ނޭޝަނަލް ސޯޝަލް ޕްރޮޓެކްޝަން އެޖެންސީ

މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް                                 

މާލެ ، ދިވެހިރާއްޖެ

ނަންބަރު:199-PLS/CIR/2019/3

21 ޞަފަރު 1441

ސަރކިއުލަރ

ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީއެހީގެ ޕްރޮގްރާމަށް ގެނެވުނު ބަދަލުތަކާއި ގުޅޭ

ޤާނޫނު ނަންބަރު 2014/2 (އިޖްތިމާއީ ރައްކާތެރިކަމުގެ ޤާނޫނު) ގެ ދަށުން ހެދިފައިވާ "އެކަނި ދަރިން ބަލަހައްޓާ މައިން ނުވަތަ ބަފައިންނަށް މާލީ އެހީ ދިނުމާބެހޭ ގަވައިދު" ގެދަށުން މިއެޖެންސީން ފޯރުކޮށްދޭ ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީ ރައްޔިތުންނަށް ލުއިފަސޭހަވާނެ ގޮތަކަށް އަދި އޭގެ ހައްގުވެރިންނަށް އެކަށީގެންވާ ގޮތެއްގައި ފޯރުކޮށްދިނުމަށްޓަކައި މިޕްރޮގްރާމް އިސްލާހުކުރެއްވުމަށް 15 އޮކްޓޫބަރު 2019ގައި ރައީސުލްޖުމްހުރިއްޔާ ވަނީ ނިންމަވާފައެވެ. މިގޮތުން 20 އޮކްޓޫބަރު 2019 ގައި ގެޒެޓުކުރެވިފައިވާ "ގަވާއިދު ނަންބަރު 2016/R-39 (އެކަނި ދަރިން ބަލަހައްޓާ މައިން ނުވަތަ ބަފައިންނަށް މާލީ އެހީ ދިނުމާބެހޭ ގަވާއިދު) އަށް 1 ވަނަ އިޞްލާޙު ގެނައުމުގެ ގަވާއިދު" މެދުވެރިކޮށް މި ސަރކިއުލަރއާއެކު އެއްކަރުދާސްކުރެވިފައިވާ ބަދަލުތައް މިޕްރޮގްރާމަށް ވަނީ ގެނެވިފައެވެ.

މިގޮތުން، މަތީގައި ދެންނެވިފައިވާ ބަދަލުތަކާއެކު "ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީއަށް އެދި ހުށަހަޅާ ފޯމު" ވަނީ މުރާޖަޢާކުރެވިފައެވެ. އަދި އައު ފޯމު 20 އޮކްޓޫބަރ 2019 އިން ފެށިގެން މިއެޖެންސީގެ ކައުންޓަރުންނާއި، ވެބްސައިޓުން (www.nspa.gov.mv) އަދި ކައުންސިލް އިދާރާތައް މެދުވެރިކޮށް ލިބެން ހުންނާނެއެވެ. ވީމާ މިތާރީޚުން ފެށިގެން އެހީއަށް އެދި ހުށަހަޅަންވާނީ އަލަށް ތައާރަފްކުރެވުނު ފޯމު މެދުވެރިކޮށް ކަމުގައި ދަންނަވަމެވެ.

ހަމަމިއާއެކު މިގެނެވުނު ބަދަލުތަކާ ގުޅިގެން އެހީ ހައްޤުވާ ފަރާތެއްވާނަމަ ނުވަތަ މިހާރު އެހީލިބެމުންދާ ކުދިންގެ އިތުރުން އިތުރު ކުއްޖަކަށް އެހީ ހައްޤުވާނަމަ އެފަދަ ފަރާތްތަކުން މިއެޖެންސީއަށް ވީއެންމެ އަވަސް ފުރުސަތެއްގައި ތައާރަފްކުރެވުނު ފޯމު މެދުވެރިކޮށް ހުށަހެޅުއްވުމަށް ދަންނަވަމެވެ. އަދި ގަވާއިދު ނަންބަރު 2016/R-22 (އިޖްތިމާޢީ ރައްކާތެރިކަމުގެ އާންމު ގަވާއިދު) ގެ 8 ވަނަ މާއްދާގެ (ރ) ގައިވާ ގޮތުން، އިޖްތިމާޢީ ރައްކާތެރިކަމުގެ އެހީއަށް އެދި ހުށަހަޅާ ފަރާތްތަކުގެ ތެރެއިން އެހީ ޙައްޤުވާ ފަރާތްތަކަށް އެހީ ދެވޭނީ 2 (ދޭއް) އަހަރުގެ މުއްދަތަށް މަހުން މަހަށް ކަމުން، އެހީހަމަޖެހުނުތާ 2 (ދޭއް) އަހަރު 31 ޑިސެންބަރ 2019ގެ ނިޔަލަށް ހަމަވާ ފަރާތްތަކުން އެ ތާރީޚުގެ ކުރިން އަލުން ފޯމު ހުށަހެޅުއްވުމަށް ހަނދުމަކޮށްދެމެވެ. މި މުއްދަތުގައި ފޯމު ހުށަނާޅާ ފަރާތްތަކަށް އެހީ ކުރިއަށްގެންދެވޭނީ އައު ފޯމު މެދުވެރިކޮށް އެހީއަށް އެދި ހުށަހެޅުއްވުމުން އެހީ ދިނުމުގައި ބަލާ މިންގަނޑުތަކަށް ރިއާޔަތްކޮށެވެ.

މިކަމާއި ގުޅޭ އިތުރު މަޢުލޫމާތު ރަސްމީ ބަންދުނޫން ކޮންމެ ދުވަހަކު ހެނދުނު 8:00 ން މެންދުރުފަހު 14:00 އަށް މިއެޖެންސީގެ ހޮޓްލައިން 1402 އަށް ގުޅުއްވުމުން ލިބިވަޑައިގަންނަވާނެއެވެ.

ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީއެހީގެ ޕްރޮގްރާމަށް ގެނެވުނު ބަދަލުތައް