަންޖެހޭކަމަށް ބަޔާންކޮށްފައިވާ މަސްއޫލިއްޔަތުތައް އަދާކުރެވޭނެ މީހަކަށްވުން

މަޤާމުގެ މަސްއޫލިއްޔަތު: މި އެސޯސިއޭޝަންގެ ހިންގާ ގަވާއިދުގެ 26 ވަނަ މާއްދާގައި ޗީފް ކޮމިޝަނަރގެ މަސްއޫލިއްޔަތު ކަމުގައި ބަޔާންކޮށްފައިވާ މަސްއޫލިއްޔަތުތައް

މަޤާމަށް މީހުން ހޮވުމުގައި ބަލާނެ މިންގަނޑު: ޗީފް ކޮމިޝަނަރގެ މަޤާމަށް މީހަކު ހޮވާނީ ޤައުމީ ސްކައުޓް ކައުންސިލުން ކަނޑައަޅާ ކޮމިޓީއަކުން، މި އެސޯސިއޭޝަނުން ތައްޔާރުކޮށްފައިވާ "ދަ ސްކައުޓް އެސޯސިއޭޝަން އޮފް މޯލްޑިވްސް ގެ ޗީފް ކޮމިޝަނަރ ހޮވުމާއި ޢައްޔަނު ކުރުމުގެ މިންގަޑުތަކާއި އުސޫލުތައް" އާ އެއްގޮތްވާ ގޮތުގެ މަތިންނެވެ.

2. ޤައުމީ ޚަޒާންދާރު

2021 ސެޕްޓެންބަރު 11 ވަނަ ދުވަހު ބޭއްވުނު ނޭޝަނަލް ސްކައުޓް އެސެމްބްލީގައި ޤައުމީ ޚަޒާންދާރުގެ މަޤާމަށް އެއްވެސް ފަރާތެއް ހޮވާފައިނުވާތީ، މި އެސޯސިއޭޝަންގެ ހިންގާ ގަވާއިދުގައި ބަޔާންކޮށްފައިވާ ގޮތުގެމަތިން އެ މަޤާމަށް އައްޔަންކުރާނެ ފަރާތެއް ހޯދުމަށް، ޤައުމީ ޚަޒާންދާރުގެ މަޤާމަށް ކުރިމަތިލުމަށް ޝައުޤުވެރިވާ ފަރާތްތަކަށް އެ ފުރުޞަތު ހުޅުވާލަމެވެ.

މަޤާމުގެ ޝަރުޠު: (ހ) ދިވެހި ރައްޔިތަކުކަމުގައިވުން

(ށ) އުމުރުން 18 އަހަރު ފުރިހަމަވެފައިވުން

(ނ) ބުއްދި ސަލާމަތުންހުރި، ނުފޫޒުން އެއްކިބާވެ އިންސާފާއި ހަމަހަމަކަން ދަމަހައްޓައި ގުޅިގެން މަސައްކަތްކުރެވޭފަދަ މީހަކަށްވުން

(ރ) ޝަރުޢީ ބަންދެއްގައި ހުރި މީހަކު ކަމުގައި ނުވުން (ބ) ސާބިތު ދަރަންޏެއް އޮތްނަމަ ދަރަނި އަދާކުރަމުންދާ މީހަކު ކަމުގައިވުން

(ޅ) ގުޅިގެން މަސައްކަތް ކުރުމުގެ ޝައުޤުވެރިކަން ހުރި މީހަކަށްވުން

(ކ) ދިވެހިރާއްޖޭގެ މާލިއްޔަތު ޤާނޫނާއި އެ ޤާނޫނުގެ ދަށުން ހެދިފައިވާ ޤަވާޢިދުތަކާއި، ޖަމްޢިއްޔާތަކާ ބެހޭ ޤާނޫނުގައި ބުނާ މައިގަނޑު އުޞޫލުތަކާ އެއްގޮތަށް އެސޯސިއޭޝަނަށް ލިބޭ ފައިސާ ޚަރަދުކޮށް ހިސާބުތަކާއި ލިޔެކިޔުންތައް ބެލެހެއްޓުމުގެ ތަޢުލީމާއި ތަޖުރިބާ ހުރުން

(އ) ފައިސާގެ މުޢާމަލާތުތަކާ ގުޅުންހުރި ދާއިރާއަކުން ދަށްވެގެން ޑިޕްލޮމާ ޙާޞިލުކޮށްފައިވުން ނުވަތަ ފައިސާގެ މުޢާމަލާތުތަކާ ގުޅުންހުރި ދާއިރާއެއްގައި މަދުވެގެން 2 (ދޭއް) އަހަރު މަސައްކަތްކޮށް ތަޖުރިބާ ހުރުން

(ވ) މަދަނީ ޖަމްޢިއްޔާތަކަށް ލިބޭ ފައިސާ ބެލެހެއްޓުމާއި ޚަރަދު ކުރުމުގައި ކަނޑައަޅާފައިވާ އުޞޫލުތަކާ އެއްގޮތަށް ފައިސާ ބަލަހައްޓައި ޚަރަދުކުރުމުގެ އިންތިޒާމު ހަމަޖެއްސުމުގެ ޢިލްމާއި ޙިލްމު ހުރުން.

މަޤާމުގެ މަސްއޫލިއްޔަތު: މި އެސޯސިއޭޝަންގެ ހިންގާ ގަވާއިދުގެ 27 ވަނަ މާއްދާގައި ޤައުމީ ޚަޒާންދާރުގެ މަސްއޫލިއްޔަތު ކަމުގައި ބަޔާންކޮށްފައިވާ މަސްއޫލިއްޔަތުތައް.

މަޤާމަށް މީހުން ހޮވުމުގައި ބަލާނެ މިންގަނޑު: ޤައުމީ ޚަޒާންދާރުގެ މަޤާމަށް އައްޔަންކުރާނެ ފަރާތެއް ކަނޑައަޅާނީ ޤައުމީ ސްކައުޓް ކައުންސިލުންނެވެ.

3. އެގްޒެކެޓިވް ކޮމިޓީގައި ހިމެނޭ ނޭޝަނަލް ކޮމިޝަނަރުންގެ މަޤާމުތައް

• ޑެޕިއުޓީ ޗީފް ކޮމިޝަނަރ
• އިންޓަނޭޝަނަލް ކޮމިޝަނަރ
• ނޭޝަނަލް ކޮމިޝަނަރ ފޮރ ޔޫތް ޕްރޮގްރާމް
• ނޭޝަނަލް ކޮމިޝަނަރ ފޮރ އެޑަލްޓް ސަޕޯޓް
• ނޭޝަނަލް ކޮމިޝަނަރ ފޮރ ޕަބްލިކް ރިލޭޝަންސް

މަޤާމުގެ ޝަރުޠު: މަޤާމުގެ މަސްއޫލިއްޔަތު އަދާކުރުމުގެ ޤާބިލުކަން ލިބިފައިވުމާއި، އެކަމަށް ވަޤުތުދެވޭނެ ފަރާތަކަށް ވުން.

މަޤާމުގެ މަސްއޫލިއްޔަތު: މި އެސޯސިއޭޝަންގެ ހިންގާ ގަވާއިދުގެ 33 ވަނަ މާއްދާގެ (ރ) ގައި ބަޔާންކޮށްފައިވާ މަސްއޫލިއްޔަތުތައް

މަޤާމަށް މީހުން ހޮވުމުގައި ބަލާނެ މިންގަނޑު: އެގްޒެކެޓިވް ކޮމިޓީގައި ހިމެނޭ ނޭޝަނަލް ކޮމިޝަނަރުންގެ މަޤާމުތަކަށް ކުރިމަތިލާ ފަރާތްތަކުގެ ތެރެއިން ޤާބިލުކަމަށް ރިޢާޔަތްކުރުމަށްފަހު އެ މަޤާމުތަކަށް އައްޔަންކުރާނެ ފަރާތެއް ކަނޑައަޅައި ޤައުމީ ސްކައުޓް ކައުންސިލަށް ހުށަހަޅާނީ މި އެސޯސިއޭޝަންގެ ހިންގާ ގަވާއިދުގެ 33 ވަނަ މާއްދާގެ (ށ) ގައި ބަޔާންކޮށްފައިވާ ގޮތުގެ މަތިން ޗީފް ކޮމިޝަނަރއެވެ.

4. ސްކައުޓް ކައުންސިލްގެ ކޮމިޓީތަކުގެ މެމްބަރުން

• ޕޮލިސީ އެންޑް ރޫލްސް ކޮމިޓީ،
• ޔޫތް ޕްރޮގްރާމް ކޮމިޓީ،
• އެޑަލްޓް ސަޕޯޓް ކޮމިޓީ،
• ފައިނޭންސް އެންޑް ރިސޯސަސް ކޮމިޓީ،
• ޕަބްލިކް ރިލޭޝަންސް ކޮމިޓީ،
• އެވޯޑްސް ކޮމިޓީ

ސްކައުޓް ކައުންސިލްގެ ކޮމީޓީތަކާއި އެގްޒެކެޓީވް ކޮމިޓީގެ މަޤާމުގެ ޝަރުޠު: ކޮމިޓީ ލެވެލްގައި މަސައްކަތްކުރުމުގެ ޝައުޤުވެރިކަން ހުރުމާއި، އެކަމަށް ވަޤުތު ދެވޭ މީހަކު ކަމުގައިވުމުގެ އިތުރުން، އަންނަނިވި ޝަރުޠުތައް ފުރިހަމަވުން.

(1)  ދިވެހިރައްޔިތަކު ކަމުގައިވުން

(2)  ޢުމުރުން 18 އަހަރު ފުރިފައިވުން

(3)  އިންސާފާއި ހަމަހަމަ ކަން ދަމަހައްޓައި ގުޅިގެން މަސައްކަތް ކުރެވޭފަދަ މީހަކަށްވުން

(4)  ޝަރުޢީ ބަންދެއްގައި ހުރި މީހަކު ކަމުގައި ނުވުން.

(5)  ޖިނާޢީ ކުށެއްގެ ތުހުމަތުގައި 15 ދުވަހަށްވުރެ ގިނަދުވަހުގެ މުއްދަތުގައި ޤާނޫނީ ބަންދެއްގައި ހުރި މީހަކަށް ނުވުން.

(6)  ސާބިތު ދަރަންޏެއް އޮވެ ދަރަނި އަދާނުކުރާ މީހެއްކަމުގައި ނުވުން.

(7)  ޙަވާލުކުރެވޭ މަސައްކަތް އެންމެ ފުރިހަމަ ގޮތުގައި އަދާކުރަން ވަގުތު ދެވޭ އަދި ސްކައުޓްގެ ޤާނޫނާއި ހަމަތައް ބަލައިގަނެ، ސްކައުޓް ޙަރަކާތުގެ ކުރިއެރުމަށާއި ތަރައްޤީ އަށް ގުޅިގެން މަސައްކަތްކުރެވޭފަދަ މީހަކަށްވުން.

(8)  ސްކައުޓް ވަޢުދާއި ޤާނޫނު ދަމަހައްޓައި ސްކައުޓްގެ ހަމަތަކާ އުޞޫލާ އެއްގޮތަށް މަސައްކަތްކުރާ މީހަކަށްވުން

މަޤާމުގެ މަސްއޫލިއްޔަތު: ކޮމިޓީތަކުގެ ދާއިރާއާ ގުޅޭގޮތުން، ކޮމިޓީތަކުގެ މަސައްކަތްތައް ކަމުގައި ޤައުމީ ސްކައުޓް ކައުންސިލުން ފާސްކޮށްފައިވާ މަސައްކަތްތައް ކުރުން

މަޤާމަށް މީހުން ހޮވުމުގައި ބަލާނެ މިންގަނޑު: ސްކައުޓް ކައުންސިލްގެ ކޮމިޓީތަކުގެ މެމްބަރުކަމަށް ކުރިމަތިލާ ފަރާތްތަކުގެ ތެރެއިން އެ މަޤާމުތަކަށް އެންމެ ޤާބިލު ފަރާތްތައް ކަނޑައަޅާނީ ޤައުމީ ސްކައުޓް ކައުންސިލުންނެވެ.

މަޤާމުތަކަށް ކުރިމަތިލާނެ ގޮތާއި ސުންގަޑި:

މަތީގައިވާ މަޤާމުތަކަށް ޝަޢުޤުވެރިވާ ފަރާތްތަކުން މިއިޢުލާނާއެކުގައިވާ ފޯމާއި، ފޯމުގައި ބަޔާންކޮށްފައިވާ ލިޔެކިޔުންތައް 2021 ސެޕްޓެންބަރު 27 ވަނަ ދުވަހުގެ 14:00 ގެ ކުރިން، [email protected]  އަށް ހުށަހެޅުއްވުން އެދެމެވެ. އަދި ދަންނަވަމެވެ. މަޤާމަށް ކުރިމަތި ލުމަށްޓަކައި ސްކައުޓް އެސޯސިއޭޝަނުން ބޭނުންވަ ސަޕޯޓިންގ ޑޮކިޔުމަންޓެއް އޮތްނަމަވެސް، އެކަމަށް ބާރުދޭ ލިޔެކިޔުންތަކާއެކު [email protected] އަށް ހުށަހެޅުމުން، އެ ހުށަހެޅުމެއް ވަޒަން ކުރުމަށްފަހު ލިޔުން ދޫކުރާނެއެވެ.

އިތުރު މަޢުލޫމާތު:

މި މަޤާމުތަކަށް މީހުން ހޮވުމާއި ޢައްޔަނު ކުރުމުގެ މަސައްކަތް ކުރިއަށް ގެންދާނީ،  28 ސެޕްޓެންބަރު 2021ގައި ދައުރު ފަށާ ޤައުމީ ސްކައުޓް ކައުންސިލުންނެވެ. މިމަޤާމުތަކަށް ކުރިމަތިލުމާ ގުޅޭގޮތުން ނުވަތަ މަޤާމުތަކާ ގުޅޭގޮތުން އެއްވެސް ސުވާލެއް އޮތްނަމަ 3317514 އަށް ގުޅުއްވުމަށް ނުވަތަ [email protected]  އަށް އީމެއިލް ކުރެއްވުން އެދެމެވެ.