ފުރަތަމަ ބުރު

ދެވަނަ ބުރު

ތިންވަނަ ބުރު

• ·        މިބުރުގައި ވާދަ ކުރާނީ ގިނަވެގެން 10 ބައިވެރިންނެވެ.
• ·        މި ބުރުގައި ބަލައިގެން ކިޔެވުމާއި، ނުބަލައި ކިޔެވުމާއި، ތަޖްވީދުގެ ބައިތަކުން ސުވާލު ކުރެވޭނެއެވެ.
• ·        ތަޖްވީދުގެ ބައިން 3 ސުވާލު ކުރެވޭނެއެވެ.
• ·        ބަލައިގެން ކިޔެވުމުގެ ބައިން 2 ސުވާލު އަދި ހިތުން ކިޔެވުމުގެ ބައިން 2 ސުވާލު ކުރެވޭނެއެވެ.
• ·        ބަލައިގެން ކިޔެވުމުގައި ސުވާލު ކުރެވޭނީ 28 އަދި 29 ވަނަ ފޮތުންނެވެ. ފުރަތަމަ ސުވާލު 28 ވަނަ ފޮތުން، ދެވަނަ ސުވާލު 29 ވަނަ ފޮތުންނެވެ.
• ·        ނުބަލައި ކިޔެވުމުގެ ބައިން ސުވާލު ކުރެވޭނީ 30 ވަނަ ފޮތުންނެވެ.
• ·        ތަޖްވީދުގެ ބައިން ސުވާލު ކުރެވޭނީ ސުކުންވެގެންވާ ނޫނާއި ތަންވީނު އަދި މީމު ސުކުނުގެ ޤަވާޢިދުން ޙުކުމް ބުނެދިނުމާއެކު ސަބަބު ބަޔާންކޮށްދިނުމެވެ. ނުވަތަ މިސާލު ދެއްކުމުން އޭގެ ޙުކުމާއި ސަބަބު ބަޔާންކުރާށެވެ.
• ·        މުބާރާތުގެ ކިޔެވުން ފެށުމުގެ ކުރިން ބައިވެރިން ކިޔަވާނެ ތަރުތީބު ގުރުއަތުލެވޭނެއެވެ.

• ·        02 ވަނަ ބުރުގައި ވާދަ ކުރާނީ ފުރަތަމަ ބުރުގެ ބައިވެރިންގެ ތެރެއިން އެންމެ މަތީ މާރކްސް ހޯދި 07 ބައިވެރިންނެވެ.
• ·        މި ބުރުގައި ވާދަކުރާ ބައިވެރިން މި ބުރަށް ތައްޔާރުވުމަށް 01 ދުވަހުގެ މުއްދަތެއް ދެވޭނެއެވެ.
• ·        މި ބުރުގައި ބަލައިގެން ކިޔެވުމާ، ނުބަލައި ކިޔެވުން އަދި ޢުލޫމުލް ޤުރުއާންގެ ބައިތަކުން ސުވާލު ކުރެވޭނެއެވެ.
• ·        ބަލައިގެން ކިޔެވުމުގައި ސުވާލު ކުރެވޭނީ 27 އަދި 28 ވަނަ ފޮތުންނެވެ. ސުވާލުކުރެވޭނީ ފުރަތަމަ ސުވާލު 27 ވަނަ ފޮތުން، ދެވަނަ ސުވާލު 28 ވަނަ ފޮތުންނެވެ.
• ·        ނުބަލައި ކިޔެވުމުގެ ބައިން ކުރެވޭނީ 2 ސުވާލެވެ. އެއް ސުވާލު ކުރެވޭނީ 29 ވަނަ ފޮތުގެ سُورَةُ الْمُزَمِّل އިން سُورَةُالْمُرْسَلاَت އާއި ދެމެދުން 1 ސުވާލު، އަދި ދެވަނަ ސުވާލު ކުރެވޭނީ 30 ވަނަ ފޮތުގެ ތެރެއިންނެވެ.
• ·        ޢުލޫމުލް ޤުރްއާންގެ ބައިގައި 5 - 10 ދެމެދުގެ މިންވަރަކަށް ސުވާލު ކުރެވޭނެއެވެ. ސުވާލުކުރާނެ ސީދާ ޢަދަދު ކުރީބައިގައި ބައިވެރިންނަށް ހިއްސާކުރެވޭނެއެވެ.
• ·        މުބާރާތުގެ ކިޔެވުން ފެށުމުގެ ކުރިން ބައިވެރިން ކިޔަވާނެ ތަރުތީބު ގުރުއަތުލެވޭނެއެވެ.

• ފައިނަލް ބުރުގައި ވާދަކުރެވޭނީ ދެވަނަ ބުރުގެ  ބައިވެރިންގެ ތެރެއިން އެންމެ މަތީ މާކްސް ހޯދާ 05 ބައިވެރިންނަށެވެ.
• މި ބުރުގައި ވާދަކުރާ ބައިވެރިން މި ބުރަށް ތައްޔާރުވުމަށް 01 ދުވަހުގެ މުއްދަތެއް ދެވޭނެއެވެ.
• މި ބުރުގައި ބަލައިގެން ކިޔެވުމާއި، ނުބަލައި ކިޔެވުމާއި، ތަޖްވީދު އަދި ޢުލޫމުލް ޤުރްއާނުގެ ބައިތަކުން ސުވާލު ކުރެވޭނެއެވެ.
• ބަލައިގެން ކިޔެވުމުގެ ބައިން 2 ސުވާލު އަދި ހިތުން ކިޔެވުމުގެ ބައިން 4 ސުވާލު ކުރެވޭނެއެވެ.
• ބަލައިގެން ކިޔެވުމުގައި ދެ ސުވާލު ކިޔަވަންވާނީ ދެ ރާގަކަށެވެ.

1-   ފުރަތަމަ ސުވާލު ކިޔަވަންވާނީ الْقَارِئ مَحْمُود خَلِيل الْحُصَرِي ގެ ރާގަށް 29 އަދި 30 ވަނަ ފޮތް ފިޔަވައި އެބައިވެރިއަކު އަމިއްލައަށް އިޚްތިޔާރު ކުރާ ތަނަކުން 7 ފޮޅުވަތާއި 10 ފޮޅުވަތާ ދެމެދުގެ މިންވަރެކެވެ.

2-   ދެވަނަ ސުވާލު ކިޔަވާނީ الْقَارِئ مَحْمُود خَلِيل الْحُصَرِي ކިޔަވާފައިވާ ރާގު ނޫން އެބައިވެރިއަކު އިޚްތިޔާރުކުރާ ރާގަކަށް، 26،27،28 ވަނަ ފޮތުގެ ތެރެއިން ގުރުއަތުން ނެގޭ ތަނަކުން 7 ފޮޅުވަތާއި 8 ފޮޅުވަތާއި ދެމެދުގެ މިންވަރެކެވެ.

• ނުބަލައި ކިޔެވުމުގެ ބައިން ސުވާލު ކުރެވޭނީ 29 ވަނަ ފޮތުން 4 ފޮޅުވަތާއި 5 ފޮޅުވަތާ ދެމެދުގެ 2 ސުވާލާއި، 30 ވަނަ ފޮތުން 4 ފޮޅުވަތާއި 5 ފޮޅުވަތާ ދެމެދުގެ 2 ސުވާލެވެ.
• ތަޖްވީދުގެ ބައިން ސުވާލު ކުރެވޭނީ ޖުމްލައެކު 5 ސުވާލެވެ.

-       މަޚްރަޖްތަކުން 1 ސުވާލު

-       އަކުރު ބަރުވުމާއި ލުއިވުމުގެ ބައިން 1 ސުވާލު

-       ނޫނު ސުކުނާއި ތަންވީނުގެ ބައިތަކުން 1 ސުވާލު

-       މީމު ސުކުނުގެ ބައިތަކުން 1 ސުވާލު

-       މައްދުގެ ބައިތަކުން 1 ސުވާލެވެ.

މި ބައިތަކުގެ ތެރެއިން މަޚްރަޖުގެބައި ފިޔަވައި އެހެން ބައިތަކުން ސުވާލު ކުރެވޭނީ  އެބައިތަކުން މިސާލު ދެއްކުމުން، މިސާލުގައިވަނީ ކޮންކަހަލަ ތަނެއްކަން، ޙުކުމް،  ސަބަބު އަދި މިންވަރު ބުނެދިނުމަށެވެ.

• ޢުލޫމުލް ޤުރްއާނުގެ ބައިގައި ސުވާލުކުރެވޭނީ ސްޕީޑް ރައުންޑެއްގެ ގޮތުގައި 1މިނިޓާއި ދޮޅު މިނިޓާއި ދެމެދުން ފަނޑިޔާރުން ކަނޑައަޅާ ވަގުތެއްގެ ތެރޭގައި ޖަވާބު ދޭ ގޮތަށެވެ.
• މި ސުވާލުތައް ކުރިމަތި ކުރުވާނީ ދީފައިވާ ސުވާލާއި ޖަވާބު އަތްމަތީ ކަރުދާހުގެ ތެރެއިންނެވެ.

ސްޕީޑް ރައުންޑުގެ ގޮތުގައި ކަނޑައަޅާ ވަގުތުގެ މިންވަރަކީ ކިހާވަރެއްކަން ކުރީބައިގައި ބުނެދެވޭނެއެވެ.