އަރިއަތޮޅު އުތުރުބުރީ ތޮއްޑޫއިން ދިރިއުޅުމަށްޓަކައި ބަންޑާރަ ގޯތި ދޫކުރާގޮތަށް ވަނީ ހަމަޖެހިފައެވެ. މިގޮތުން ދޫކުރުމަށް ހަމަޖެހިފައިވަނީ 3000 އަކަފޫޓްގެ 100 ގޯއްޗެވެ. ގޯތި ދޫކުރުމަށް ހަމަޖެހިފައިވާ ސަރަހައްދުތަކަކީ، އަމީނީމަގުން ހުޅަގަށް ހުޅަގަށް އަލިރަސްގެފާނު މަގާއި، ހަވީރީ ހިނގުމުމާއި ދެމެދުން ފާހަގަ ކޮށްފައިވާ އޭރިޔާ 1 ގައިވާ 70 ގޯއްޗާއި، މާމިސްކިތް މަގުގެ ދެކުނުން، ބޮޑުތަކުރުފާނުމަގާއި އަމީނީ މަގާއި ދެމެދުގައި ފާހަގަކޮށްފައިވާ އޭރިޔާ 2 ގައިވާ 14 ގޯއްޗާއި، ބުޓިކްގޯޅިން ދެކުނަށް ބަގީޗާގޯޅިން ހުޅަނގަށް ފާހަގަކޮށްފައިވާ އޭރިޔާ 3 ގައިވާ 4 ގޯއްޗާއި އަދި ނިކަގަސްމަގުން ދެކުނަށް ބަގީޗާގޯޅިން އިރަށް ފާހަގަކޮށްފައިވާ އޭރިޔާ 4 ގައިވާ 12 ގޯއްޗެވެ.

  ވީމާ، ޝަރުޠުތައް ފުރިހަމަވާ ފަރާތްތަކުން ދިރިއުޅުމަށްޓަކައި ދޫކުރާ ބަންޑާރަ ގޯއްޗަށް އެދޭ ފޯމު ފުރުއްވުމަށް ފަހު 2019 ޑިސެންބަރު 24 ވަނަ ދުވަހުން ފެށިގެން 2020 ޖަނަވަރީ 26 ވަނަ ދުވަހުގެ 12:00 ގެ ކުރިން އަރިއަތޮޅު އުތުރުބުރީ ތޮއްޑޫ ކައުންސިލްގެ އިދާރާއަށް ފޯމް ހުށަހެޅުއްވުން އެދެމެވެ. ގޯއްޗަށް އެދޭ ފޯމް ދޫކުރުމާއި ބަލައިގަތުމަށް ހަމަޖެހިފައިވަނީ ( 2019 ޑިސެންބަރު 24 ން 2020 ޖަނަވަރީ 26 ވަނަ ދުވަހުގެ 12:00 އަށް ) ރަސްމީ ބަންދުނޫން ދުވަހު ހެނދުނު 9:00 އިން 12:00 އަށެވެ. ފޯމް ނެގުމަށް ވަޑައިގަންނަވާއިރު ދިވެހިރައްޔިތެއްކަން އަންގައިދޭކާޑުގެ އަސްލު ނުވަތަ ކޮޕީއެއް ގެންނަންވާނެއެވެ. އިތުރުމަޢުލޫމާތު ހޯއްދެވުމަށް ގުޅުއްވާނީ މި އިދާރާގެ ނަންބަރު 6660537 ފޯނާއެވެ. މިހެންވެ، މިކަން ޢާންމުކޮށް އަންގައި އިޢުލާނު ކުރީމެވެ.

ގޯއްޗަށް އެދޭ މީހުންގެ ކިބައިގައި ހުންނަންވާނެ ޝަރުތުތައް

1. ދިވެހިރައްޔިތެއް ކަމުގައިވުން.
2. ޢުމުރުން 18 އަހަރުވެފައިވާ މީހަކަށްވުން.
3. ރާއްޖޭގެ އެއްވެސް ރަށަކުން ބަންޑާރަ ގޯއްޗެއް ނުވަތަ އަމިއްލަ ގޯއްޗެއް އެމީހެއްގެ ނަމުގައި ރަޖިސްޓްރީ ވެފައި ނެތުން.
4. ރާއްޖޭގެ އެއްވެސް ރަށަކުން އަމިއްލަ ނުވަތަ ބަންޑާރަ ގޯއްޗެއްގައިވާ ނުއުފުލޭ މުދަލުން ލިބިގެން އެފަދަ ގޯއްޗަކުން 600 އަކަފޫޓު ހަމަވާ ނުވަތަ  އެއަށްވުރެ ބޮޑުބައެއް ލިބިފައި ނެތުން.
5. ރާއްޖޭގެ އެއްވެސް ރަށެއްގައި ސަރުކާރުން ހަދައިދީފައިވާ ޢިމާރާތެއްގެ ފްލެޓެއް ނުވަތަ އެއްމެދު ޢިމާރާތެއްގެ ފްލެޓެއް އެމީހެއެއްގެ ނަމުގައި  ރަޖިސްޓްރީވެފައި ނެތުން.  އަދި މިފަދަ ތަނެއް އަމިއްލަ  ނަމުގައި އޮވެ ވޭތުވެދިޔަ 2 އަހަރުގެ ތެރޭގައި މީހަކަށްދީ ނުވަތަ ވިއްކައިފައި ނުވުން.
6. ރާއްޖޭގެ އެއްވެސް ރަށަކުން މީގެ ކުރިން ލިބިފައިވާ ގޯއްޗެއް ނުވަތަ ގޯއްޗަކުން ލިބިފައިވާ 600 އަކަފޫޓަށްވުރެ ބޮޑުބައެއް ވޭތުވެދިޔަ 2 އަހަރު ދުވަހުގެތެރޭ މީހަކަށްދީ ނުވަތަ ވިއްކައިފައި ނުވުން.
7. ރާއްޖޭގެ އެއްވެސް ރަށަކުން އަމިއްލަ  ނުވަތަ ބަންޑާރަ ގޯއްޗެއްގައިވާ  ނުއުފުލޭ މުދަލަކުން ލިބިގެން އެފަދަ ގޯއްޗަކުން  600 އަކަފޫޓަށްވުރެ  ބޮޑުބައެއް ލިބެން ނެތުން. ނުވަތަ ލިބެންއޮތް  ނަމަ އެތަން  ކަނޑައެޅިފައިވާ އުޞޫލާއި އެއްގޮތަށް ސަރުކާރަށް ދޫކޮށްލުމަށް އެއްބަސްވުން. 
8. ރާއްޖޭގެ އެއްވެސް ރަށަކުން އަމިއްލަ ނުވަތަ ބަންޑާރަ ގޯއްޗެއްގައިވާ ނުއުފުލޭ މުދަލަކުން ލިބިގެން އެފަދަ ގޯއްޗަކުން 600 އަކަފޫޓަށްވުރެ  ކުޑަބައެއް ލިބި،  އެބިމަކީ ވަކިން  ޢިމާރާތްކޮށްފައިވާ ނުވަތަ  ވަކިން ޢިމާރާތްކުރެވޭގޮތަށް ބައިކުރެވިފައިވާ ބިމެއްނަމަ އެތަން ކަނަޑައެޅިފައިވާ  އުޞޫލާއި  އެއްގޮތަށް ސަރުކާރަށް  ދޫކޮށްލުމަށް  އެއްބަސްވުން.

ގޯއްޗަށް އެދޭ މީހުންނަށް ޕޮއިންޓް ދިނުމަށް ހަމަޖެހިފައިވާ އުޞޫލު

ނޯޓް:

1. މަޢުލޫމާތުތައް ޗެކްކުރުމަށްފަހު ގޯތި ދިނުމަށް ނުވަތަ ގުރުއަތަށް ހޮވިފައިވާ ފަރާތްތަކުގެ ތެރެއިން އެއްވެސް ފަރާތެއް ޝަރުޠު ހަމަނުވާ ކަމަށް ސާބިތުވެއްޖެނަމަ، ގޯތި ދިނުމަށް ހޮވިފައިވާ ހޮވުން ބާތިލް ކުރެވޭނެއެވެ. އަދި ޕޮއިންޓަށް އަންނަ ބަދަލެއްގެ ސަބަބުން ގުރުއަތަށް ހޮވޭވަރަށްވުރެ މަދުން ޕޮއިންޓް ލިބޭނަމަ ގުރުއަތުން ހޮވިފައިވާ ހޮވުންވެސް ބާޠިލް ކުރެވޭނެއެވެ.

2. ފޯމްގައި ދީފައިވާ މަޢުލޫމާތަކީ ސައްޙަނޫން މަޢުލޫމާތެއްކަން، ސާބިތުވެއްޖެނަމަ އެ ފޯމް ބާޠިލް ކުރެވޭނެއެވެ.

  ހ. ގޯތި ޙަވާލު ކުރުމަށް ފަހުވެސް އެފަދަކަމެއް ސާބިތުވެއްޖެނަމަ ގޯތި ވަކިކުރެވޭނެ އެވެ.

3. ޖޮއިންޓް އެޕްލިކޭޝަންގެ ގޮތުގައި ފޯމު ހުށަހަޅާފައިނުވާ ދެމަފިރިން ގޯތި ލިބެންޖެހޭ ލިސްޓަށް ނުވަތަ ގުރުއަތުން ހޮވިއްޖެނަމަ، މިދެފަރާތަށް ވެސް ދޫކުރެވޭނީ 1 ގޯތި، މިގޮތުން ގޯތިދޭނެ ފަރާތެއް ކަނޑަ އަޅާނީ ތިރީގައިވާ ގޮތުގެ މަތީންނެވެ.

  ހ. ފުރަތަމަ ފުރުސަތުދޭނީ ދެފަރާތުގެ ނަމުގައި ގޯތި ރަޖިސްޓަރީ ކުރުމަށެވެ.

  ށ. ދެފަރާތް އެއްކޮށް ރަޖިސްޓަރީ ކުރުމަށް އެއްބަސް ނުވެވޭނަމަ، ދެފަރާތުން ވާހަކަ ދައްކައިގެން ރަޖިސްޓަރީ ކުރަންބޭނުންވާ ފަރާތެއް ކަނޑައަޅާނީއެވެ.

  ނ. ދެފަރާތުން ވާހަކަ ދައްކައިގެން  ރަޖިސްޓަރީ ކުރާނެ ފަރާތަކާއިމެދު އެއްބަސްނުވެވިއްޖެނަމަ، ގޯތި ޙަވާލު ކުރާނެ ފަރާތެއް ކަނޑައަޅާނީ ގުރުއަތު ލައިގެންނެވެ.

4. ޖޮއިންޓް އެޕްލިކޭޝަންގެ ގޮތުގައި ފޯމް ހުށަހަޅާފައި ނުވާ، އެކަކަށްވުރެ ގިނަ އަނބިން ތިބި މީހަކަށާއި، އޭނާގެ އަންބެއް ނުވަތަ އަނބިން ގޯތި ދިނުމަށް ހޮވުނު ނަމަވެސް، އެފަރާތްތަކަށް ޙަވާލު ކުރެވޭނީ 1 ގޯއްޗެވެ. މިގޮތުންގޯތި ލިބޭ ފަރާތް ކަނޑައަޅާނީ ތިރީގައިވާ ގޮތުގެ މަތީންނެވެ.

  ހ. ފުރަތަމަ ފުރުސަތުދޭނީ ހޮވުނު ފަރާތުގެ ނަމުގައި ރަޖިސްޓަރީ ކުރުމަށެވެ.

  ށ. އެއްކޮށް ރަޖިސްޓަރީ ކުރުމަށް އެއްބަސް ނުވެވޭނަމަ، ދެފަރާތުން ވާހަކަ ދައްކައިގެން ރަޖިސްޓަރީ ކުރަންބޭނުންވާ ފަރާތެއް ކަނޑައަޅާނީއެވެ.

  ނ. ދެފަރާތުން ވާހަކަ ދައްކައިގެން ރަޖިސްޓަރީ ކުރާނެ ފަރާތަކާއިމެދު އެއްބަސްނުވެވިއްޖެނަމަ، ގޯތި ޙަވާލު ކުރާނެ ފަރާތެއް ކަނޑައަޅާނީ ގުރުއަތު ލައިގެންނެވެ.

5. ދެމަފިރިން ގޯއްޗަކަށް އެދި ފޯމް ލާއިރު ޖޮއިންޓް އެޕްލިކޭޝަންގެ ގޮތުގައި ހުށަހެޅިދާނެއެވެ. ދެމަފިރިއަކު ގޯއްޗަށް އެދި ޖޮއިންޓް އެޕްލިކޭޝަން ހުށަހަޅާނީ ވަކިދެފޯމެއްގެ ގޮތުގައި ފޯމުގައިވާ ޖޮއިންޓް އެޕްލިކޭޝަންގެ ބައި ފުރުމަށްފަހު ދެ ފޯމް އެކުގައި ހުށަހަޅާ ފަރާތްތަކަށް ޖޮއިންޓް އެޕްލިކޭޝަންގެ ގޮތުގައި ލިބެންވާ ޕޮއިންޓް ދެވޭނެއެވެ. ނަމަވެސް އެދެފަރާތުގެ ތެރެއިން އެއް ފަރާތުގެ އެޕްލިކޭޝަން ޝަރުޠު ހަމަނުވާނަމަ އެއީ ޖޮއިންޓް އެޕްލިކޭޝަނެއްގެ ގޮތުގައި ނުބެލެވޭނެއެވެ. އަދި ޝަރުތު ހަމަވާ ފަރާތަށް ޖޮއިންޓް އެޕްލިކޭޝަންގެ ގޮތުގައި ހުށަހެޅުމުން ލިބޭ ޕޮއިންޓް އުނި ކުރެވޭނެއެވެ.

6. ފޯމް ހުށަހަޅާ ދެފަރާތަކީ ޝަރުޠު ހަމަވެ، ގުރުއަތަށް ހޮވޭ މިންގަނޑަށް ފެތޭ ފަރާތްތަކެއްނަމަ، ދެ ފޯމް ވެސް ގުރުއަތަށް ގެންދެވޭނެއެވެ. ގުރުއަތުން އެ ދެ ފޯމަށް ގޯތި ލިބުނަސް ރަޖިސްޓަރީ ކުރާނީ ދެމީހުންގެ ނަމުގައި އެއްގޯއްޗެވެ. އެއްފޯމަށް ގުރުއަތުން ގޯތިލިބުނު ނަމަވެސް ގޯތި ރަޖިސްޓަރީ ކުރާނީ ދެމީހުންގެ ނަމުގައެވެ.

7. އެކަކަށް ވުރެ ގިނަ އަނބިން ތިބި މީހަކަށް، ހުރިހާ އަނބިންނާއެކު ޖޮއިންޓް އެޕްލިކޭޝަން ހުށަހެޅިދާނެއެވެ.

  ހ. އެކަކަށްވުރެ ގިނަމީހުންނާއި އިދެގެންއުޅޭ ފަރާތްތަކުގެ ކޮންމެއަތްބަކަށް ޖޮއިންޓް އެޕްލިކޭޝަނެށް ލެވިދާނެއެވެ. މިގޮތަށް ޖޮއިންޓް އެޕްލިކޭޝަން ހުށަހަޅާފަރާތްތަކުގެ ތެރެއިން އެއްފަރާތަށް ވުރެ ގިނަފަރާތްތަކެއް ގޯތި ލިބުމަށް ހޮވޭ މިންގަނޑަށް ފެތޭ ނަމަވެސް ދޫކުރާނީ 1 ގޯތި 1 ޖޮއިންޓް އެޕްލިކޭޝަނަކަށެވެ. މިގޮތަށް ހޮވިއްޖެނަމަ ހޮވޭ ފަރާތްތަކުގެ މެދުގައި ވާހަކަ ދައްކައިގެން ގޯތި ދޭނެ ޖޮއިންޓް އެޕްލިކޭޝަނެއް ކަނޑައަޅާނީއެވެ.  ނަމަވެސް ވަކި ގޮތަކަށް އެއްބަސް ނުވެވިއްޖެނަމަ، ގޯތި ލިބޭ އެޕްލިކޭޝަނެއް ކަނޑައަޅާނީ ގުރުއަތުލައިގެނެވެ.

  ށ. އެކަކަށްވުރެ ގިނަމީހުންނާއި އިދެގެން އުޅޭމީހަކު، އޭނާގެ އަތްބަކާއެކު ޖޮއިންޓް އެޕްލިކޭޝަން ހުށަހަޅާފައި ވަނިކޮށް، އޭނާގެ އެހެން އަތްބެއް ޖޮއިންޓް އެޕްލިކޭޝަން ނޫން ގޮތަކަށް  ވަކިން ފޯމް ހުށަހަޅާ، މި ދެ އެޕްލިކޭޝަން ގޯތިދިނުމަށް ހޮވިއްޖެ ނަމަވެސް ހަވާލުކުރާނީ 1 ގޯއްޗެވެ. އަދި މިގޯތި ރަޖިސްޓަރީ ކުރެވޭނީ ޖޮއިންޓް އެޕްލިކޭޝަން ހުށަހެޅި ފަރާތްތަކުގެ ނަމުގައެވެ.

8. ގޯއްޗަށް އެދި ފައިވާ ފަރާތް ތަކަށް ހަމަޖެހިފައިވާ އުސޫލުން ޕޮއިންޓް ދިނުމަށްފަހު، އެންމެ މަތިން ޕޮއިންޓް ލިބޭ ފަރާތްތަކަށް ތަރުތީބުން ގޯތި ދިނުން.  (މިގޮތަށް ތަރުތީބު ކުރާއިރު 100 ވަނަ ގޯއްޗަށް ޕޮއިންޓް އެއްވަރު ވެގެން އެއްފަރާތަށް ވުރެ ގިނަފަރާތް ހޮވިފައިވާނަމަ ގޯތި ދޭނެ ފަރާތެއް ކަޑައަޅާނީ އެފަރާތްތަކުގެ މެދުގައި ގުރުއަތު ލައިގެންނެވެ)

9. ދެންނެވިފައިވާ ގޮތަށް ގޯތިދޭނެ ފަރާތްތަށް ކަޑައެޅުމަށްފަހު ނެގުމަށް ހަމަޖެހިފައިވާ 100 ގޯތީގައި ނަންބަރު ޖަހައި ގޯތި ދިނުމަށް ކަޑައެޅިފައިވާ ފަރާތްތަކުގެ މެދުގައި ގުރުއަތު ލައިގެން ގޯތި ޙަވާލު ކުރެވޭނެއެވެ.

  މިހެންވެ، މިކަން ޢާންމުކޮށް އަންގައި އިޢުލާނުކުރީމެވެ.