މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީގެ ޚާއްޞަ ޢާންމު ޖަލްސާ 2024 ވަނީ، އޮންލައިން ޕްލެޓްފޯމް "ފަހިވޯޓު" މެދުވެރިކޮށް 2024 ޖޫން 11 ވަނަ ދުވަހުގެ 16:00 ގައި ބާއްވާފައެވެ. މި ޖަލްސާގައި ބައިވެރިވެވަޑައިގެންފައިވަނީ ޖުމްލަ 47 (ސާޅީސްހަތެއް) ޙިއްޞާދާރުންނެވެ. އެއީ މުޅިއެކު 5,540,192 (ފަސްމިލިއަން ފަސްލައްކަ ސާޅީސްހާސް އެއްސަތޭކަ ނުވަދިހަދޭއް) ޙިއްޞާއެވެ.

ޖަލްސާގެ ނިންމުންތައް:

• ކުންފުނީގެ އަސާސީ ގަވާއިދަށް ހުށަހަޅާފައިވާ އިސްލާޙުތައް ޙިއްޞާދާރުންގެ ޚާއްޞަ ޤަރާރަކުން ފާސްކޮށްފައިވެއެވެ. މިއައިޓަމަށް ފެންނަކަމަށް ވޯޓުދެއްވާފައިވަނީ 99.99 އިންސައްތަ ޙިއްޞާދާރުންނެވެ. އަދި ނުފެންނަކަމަށް ވޯޓުދެއްވާފައިވަނީ 0.001 އިންސައްތަ ޙިއްޞާދާރުންނެވެ.

• ކުންފުނީގެ ހިންގާ ގަވާއިދަށް ހުށަހަޅާފައިވާ އިސްލާޙުތައް ޙިއްޞާދާރުންގެ ޚާއްޞަ ޤަރާރަކުން ފާސްކޮށްފައިވެއެވެ. މިއައިޓަމަށް ފެންނަކަމަށް ވޯޓުދެއްވާފައިވަނީ 100 އިންސައްތަ ޙިއްޞާދާރުންނެވެ. އަދި ނުފެންނަކަމަށް އެއްވެސް ޙިއްޞާދާރެއް ވޯޓުދެއްވާފައިނުވެއެވެ.

• ކުންފުނީގެ ޙިއްޞާދާރުންނަށް 2022 ވަނަ އަހަރު ޙިއްޞާގެ ފައިދާގެ ގޮތުގައި -/5 ރުފިޔާގެ މޫނުމަތީ އަގުގެ ކޮންމެ ޙިއްޞާއަކަށް 4/- ރުފިޔާ ބަހާގޮތަށް، ވަނީ ޙިއްޞާދާރުންގެ އިއްތިފާޤުން ފާސްކޮށްފައިވެއެވެ. މިއައިޓަމަށް ފެންނަކަމަށް ވޯޓުދެއްވާފައިވަނީ 100 އިންސައްތަ ޙިއްޞާދާރުންނެވެ. އަދި ނުފެންނަކަމަށް އެއްވެސް ޙިއްޞާދާރެއް ވޯޓުދެއްވާފައިނުވެއެވެ.

ވީމާ، މިކަން ކުންފުނީގެ އެންމެހާ ޙިއްޞާދާރުންގެ މަޢުލޫމާތަށްޓަކައި ދެންނެވީމެވެ.